Mizogam Zomite ~ Rev. Gin Khan Nang

Mizogam Zomite ~ Rev. Gin Khan Nang

Zomite bang hunin Mizogam kilut a, kuate lut masa hiam cih pen theih hakpi khat suak ta hi. J. Thang Lian Pau (Zolawkta) in “Pu leh Pate Phuhsa Gam” a cihna sungah 1899 hun pawlin Kam Za Mang in Songtal khua panin Mimbung na lut a, tua khit 1910 hun ciangin Sing Vung Hauzel makaihna tawh Teikhang, Kawlbeem, Selam cihte kisat hi ci-in gen hi. 1920 khit ciangin Tungzang panin hon khat na lut hi. Teikhang hausate in Hiangmun gam pia-in khua na sat uh a, tu dongin Hiangmun khua-ah om suak ahi hi.

Pu Liangkhai gen danin Zomite pen Liandote unau sung pana piang hi a, Liando leh Thangho suante lak panin Khan Thuam thupi pen hi. 1870 kim pawl akipanin Khan Thuam in Tedim gamah ukpi sem hi. A tate Kam Hau, tua khit ciangin Khaw Cin Zam in uk hi. A tupa Hau Cin Khup Tonzangah ukpi in om a a minthang pen ahi hi. Khan Thuam ta upa zaw Zapau leh a tate in Mualbeemah ukpi sem uh hi ci-in gen hi.

Hih hun lai-in Sailo ukpite leh Sukte ukpite (Zogam ukte Sukte beh ahih manun Sukte mi kici hi) in kiciamna na bawl uh a, “Gun tui a leh luan a, Vamim mei in tongkhat a phak kei buang leh, kuamah kido lo ding hi hang” ci-in kiciamna bawl uh hi. Ahi zongin Champhai a Vanhnuailian in hausa a sep laitakin zan khat thu-in a inn kihalsak hi. A zinte uh Liankham kici in a halte pen “Sukte-te hi” ci-in ngawh hi.

Tua hun lai-in Sukte-te in gal a sim uh ciangin inn hal masa zel uh hih tuak hi. Tua ahih manin Sukte-te in hong do hi ci-in ngawh a, a zing ciangin pasalte sawlin Lentaang sak lama Sukte om na muh peuhpeuh uh va that un ci-in sawl hi. Pasalte zong kuan pah uh hi. A nung ciangin Vanhnuailian kisik kik a, samkik sak hi. Ahi zongin a phak zawh loh uh pasal nga Zabiak makaihna tawh paisuak uh hi.

Lentaang a khen khit uh ciangin Sukte mi khualzin ding tawh kituak uh a, kisatpah uh hi. Sukte-te in zo a, thau nih laksakin, mi khat that uh hi. Tua bangin Sailo-te in a do ciangin Ukpipa in “Gun tui leh luan ta a, Vamim mei tong khat pha ta hi’n teh maw” cihsan hi kici hi. Tua hun khit ciangin Khuanglengah Thanhrang in hausa a sep laitakin Zapau makaihna tawh a sim dingin kuan uh hi. Thanghrang leh Lalburh in Tuirial a Kalate sim dingin pasal teng a kuanpih laitak hi a, Khuangleng khua-ah mi tawm bek om hi.

Mi a muh peuhpeuh uh that uh a, kimkhat phial thatin, Thanhrang zi leh tate matsak hi. Thanhrang leh Lalburh a ciah uh ciangin a khuate uh kuamah na om nawn loin, a zi leh tate na kiman khin ahih manin Thanhrang lungleng khasia-in kap ngeuneu a, la phuak liang hi. Kim khatte kitankik a, a kitankik lo a om suak tampi om hi kici hi. Tua khit ciangin Zatual makaihna tawh Diltlang sim leuleu uh a, a tun’ma deuhun a khua kang ahih manin mi taimang khin a, tawm thatin, tawm mat nei uh hi.

Hih thute hangin Champhai pan Chhingchhip khua dong kisamin Sukte gam sim dingin kiciam uh a, Sukte hausa Thuam Thawng va sim uh hi. Thuam Thawng in na za masa ahih manin lampi-ah na panga, Lusei lam makaipi Lallianhlut kaplum uh hi. Lusei lamte zong lau-in lehtai uh a, sim zo lo uh hi. Kum 1872 kumin Sukte pawl in Champhai va sim leuleu uh hi. Mikang kumpi a khan laitak hi a, galcing na kikoih uh ahih manin deih bangin zo lo uh hi. Lusei lam zong si a, Sukte lam zong si a, kizo om tuan loin Sukte lam ciahkik uh hi.

A ciah ni mahun Mikang galkapte Champhai lut a, uk suakta uh hi. Tua kum mahin Champhai zang panin Chawnchhim kici tu-a a omna munah kituahto uh hi. Mikang kumpi in a uk ciangin kidona om nawn lo hi. 1920 pawlin Mualnuam panin Vapar kisat hi. Hnahlan hausa Saithuam in zineu Ngaikang a neih ciangin a zipi tawh kilem lo a, Lungpizawl kici Murlen khua 1931 kumin sat a, hausa sem hi. Vapar a om eimite zong Murlenah kisuan to uh hi.

