Mopawi thupi pen kibawl nailo ~ Hau Za Cin

Mopawi thupi pen kibawl nailo ~ Hau Za Cin

Princess Diana mopawi mihing million khat in leitung kiuli pan TV ah en kici a, thupi kisa mahmah hi. Amau hun lai in. Ahi zongin thupi nailo hi. US President Bill Clinton tanu Chelsea mopawi ah million 4 val bei a, a mopawi bawlna ding zong khua kisattawm cih bang phial in thupi a, a kim a kiang siangthosak in, vantungah vanleng a len ding nangawn kham bikbek in a ging, a bil-am ding omsak lo uh hi. Tunai mopawi dingin a thupi pen hi a, thupi veve mawk hi. Ahi zongin a thupi pen hi nailo hi.

Nidang laiin mopawi ah sial leh bawng, kel leh ak, etc kigo ciin; gan tuazah go cih khawng kithangsak mahmah hi. A thupi ding bang napi thupilo hi. Mopawi ah khuazang in mipi in uap hi cih khawng kiza a, inn tawmno cik omna khua khawng hi thilthel lel ahih manin thupilo hi. Sum tampi bei ciin ‘tam’ i sak pen tawmlai mahmah hi. Thupi mahmah ciin thupi i sakpen thupi nai hetlo hi. Mopawi ah van tampi keng, tua keng, tua keng, tua keng, tua keng… kici in a ken i theih teng a keng takpi hi in a thupi i sak leh thupi hethetlo hi.

Van ken cih khawng a mawkna hi a, a taktak ken ding thupizaw hi. Paktheh naupang melhoih kizang ci in melhoih i cih pen melhoih taktak zo nailo hi. A tua hun in a hoih a bat hang a melhoih hi nai sai lo hi. A tuate sanga zong a melhoihzaw omlua na himawk hi. Mawtaw tam, mipi tam, nek leh dawn tam cih bangin a list kibawl suk neunau a, tuate na thupi hetlo hi. Mopawi ah sumbei tuazah pha hi, hotel hoihpen ah kibawl hi, mawtaw hoih kisap hi kici a, a mawknapi hi; a thupina om kikeuhlo hi. Huihnung bang hi a, lengmang lel a, kuamah in phawk nawnlo hi. Kuamah in ciamteh lo a kuamah in thupisalo hi.

A taktakin cileng, na theih nai keileh ciamteh in: mopawi thupi pen kibawl nailo hi. Mopawi thupi penpen a kibawl ciang mi khempeuh in lungdamin lasa dinga, mi khempeuh lungdam in kiko ding hi. Gan tam gawh tawh a thupina kitehlo dinga, sum tam zat tawh a thupina kitehlo ding hi. Mipi tam uapna tawh kitehlo dinga, nek leh dawn kicinna tawh kitehlo ding hi. Mopuan leh mo vanken tawh kitehlo dinga, ‘itna’ bek tawh kiteh ding hi. Tua itna luangkhia mi khempeuh in ngah dinga, na kihel a na kihel nuam kei zongin nang zong hong kipia ding hi. Na uap, na uap kei zongin hong peello dinga, na uploh zah dongin lamdang nasa ding hi.

Mopawi hun ding kigenkhol paklo dinga, a hun ding ciangin a theilo omlo zah dongin leitung zeel ding hi. Leitung mi khempeuh in TV pan en thei dinga, a ut uh leh amau mahmah a mun ah kihel dingin kicial ding hi. A pai man amau a kisik bel kul kha ve! Kuamah mopawi sim man ding kipiaksak cih kiphallo dinga, mi khempeuh in ama pai man a kisik kul ding hi. A pai utlote bel amau thu hi dinga, a pai ut uh leh kiniallo ding hi. Tua mopawi thupi ding dan bel… kong cial khak kei leh zong na theih nak leh nang hong cialsawnte kiang pan na za inla, mopawi ah hong kihel teitei in. Ka nu leh pa ka pawlpi mi, ka siapa leh ka lawmte in hong cialkha lo maithei a; nang nu leh pa, na pawlpi leh na siate in nang hong cialkha zaw thei hi; cialna kibang hi ciin na sang inla, na umpah lel in. Don’t miss the mopawi thupi pen.

Hih mopawi thupi pen a saite vai tuamtuam gel in kipan khin a, a man peuhpeuh uh ciang mopawi hong sam ding uh hi. Annek ding, giahna ding, kisilna ding, lasakna ding, letphuai piakna ding cihte a vek in hong gel ding uh i lamen hi. Nang bang letphuai na keng dia? Nang? Nang? Nang? Lianlua omlo, neulua omlo ding hi. A lian theithei kideih a, a neu lua zong kisang veve hi. Na piak ciang nang lungsim ah lungdamzah kibanglo ding hi, tua manin a lian lam hong hanciam zaw in. Mopawi ahih manin puanpak leh siangtho lamsang hong silh inla, anne suak dingin kigingkhol in. Mopawi sim khempeuh mopipa tawh ankuang umkhawm dinga, nang zong na kihel leh ankuang um khawm kha ding hiteh. Tua manin ann gilvahlua in hong ne kei in.

Mopawi pen a hun leh ni hong kizasak dinga, nang theihloh in kibawlsim lo ding hi. Nang zong na ut leh kithawi khol in. Na puan sawp in, na khedap thak ding lei in, na puan thak ding lei in, na van piak ding letphuai zong leisa in koih in. Na theih bek tak leh a zinkhia thei pah dingin kigingkhol in. Amun ding kigen thei nai kei – Murlen hi thei, Malaysia hi thei, USA hithei, Kawlpi hi thei, Beijing hi thei, Haiti hi thei, Korea zong hithei. Leitung koi mun peuh hi thei hi. Na kihel theih ding leh mopipa lungdam penpen ding hi. Khatvei ciamteh kik in: mopawi thupi pen kibawl nailo hi! Hau Za Cin (Phuitong Liim)