Mun maan

Mun maan

A masa in, “buaina bel a om thei zelzel mah hi-a, ahi zongin i buaina pawlkhatte pen i omna mun (i mun) a maan loh hang hi gige hi,” cih ki phawksak masa nuam hang.

Gam leh minam sung, khua leh tui sung, Pawlpi sung leh Innkuan sungah i buaina pawlkhatte pen ei mun dingah om loin, ei mun ding ahi lo munkhat ah va om, va sem in thu i va neih khak luat ciangin buaina hong om ahi hi. Hih mun pen kei sep/om nading mun mah hiam, Pasian in hih munah hong koih takpi mah hiam cih, guh leh taang pailet a hong mu Pasian’ mai-ah ei-le-ei i kisittel ngam ding kisam hi.

Min deih, za’ deih man leh ang sung ding bek ngaihsutna tawh ei mun ding ahi lo pi khat ah om kha kei ni. Ei ut thu peuh tawh Pasian in hong sam, peuh cimawkmawk kei ni. A zuau lo (a thuman) Pasian in i hihna khempeuh hong tel sinsen a, i hihna bangbang tawh thu hong khen ding zong, i khem theih/zawh mihingte hi loin, hong tel sinsen Pasian mah ahi hi.

Ei thu neihna ding mun leh ei panmun laakna ding mun tel loin ei mun lo ding teng i va sai khak (i va om khak) leh buaina lianpi hong piang dinga, tua buaina nungah a mulkimhuai gentheihna tuamtuam in hong zui kha ding hi. Pasian’ hong koih takpi, hong sap takpi ahih leh bel buaina tuamtuam a om phial zongin amah mahin hong zawhpih toto ding cih bel um ngam ni.

An leh mehte dailenbuk sungah om leh kilawm hetlo a, zun leh ekte zong annekna sabuai tungah hong om leh kilawm hetlo hi. A kisawp siang sitset khin lutung pana hong kiasuk samzang pen meh lak, anlak khawngah hong om leh kikih veve hi. An nekna sabuai tungah zun leh ek khawng kikoih ngeilo a, dailen buk sungah zong an leh mehte kikoih ngeilo hi.

Ahang pen amau mun hilo hi. Amau mun lopi-ah koihkha ahih kei leh amau mun lopi ah hong om kha le uh etlawm lo bek tham loin kikih mah mah dinga, kine nuamlo/ngamlo ding hi. I buaina pawlkhatte leh i lawhcin theih lohna pawlkhatte pen i omna mun a maan loh hang na hi gige hi. (Kisit phakik ni).

I omna mun maan peuh leh dongkholh hong kisa khollo a, maipha kingah zaw hi. Tua ahih manin, “MUN MAAN” a telsiam ding leh ei mun mahah a om thei dingin mimal kim Topa’n thupha hong pia ta hen. Amen! Ngaihsutna kiukhat pan, Khris sungah, David Tuang