Mittawte’ Khua ~ Zomi Quavadis

Mittawte’ Khua ~ Zomi Quavadis

Tuni ciang dong ka mangngilh theih het loh tangthu khat om hi. Tua tangthu pen midangte aa dingin bangmapi hikei phial taleh kei aa dingin manpha in khum zungzung a, Laisiangtho zah ahihsam loh hangin ka nuntakna ah ka paina ding lampi meivak bangin hong taan hi. Tua tangthu thulu pen “Mittawte’ Khua “ hi.

Nidanglai in tangval khat gam a vaak leh gamla tung lua ahihmanin a ciahna ding lampi thei nawn lo in gam mang hi. A vakvak leh nikhat khuaneu khat va tung hi. Tualai ah amah zong tawlnga in, a sawtna ciangin ciahna ding lampi thei tuan lo ahihman in omsuak dingin khensat hi. Kamsiatna ih cidiam tua khuasunga teeng mite lakah mittaw lo khat zong om lo hi.

Amah bek khuamu thei hong suak hi. Ahizongin amah sangin mittawte’n mun leh gam tel zaw uh a, na khempeuh amah sangin theizaw mawk uh hi. Tuithe, pengpelep leh kauphe cihte aben khop uh ciangin amah sangin Mittawte’n man thei zaw uh a, zusa kua to lezong amah sangin aphih mu masa zaw uh hi. Tua ahihmanin tua mittawte lakah amah pen gual tungtuang zaw tuan het lo mawk hi.

Nilekha kumte hong bei toto in, a tawpna ciangin mittawte laka nungak melhoih asak penpen khat tawh hong kingai uh a, kiteen ding hong khensat ta uh hi. Nungkanu nulepate’n zong awi mahmah napi in thukhat omsak se uh hi. Tua thu pen “ Ka tanu tawh na kiten ding leh nang zong komau mah nabat kul hi.

Tua na ut kei leh ko ka tanu uh mibanglo khat tawh akiteen ding ka phal kei uh hi” cigiau mawk uh hi. Nungaknu tawh kiteeng ding hileh ama mit zong khuamu thei lo dingin a bawl kul cihna himawk hi. Lungkham mangbang in a om laitak khatvei a lawmnu hong sun hawh a hibangin thu hong kuppih hi. “ Lawm aw hih thu pen nong it nong ngaih takpi leh hamsa het lo hi.

Ka khuanawl vuah mit khelkhiat siam mahmah khat om a, amah in na mit hong khelkhiat sak peuh leh ana bangmah na phawk kei ding hi. Baih mahmah lel hi” ci hi. Hih thu azak ciangin tangvalpa zong a lawmnu ngai mahmah mawk ahihman in hong thukim ta hi. Zingsang khua hong vak leh amit in khua mu nawn lo dinga a it mahmah a lawmnu ngah thei pah ding hi.

Ahizong in tangvalpa in zan thapai in thu tampi saupi tak a ngaihsut ciangin a khantawn in khuamu nawn lo ding cih mawk pen piang thei sa lo ahihman in zingsang khuavak siang madeuh in gamsung lamah taimang vingveng a, hong kilehkik nawn lo hi.

Na khuamuh theihna sanga amanpha zaw bangmah om lo hi. Mittaw khua hih leitungah mittaw lo khat leh nihte hangin hih leitung pen tuni ciang dong anuam lai bek ahihlam mangngilh kei ni. Khuamu thei mi khat leh nih hangin leitungbup hizah ciangin hong khangto thei bek ahihi. Ahihangin hibang mi nihlethumte pen anuntak lai un mibang lo in kingaihsun a, ki simmawh bawl in sihna ciang dong a thuak zong om uh hi.

Mikim tawh kipawl theih ding na ut manin nang zong na mit tawsak ding na hi hiam? Mikim in na gen khempeuh hong Amen pahpah ding na ut manin nang zong namit tawsak ding na hiam?Mi khempeuh tawh kipawl theih ding na ut manin nang zong midangte bangmah in thumaan lo khat “THUMAAN HI” ci ding na hiam? Na mittaw sak ken sanggam aw, na khuamuh theihna sanga manpha zaw bangmah om lo hi! Ngaihsun pha dih in! Zomi Quavadis