Myanmar, Tanintharyi khuapi Myeik leh Bangkok kikal Direct vanleng kilengsak tading

Myanmar, Tanintharyi khuapi Myeik leh Bangkok kikal Direct vanleng kilengsak tading

New Gen Airways kici vanleng Company te’n Myanmar, Myeik City leh Thailand, Bangkok City kikal Direct in vanleng lengsakding uh cih MMTimes pan kiza hi. “New Gen Airways” pen Thailand, Banglok-based Airline khat hi a, Tun Htaik Tin Company te vaihawmpihna tawh hihbangin Myeik leh Bangkok (Myanmar leh Thailand) kikal Direct in alengtheiding ahihi.

New Gen Airways panin Country Manager asemlaitak ahi U Thar Du in Myeik leh Bangkok kikal vanlengpen hongtungding Friday ni akipan kilengsak tading hi ci’n genkhia hi.

Abeisa akipan tuciang dongmah Tanintharyi Region sung aomte Thailand ahawhnop uhciangin Yangon paimasak kulsese hi. Tuabangin Tanintharyi Region sungpanin Yangon kitungtophot a, tuakhit ciangin Yangon pan Bangkok ah kilengkik leuleu hi.

Tuabangin Yangon paitektek akulloding in Tanintharyi Region sung aom Passenger te’n ki lunggulh mahmah a, Bangkok leh Myeik kikal vanlengtawh Direct in lentheihziau dingpen ngetna tammahmah hi.

Myeik City pen gamdangmi khualzin te ii alunglut theihding “Major Tourism Destination” khat apiangtheiding in lametna tammahmah hi. Tuahangin Myeik leh Bangkok kikal vanlengtawh Direct in lentheih nadingin aki vaihawmta ahihi ci’n Country Manager in genbeh hi.

New Gen Airways te’n Myeik leh Bangkok kikalpen kalkhatin 3 veita lengsakding uh a, Boeing 737-400s vanlengte zangding uhhi. Boeing 737-400s vanlengte khatciangin Passenger mi 150 ciang atuangthei ahihi.

Vanlengsaap pen mikhat ciangin Return Ticket US$180 (K240,840) hiding hi ci’n U Thar Du in genkhia hi.

Tanintharyi’s Hotel and Tourism Department te pulakna ah abeisa 2017 kumsung in Tanintharyi sungah khualzin alutpen mi 350,000 bang pha ci uh a, tualak ah atamzaw pen Thailand pan kici hi.

Tanintharyi Region sungtengah tuikulh Island ahoihnono tampi omin, tuaban ah taangtawngpek panin akilam tattung “Ancient Pagoda” tampizong om ahih manin, gamdangmi te bekthamlo, Myanmar gamsung aom Local Traveller te ngiatinzong ahawhnop mahmahna munkhat ahihi. Dawei, Myeik, Kawthaung cihtepen tunailam ciangin ki lunglut semsem hi.

Tuaban ah Tanintharyi Region sung aom sumnei te’n zato vai, sangvai “Medical Treatment, Education” cihtepen Bangkok khuapimah kizuan tangtang hi. Hihbangin Myeik leh Bangkok kikal Direct in vanleng aomtheihpen Tanintharyi Region sungmahmahzong tampi khantohna omtuamding in ki lamen cih kiza hi.

More: Myanmar, Myeik khuasung aom KBZ Bank ah thautawh damiah kitaih

Atunga Photo pen Myeik huamsung aom Nyaunng Oo Phee Insland kici hi. Tanintharyi Region sungah tuikulh Island munhoih tampitak om hi. Tourism khangto semsem hileh tua Island tepen Malaysia gamsung aom Langkawi, Thailand gamsung aom Ko Samui, Phuket cihte zahin gamdangmi khualzin te’n lunggulh mahmahding uhhi. Sawltak #zomidaily