Na ki ngaihsut penmah na hihi

Na ki ngaihsut penmah na hihi

Na ki ngaihsut banglian in a piang na hihi. Thu hilhna khat ah hihthu ka hilhleh nupi khat hong dingto in ‘sia aw, ka zawn pen ka ut sa na hiam? Ka lungdam zawhloh pen ka deihzawk hong sa na hiam?’ hong ci hi. Mikhat beek a zawngnuam leh a lungdamnuamlo omlo hi. A hiphial zongin na ki ngaihsut bangin na pianghi cihthu ki laih thei tuanlo hi.

‘Music lam kiva het keng’ ci in music a tum ngeilo te in hong gen ding hi. ‘Khut siamna nei peuhmah keng, bangmah hihthei keng’ ci in inn lam ngeilo, khut siamna a neilo te in hong gending hi. Tuamahbangin ‘lai at siam zong hikeng, la phuak thei keng’ cihte zongh thuman mah a hihi.

Mi pawl khat te leuleu in ‘na khempeuh lemlem buang ei’, ‘nawngkai haksa lua cihbang om tuan kei, kua mah in kei hong buailua sak thei lo hi’ a ci zongh mi om veve hi. Ih ki ngaihsutzia vive a gen khia i hiaa i siamna leh i hihtheihlohna te a gen i hi kei hi. Na ki ngaihsutna bangin a piang mah na hihi.

Ih lungsim sungaa i ki muh bangin a kipiang a hihi. Hibang i gen ciangin mi a tuampian deuh te a gennuam i hikei hi. Normal mihingte a gen i hihi. A lungsim sungah bangzahtak a hoihin a kimu zongin khelangkhat ki tan mi in tai kidemna ah a khatna ngahngeilo ding hi. Khutlangkhat neilo mi in khauzial kidemna ah khutnihnei te sangin manlang zaw theilo hi. Mit khua mulo in zongh limhoih pen suai thei tuanlo ding hi.

A lawhcing mahmah mikhat in a mitkha sungah koici bang dan in kimu ding hiam? A lawhcinglo, a sumzuakna, a sumbawlna ah supna vive a ngahpa in a kimu ding hiam? Tua bang hithei ngiatlo hi. A lungsim sungah a ki muh tantan a sangkah zo a hihi. Ka inn lamnop dan khat ii design ding lim suaisiampa kiangah ken gen ci ni. Tawm vei ka gen khitciangin ‘aw thei ta ing ei, thei

ta ingh ei’ hong ci hi. Tua limsuai siampa in a mah le a mah ki muanna a nei ding hiam, tua a hihkei leh ‘kei limsuai siam hi kei veng aw’ a ci lai tam? Hih pen nangzong na thei lel hi.

Na khat semnuam in a semtheilo ding vive in na ki ngaihsun den kha ding hi. Semzo ding cih sunglam kimuanna khat pen na kisap penpen hi thei hi. Tuabang na hihleh semtaktak lecin haksatna omlo in na sem zo ding hi. Na up ding hi ziau hi. Hih thupen kei mah tektek inzongh ka sinsa a hihi.

Ka zi pen lim suaihsiam a hihloh lam ki thei hi. Lim suai ngeingiatlo hi. Banghanghiamcihleh ka suaithei kei ding hi cihpen a upsa thu a hihi. Olno tak in limsuaih siam na suak thei hi cih a sunglam ah a tung dingin damdam in ka hanciam sim hi. Puansai ah puan a lei ciangin a lei puanmel (color) te ‘ki tuak thei si, et lawm thei si’ ka ci zel hi. ‘Na inn sung vankoih dan zongh kituak dimdiam se’, ‘nangpen na lungsim ngelna hoih mahmah hi, lim suai lecin zongh hoihtaktak in ciai’ ka ci zel hi.