Murlen a omte pen Mualnuam, Keizang leh Thalmual mi hi. Tua hun pawl mahin Mualnuam panin mi tawmkhat Chhungte na lut a, Mizogam buai ciangin Champhai-ah kigawm hi. Ngaizawl pen Tuitawh leh Kapteel khua mi hi deuh a, Ngur khua pen Mualnuam leh Keizang mi hi deuh hi. Leisenzo leh Sesih pen Mualbeem leh a kim pana pai hi. Hnahlan leh Vaikhawtlang pen a gal khua, Selbung, Tuimui, Tuimang, leh Bapi, Darkhai leh a kim khuate hi deuh hi.

Kum 1937 kumin Kelkang khua-ah khanlawhna thupi takin tung hi. Tua hun lai-in Kelkang pen inn 180 hi a, mihing 400 bang pha hi. A kimkhat Lawki hi lai hi. Khanlawhna hangin mi tampi in Pasian tungah lungdam kohna-in gan goin pawi bawl hi. Tua banga gan pia mi 26 om a, amau lakah mi nih “Pasina” leh “Hnawkzama” cih om hi. Hihte geel pen Zomi hi ngeel ding hi. Pasina pen Pa Cin hi dinga, Hnawkzama pen Nok Zam cihna hi ngel ding hi. Vok khat tuak pia uh hi. Hih Kelkang khanlawhna-ah Zomi zong kihel hi cih kithei hi.

Kumpi in a mat gawp ciangin pawl khat Leisenzo leh Khuanglengah tai hi. Pu Son Lang (Leisenzo) zong Kelkang khanlawhna pana piangthak hi kha thei ding hi. Pu Son Lang in eimite omna khua tengah vak kawikawi-in Pasian thu tangko hi. Pu Son Lang thugenzia pen “Pasian thu na um un” cih ahi hi. “Bang ci up ding ka hi uh hiam?” a cih uh ciangin “Um suk peuh le-uh cin hi mai” cih tawh dawng zel hi kici hi. A gente in zong a gen dan ding thei lo, a sang dingte in zong a san dan ding thei lo hi. Tua banga a kipattah Zomite ihi hi.

Murlen khua-ah 1942 kumin Pawlpi kiphut hi. Ka naupan’ lai (1955-56?) pawlin khanlawhna tunga, limna, laamna, pau theih loh cihte nakpi-in tung hi. Tua hun laia makaite pen Lut Gin, Vai Za Dal, Gin Khaw Hau, Sian Zam, Cin Khual, Damsawm cih bang ahi hi uh hi. A lamdang khat pen Cin Khual in lai gelh thei hi. Amah lai mal khat zong a thei lo, sangkah ngei vet lo, lai cih zong a thei ngei lo hi napi-in Kha pan a ngah ci-in sing tawn khat sat pekin tua tungah lai gelh a, a inn tual kong tungah suang hi.

“Gate” bangin bawl a, a lai gelh pen gate banner danin kisuang hi. Amah bek in sim thei a, a khiatna zong amah bek in thei hi kici hi. Tua lai pen kikemcing kha hi leh tuhun ciangin ciamteh huai mahmah suak ding hi. Pau Cin Hau lai tawh a kibang hiam, ahih kei leh tu lai Mikang lai tawh a kinai zaw hiam cih ahi zongin kikan thei ding hi. A it huai zia kiphawk kha nai lo ahih manin a mangthang hi mawk hi.

Lut Gin pen khatvei Zeisu bangin kibawl a, a kong tualah singlamteh phutin singlamteh tungah guak tangin kikhai sawm hi. Tua khit ciangin lakhia kik uh a, inn sungah tui siangtho kitheh ci-in tui tawh kisil a, sianthona tangsak uh hi. Ka ciamteh theih dang khat pen, Pi Gin Zel (Rev. Suan Khan Thang’ pi ) ahi hi. Amah “Milim (khami)” kici a, piteek ahih hangin nisimin khua sungah lo kuan zo lo, cina a om, inn ngakte vehin thunget sak den hi. Tua hun lai-in cinate sim loh buang inn om loin lo kuan khin zel hi.

Dam lo teng innah om uh a, khua sungah sunin mi muh ding tam lo hi. Cidam napi a lo kuan lo-a inn a omte pen “Thadah” kici hi. Pi Zel pen “Tui khumbawl thei hi” kici hi. Keupum (Um keu a kibawl) tawh tui suakin, a tungah a khut pekte geel nuainuai hi. Hun ta inteh a cih ciangin cinate dawnsak a, a tui pen khum hi ci se uh hi. Tui a dawnsak khit ciangin thungetsak a, cinate dam thei hi ci uh hi. Tua hun lai-in mite’n a thusim khol loh hangin ama nasepna Pasian in thupha pia a, Murlen khua mi hih bangin hong lamto hi kha ding hi. Tua hun lai pek a thungen damsakna nei om cih pen thupi kasa mahmah hi.

