India ah mopawi siimdingin apai Truck mawtawpi khat tuahsia in mi 21 si, 21 liam

India ah mopawi siimdingin apai Truck mawtawpi khat tuahsia in mi 21 si, 21 liam

India gamsung ah mopawi siimdingin apailaitak Truck mawtawpi khat tuahsia in mi 21 takin sihlawh cih AFP pan kiza leuleu hi. Police te’n Wednesday ni in a genkhiatna ah mopawi siimding in mawtaw sungah gualnuam in ciakngeingai in aomlaitak un mawtaw atuahsia cihi.

Tua Truck mawtawpi sungah Passenger bekbek mi 40 valbang atuangkhawm uh ahihi. Central Madhya Pradesh State sungah Tuesday nitaklam in apailaitak lamkendang ah adalna Protective Railing nawksuk in kendang luisung ah kiasuk hi.

Akiatsukna pen Meter 20 bang athuksuk hi a, tua kendang ah akiatsuk ciangin anuai ah tui akeucip luitaw ah ki densukna cihi.

Sidhi District aom Police te genkhiatna ah hih tuahsiatna hangin mi 21 bang liam uh a, tua aliamte zong nakliamthei mahmah uhhi. Hih tuahsiatna pen State Capital ahi Bhopal City panin tai 350 Miles (560 km) bang agamlatna ah atuahsia ahihi ci’n genkhia uhhi.

Local Police Officer Vishal Sharma in agenkhiatna ah hih tuahsiatna apian ciangin Police leh Emergency Services honkhat in amanlangin aphual ah delhpah ngeingai uh cihi.

Hih Truck mawtawpi pen atuahsiatna ahang akician in ki genkhiathei nailo a, ahi zongin Driver in hat hawllua, Speeding hangin atuahsia hiding kici hi.

WHO (World Health Organization) te genkhiatna ah India pen leitung ah lampi tuahsiatna hangin misi atampepen “world’s deadliest roads” in aciapteh gamkhat hi a, kumsim in mi 200,000 bangin sihlawhden uh cihi.

Nungkal mahmah inzong India, Northern Himachal Pradesh State sungah School Bus khat kendang pan lengkhia in, mi 30 takin sihlawh uhhi. Tua asi te lakah mi 27 pen sangnaupang School Children vive ahi uhhi.

Tuazawh azingciang inzong Western India aom Highway lamzikpi tungah nasemte apua Truck mawtawpi khat ki lumlet in, nasem Labourer mi 18 takin sihlawh leuleu uhhi.

More: Mandalay Region sungah lampitung tuahsiatna Road Accident tam mahmahlai

India gamsung ah tuahsiatna atamzaw pen lamzikpi hoihlohna, mawtaw te hoihtak aki puahlohna leh mawtawhawl te’n ginatak in hawllo, Reckless Driving hangin tuahsiatna apiang kici hi. Sawltak #zomidaily