Inn sungah suan ding lim tuamtuam lei in inn sungah a suan ciangin ‘a hoih dingleh a etlawm dingin gual thei taktak ciai’ ci in ka phat zel hi. Damdam in a sunglam ah limsuaih siam theihna ding thu te ka nguangnguang hi.

Christmas ni khat hong tun ciangin limsuaihna tawh kisai letsong bekbek ka pia leuleu hi. Color nam kim, laikung lai teh ciangbek hilo in limsuai siam te ii zat van khempeuh a kicing tak in ka pia hi. A sawtlo in ‘lim khat hong suai pongleng ai ve’ hong ci hi. A masa pen in 14×20-inch tungah huih in a mutlaitak aa a etlawm mahmah singkunglim pawlkhat hong suai khia takpi hi.

A sawtlo in ka inn sungteng uh ah limsuai siam a hihna limhoih tuamtuam tawh hong kilangh khia hi. Lim suai thei dingin a sungah a ki up ciangin lim hong suaithei takpi a hihi.

Advertising a siam mahmah mikhat in adevertising tawh a minthangpa a suahna thu hong gen hi. A sangkah lai in ahihleh engineer a ut mahmah mi ahihi. Engineer dingin a hanciam mahmah mi khat a hihi. Tua laitak in video disc zuakding pawlkhat nei citciat hi.

A lunglutpih theiding a lawmte pawlkhat a min uh tawh laikhak in hopih in zuak hi. A lawmte khatin a van a lei khitciangin laithuk kik aa ‘lawm aw, nang pen advertising lam ah nasem lecin kiva mahmah ding hi teh. Nong laikhak tomno bek in na van hong leisak nuam hi. Tua banglam ah talent a nei mahmah na hihi’ ci in laithuk hi.

Suangtum no khat tui kuangsungah a kiat ciangin tui te a nawldong mah a taii zaizai mahbangin tua thuno cik khat in hihmipa advertiser dingin lunggulhna pia hi. A lungsim sungah advertising tuihual bekbek tai zaizai hi. Tua ngaihsutna bekbek tawh nungta toto hi. A mah le a mah a siam mahmah advertiser in kimu den hi. Thu dang ngaihsutna nei zo nawnlo hi. A sawtciangin a minthang advertiser hong suak hi.

Nitak khat ansai khat ah an a neklai tak in papi khat a lawmte in a khualzinna thu a gen dingin lamet kholhloh, ki nginkholhloh pi in sawl uh hi. Mipi maiah thugen ngeilo a hihmanin a ci na zo liang hi. A thugen man in a ciah uh ciangin a lawmte khat in ‘thu gen siamtaktak ciai, mipi mai nangawn ah nang thugen ngam, na kammal zat dan zongh kituak sa taktak ing’ va ci hi.

Tua kammal a zakma in a lungsim sungah ‘hih bang thu gen ka genmasak leh ka gen nunung hi hen’ ci in thugen nuam a sa vetlo a hihi. Ahizongin a lawmpa hanthohna a zak khitphet in thugen siampa in ki ngaihsun kha vat hi. Tu in a hihleh munthupi leh vai thupi te ah thugen dingin sum tampipi tawh ki cial ta hi.

Nang banghangin hibangin piang?

Mitampi te in hibang aa ka pian ding peuhmah tawmzongh ngaihsun khol ngei vet keng ci thei uh hi. Mi a tamzaw te pen i neulai aa hong ki zocip khinsa a hihi. Launa, lunghihmawhna, mi lak ah maizumna leh lungbuai den cihte pen a neulai pek pan in a lungsim sungah sunsiah bangin a ki nguan sakkhinsa a hihi.

Maizum aa launa tawh kisai tawm genpak leng, mite a kum hong cingtoto in khangnohun hong tun ciangin maizum ci thei pha deuh uh hi. Tua pen a mau te in a theihbanloh uh hangin a neu mahmah hun, naupangno a hih hunlai pek in a sunglam ah om khin hi.