Kum 1960 pawl ciangin Mizogamah pianthakna thu hong lut a, kha mangthang mat nopna hong piang hi. Tua ciangin eimi Khristian a suak nai lote veina kinei a, khua ciatah hanciamna kinei hi. Ngur khua-ah Dam Go pen piangthak masa pawl hi a, Presbyterian Pawlpi in eimi sunga Sawltak sem dingin 1966 kumin hong laksak hi. Murlen-ah Thang Sian Gin a khut thau tawh kikap kha a, a dam ciangin nasem thei tuan lo hi. A dam loh sung khempeuh Lai Siangtho sim den a, tua panin kikhelna nei hi.

A dam ciangin Aizawlah pai-in Synod Mission Secretary Rev. V.L. Zaithang kiangah tungin Sawltak ngen hi. Ei mite kiniam diak ahih manin ei sunga sem ding eimi mah kisam hi kici hi. Tua banga a nget ciangin amah la lo-in Champhai Pastor deihna bangin Ngur khua Dam Go Sawltak dingin la uh hi. Ei leh ei “kiveina” nei ta cihna hi. Mi dangte hong veina sangin ei i kivei ciangin khua kimu zaw hi.

Murlen khua panin 1964 kumin Upa Khai Lian Nang makaihna tawh khangno nga khawng in Hnahlan khua kianga om Lailiphai khua-ah Pasian thugen dingin ka pai uh hi. Ei mite pen khuang tum lo, solfa key tawh dai takin kikhawm uh a, ei pau zangin ei la (Tedim la) sa uh a, “thing” ka sa mahmah uh hi. Tu’n ka theih kik ciangin, amau khua na mu zaw-in Kawlgam a eimi Tuiphum Pawlpi tawh a kizom na hi gige mawk hi. Upa Khai Lian Nang in hun zanga ko a zuite in bangmah ka hih thei kei uh hi. Ahi zongin Pasian min a “eimite veina” tawh a kipai ahi hi. Sani ni tungin Nipi khit teh ka ciahkik pah uh hi.

Khatvei, Murlen om lai-in Lamka panin papi nih hong pai a, papi lukang khat in Biakinnah thu gen hi. Tua pen Tangnuam a Upa H.K.Tawtak na hi gige hi. Upa Gin Za Kap tawh CBA din’ tung lama hong pai hih tuak hi. Tua hun lai-in kikawmna lampi haksa a, khualzin zong haksa hi. Tua bang kawmkalah Mizogam Zomite itna leh khualna hangin hong pai vingveng uh hi. Tua hun lai pek a ei pau tawh Pasian phat ding lam hong lakte lunggulhna pen tuhun ciangin a kimu panpan ahihna ka phawk hi. Hih ciang I tun theihna pen tua hun pek akipan makaite sepna hang hi ci-in ka ngaihsun hi.

1963-66 sung Murlenah Sangsia ka sep sungin Aiduzawl Rev.Pathiau bialah ki om hi. Kum khat Hmarchhak Presbytery khoppi Hnahlanah tunga, ka U Gin Za Go makaihna tawh lapawl ka pai uh a, action tawh la (Tedim kam tawh) khat ka vasa uh hi. Tua hun lai-in Hnahlan Vengthlang Pawlpi om nai lo hi. Aiduzawl “Bial Thalai Khawmpui” ci-in Murlenah khat vei hong tunga, tua lai-ah kei zong Assistant Secretary dingin hong kiteel cing hi.

Ahi zongin sem man loin gambuai in hong lap ahih manin kitaisan hi. Gam buai in hong lap kei leh zong Mizogam eimite in ei leh ei kiveina a kinei ta hi. Biakna lamah I khanlawh ciangin I minam, I pau leh I ngeinate itna kinei bek hi cih kithei hi. Ngaizawl khua pen eimi sungah RC lut masakna hi.

Tu-in Ngaizawl khua pan Father/Brother kici Pasian nasem 4-5 bang om ta hi. Khua mu pawl suak ding hi. Sialkal tangah EBC Pawlpi kum 1965 khit ciangin na lut hi. Kikawmna haksat manin thukizakna om lo hi. Mizogam buai khit ciangin biakna hangin sak leh khanga om eimite kithei-in, thu kiza tuahin, kikawm tuahin a om thei i hi hi. Biakna mah in minam hong gawmin, hong ki-itsak hi. Biakna-ah pumkhat thei hi lehang leitung vai-ah zong tu-a sangin nakpi takin kithutuak zaw lai ding hi hang ci-in ka mu hi. Hih pen Mizogam buaima (1966) tangthu ka theih dana kong gelh ahi hi. Mizogam Zomite Topa in thupha hong pia ta hen. Rev. Gin Khan Nang