Myanmar Refugee khatin Australia Bank khat meitawh hal, mi 26 liam

Myanmar Refugee khatin Australia Bank khat meitawh hal, mi 26 liam

Australia gamsung aom Bank khat meitawh kihal ahih manin mi 26 liam cih AFP pan kizasawn hi. Zanni Friday (18 November) ni thupiang hi a, ageipan amukha khat ii genna ah mei akat ciangin agin ngaihkhia mahmahkhat kaza ci a, tuaban ah naupang te kap in ku ngeingai cihi.

Hih meikatna Bank pen Melbourne, Springvale vengsung aom Commonwealth Bank te ii Branch khat ahihi. Police te genna ah tua Bank pen mikhat in ahal hi a, datsi hiam akuangthei bungkhattawh tawi in tuabuak in ahal hiding ci uhhi.

Meikat akitheih ciangin meiphelh te ki zasakpah a, Bank sungah akang ahih manin huihdikna tawh alu tuamsa in lutsukpah uh cihi. Bank sungah meikuang leh meikhu vive tawh kidim himahleh asung aomteng honkhiathei uhhi.

Paramedics te genna ah aliam lakpan in mi 6 tepen huaisiapian mahmah ci a, tua aliamte lakah khatpa pen mei ahalpa hiding in ki ummawh hi. Palik te’nzong tuapa pen limcin mahmah uhhi.

Hih meihalpa pen akikan ciangin Kawlgammi “Myanmar” khat hiding cimawk uh a, Australia gamsung ah Asylum Seeker khat hiding cimawk uhhi.

Herald Sun thuthang te gennna ah hihpa pen Christmas Island Detention Center pan Australia gamsung alut Refugee khat hiding in ki ummawh ci’n pulakkhia uhhi. Abeisa Labor Government te uksung 2013 kumsung in Christmas Island panin Bridging Visa tawh Australia ah alut hiding kici hi. Tuahunlai in Asylum Seekers tepen limtak sitcianna kibawllo in kilutsak cihzong gen uhhi.

Kawlgammi cihciangbek kigenkhia phot a, bangminam cih kitheician nailo hi. ZD Sawltak #zomidaily