Mary ii nu in a lengla te maiah a tanu ki theisak nuam a hihmanin thugen ding ahihkeileh a lengla te mai ah lasa dingin sawl hi. Mary inzongh ‘ut keng e nu’ ci hi. A nu in banghang aa utlo hiamcih a hang tuamtuam kan masalo in a lengla te mai ah ‘Mary pen a maizum baih, mi a zahtak ngiat, a zahkai ngiat khat hi aa’ ci ziau hi. A lengla te a ciah khit ciangin Mary kiangah ‘nangpen mi om kei leh na kam huk zawhloh lengla om lehlah daicip pah na hih ciang a tua bang kongcih hi’ ci hi. Tua bangin naupangte maiah a mauthu i gente a sunglam ah tungpahpah hi.

Mary hong liat ciangin midangte maiah nuamsatak in a om nop hangin haksa sa mahmah ta hi. Banghanghiam cihleh a sunglam ah ‘kei pen mipi lak ah a maizum mahmah khat ka hihi’ cih theihna khat in khaktan hi. A kigen na sangin a siazaw dingin ki ngaihsun a hihman in lau semsem lai hi. Tuabangin a khantoh ciangin a mahpen mite lak ah a maizum baih mi in hong piangto pahlel hi.

Tuabangdan sunglam ki ngaihsutna, ki muanlohna te mitampi in nuntakpih to thei hi. A taktak in cileng tua bangte pen naupangthu a theilo nu leh pa leh hongcing hongkem mite tungpan i ngah gamh a hihi.

Naupangno Willy pen lungdam tak in kimawl hi. Tua laitak in ‘ki dawm in, na pheituam kisia leh kua’n hong leisak in, banghun ciangin pheituamthak nei kik dingcih Pasian bek in thei a himaw’ ki ci lian hi. Nitak an nek ding ciangin Willy in mohte a kuangsungah maitai tak in koih hi.

Tua laitak in ‘hi bangmoh ne nuam aa a nezolo gilkial aa om mitam pi om a hi maw, hoihtak!’ ki ci leuleu hi. Tuabek hilo in ‘na thadah leh tuabang dan hi ding nai ve’ ki ci thuahlai hi. Tua bangthu te hangin Willy pen launa leh kimuanlohna vive tawh hong khangto hi. Na khat peuhpeuh semding kipan leh a hoihkei khatam ci in ki muangzolo den hi.

Tuabang i genciangin naupangte a kizangtheilo ding, thu hong manloh nadingin thu hilhloh in koihpeuh in a ci i hi kei hi. A hizongin a ngaihsutna sungah zawnna leh haksatna tawh leitung kidim hi cih a kidim loh ding kisam hi. Leitungah a lawhcing thei mahmah lo mite thu a kikan kik ciangin tuabangin a neulai in a kipan tah mi a tam zaw a hihna kimu thei hi.

Mi a tamzaw te pen ciaptehtak i sak loh i neulai aa thu neuno khat in hong len gige hi. ‘Na lawngvet lo, pai khia, bangmah thei kei teh’ a kicih ciangin naupang sungaa semthei dingin a ki upnate bei pah hi.

Tuabang mite in bangmah theician lopi in a lawmte leh midang te kiangah ‘ken tua bang te hihthei peuhmah keng, kei siam keng’ na ci pah uh hi. A neulai aa a nu leh pa te ii ‘bangmah hihthei kei teh’ a cihmah a sungah um gige lel uh hi. A nu leh pa te in ‘semthei mahteh’ ci hileh tua naupang upna ki lamdang dingin na um hiam?

Tuni i hihna ciangpen a kipiangkhial hi peuhmahlo hi. A hiding bangmah in a kipiang ahihi. A zenzen in nu leh pa te in i neulai in ih sunglam ah gualzawhna leh lawhcinna ding thu hong koihsak thei hileh tuabangin i ki ngaihsun pah dingaa ih nuntakna sungah lawhcinna a ngahding i hipah hi. Ih sunglam aa i kimuhna, i ki ngaihsutna leh i ki upna bangin a taktak in a kipiangto ding hilel hi.

Ki lamdanna sungah

Nanglenang na utbangin piangthei ding cih ngaihsutna na sunglam ah hong om limlim nakleh hun a sawtlo in ki lamdanna na mu ding hi. Lai ngelh nuam mi khat na hih aa ‘laingelh siam hi keng cih’ na lungsim sungah a om leh na laingelh hoih zolo pah ding hi.

Na kimuanlohna in na gamtatna ah hong ki lak khia ding hi. Tuamahbangin laiat ding na ki pat ciangin laingelhsiam na hihna ki um in. A hoihpen in ka at theiding hi cih na ngaihsutna sungah om sak in. Na laiat hong kilamdang ding aa lai maikhat pan maikhat na dimsak toto thei ding hi. Tuabangin lungkialo in sem lecin dictionary tuamtuam te na lawm hong suak dingaa a sawtlo in na laibu a hawmkhia nuam publishers tampi tawh na kimu ding hi.

Nanglenang na ki muhna kikhel sak in. Na sunglam hatna leh pilna khat vei phonglo kik in. Semngamlo, ki pan ngamlo, pilna neilo, lelhding launa cihte beisak in. Na sungah a lawhcing mahmah mi in kimu den in. Na sunglamah tua thu te tam na tunsak semsem leh tua thu ii na nuntakna sungah a nasepdan zongh hong manlang semsem ding hi. Na sepkhat a kipan ding na hizongin sunglam ki muanna tawh kipan in.

Ki khelna a ut ciangbek hikei inla a kikhel mi hi ta in. Ki lamdanna sungah gamtang khia in. Hih thulu tawh i genna ah nangpen a lawhcing mahmah mi, lai at siam mi, lim suai siam mi, a minthang musician ahihkei leh na ut bangbang na hihi.

A zom ah tu ni na dinmun pan in na lungtupna ah koici bangin olno takin na ihmut kawmsa in tungthei ding cih i gen lai ding hi. A ki ciangtanlo na sunglamtha leh pilna tawh koici nasep ding cih na thei ding hi. Nanglenang na ki theihna sangin a lianzawtham hatna khat in na ihmut laitak in hong makaihna na mu ding hi.

Nu leh pa te theihsakna

Naupang tawh a om nu leh pa te aw hehpihna tak tawh na naupangte kiangah na genthu ki dawm un ci in kong gen nuam hi. Na thei aa na thei keizongin na tate nuntakna singsuih bangin a suisui na hi uh hi. A maute mailam nuntak nading a neulaitak in a bawlbawl na hiaa na suihbangin hong piangding uh hi.

‘Nangbel nikhat niteh thong sung tunglel niteh, mi hoih suak ngiat kei ni teh, na gamtat hoih thei ngiatkei’ cih te a hizongin na tate in khialhna khat peuhpeuh hong bawl ciangin na kamtawh gen kha kei in. Tua bangthu te a sungah a kidim khak nakleh a taktak in zui pah ding a hihmanin ki dawm in hong ci ka hihi.

Naupangte in a neu lai in a nu leh pa te cih bangbang um pahpah hi. ‘You are bad’, ‘na hoihna om kei’, a kicih ciangin naupangin umpah aa tua kammal a takpi ahih nadingin hanciam hi. A ki khel theihna ding deihna tawh i zatkammal te ‘mi hoihlo, mi hai,thadah, etc.,’, cih te in hoihsak lozaw in a sungtawngah khaici bangin kituh hi. Tua a sunglam khaici bangin gah hong nei ding a hi uh hi. ‘A thumanglo ka tate bang ci bangin mihoih hi

ki ci thei ding hiam?’ ci nuamkha ding hiteh. Ahizongin kammal hoihlo zangselo in a pilna ding hilhtheihna ding lamtampi om lai hi cih thei in.

‘Ka ta mipil, tua bangdan te sem kei in’ kici thei hi. Na sawlna khat peuhpeuh haksa sa in a hihkei leh thadah in a sepnoploh ciangin ‘hi bang nasepte zo lecin milian, makai hoih na suak ding aa mithupi in hong kiciamteh ding hi. Hihpen na kipatna ding aive’ cih bangin na gen thei hi. Nitak nasepna pan i ciah ciangin ki tawl mahmah a hihmanin ih tate i deihbangin na om kei leh ki hehsuak mah hi. Ahizongin tua hunlaitak pen nu leh pa te i ki kep ding a kisam pen hun a hihi. Na lutang natna hangin, na tawlna hangin na tate susia kei in ci in hong gen nuam ka hihi.

Na tate pen Pasian hong piak letsong te lakah a manpha penpen hiaa na cin na kep ding pen na sepding tavuan lianpen ahihi. Ta na neih ciangin na khutsungah tungman bangin na deih bangbangin a bawlthei na hita hi. Thu a theihcian nailoh hunlai laitak in kum 20 a phakding dongaa a gamtat danding a sungah na koih khin hi. Mipawl khat te in a tate ii gamtat hoihlo pen a veng te gawh thei mawk uh hi. Midang khat peuhpeuh hang hi ci nuam uh hi.

Tua hiaa tate tungah bang kammalte pulak ding cih theihna pen nu leh pa te pilna a hihi. A diakdiak in na tate ii zakna aa na pau kammal te ki dawm in.

Papi khat in ‘ka ta in hong zahtak kei’ ci in lungkimlo hi. Tua papi pa pen a zitawh a ki tot sim in a zi in ‘ki manna khat zongh nei kei teh’, ‘thadah, kampi bek’ ci in zahpih hi. Tuapen a tate in a pa a zahtakna kiam sak dingin na um hiam? Kiam sak mah hi.

A pa in a zi kiangah tuabangin zahpih leh a tate in a nu zongh zahtak thei tuanlo ding hi. Kammal ki lawmlo, zuu dawn zatep, ki tot kisel nate na tate muhna ah zangh kei in. Tua hikei leh na deihloh tua gamtatna te na tate tungah hong kilawh ding hi.

Na innkuansung a nuam in na makaih theihna pen leitungah gualzawhna lianpen khat a hihi. Naupangte a neulai mahin a hoihlo ngaihsutna te paihkhiatsak in a hoih ngaihsutna a sunglam ah kidimsak hileng hong liatciangin a cidam, a hau, a pil mite hong suak ding hi. A piangdingin a sunglam ah lim koihsak khin na hihman a hihi.

Hih chapter pen nu leh pa te leh mailamah nu leh pa a suakding mikhempeuh a’dingin thupi dingin ka um hi. Hi bangin a gamta nu leh pa te pen a pil, a siam nu leh pa suak ding hi. Midangte kiangah hihthute na gensawn in. Tua hileh mi tampi in a nuntakna uh nopsak lawh ding hi. Na sungtawng aa om thu bangin a piangkhia na hihi cih thu na tel ta ding hi.

Na ciapteh ding thu khat ah: A beisa hun in bangcibangin na kimu phialzongin tuni pan kipan na lungsim puakzia na khelna tawh a nuamzaw nuntakna sungah kalsuan in. Nitak na lup ciangin na mailam aa na piannopdan lungngaisa in lum in. A kilamdang nuam mi hi kei inla a kilamdang khin mi bangin kimu in.

A zom na sim ma in hih chapter khat vei na sim lai nuam hiam? Na ngaihsut bangin a piang na hihlam na lungsim sungah kiptak in khuam bangin khosak in. Na nuntakna hong kilamdang lai ding hi. Ih Mutna leh Hauhna