Missionary leh Hunbit nasem ~ Dr. Do Suan Mung

Missionary leh Hunbit nasem ~ Dr. Do Suan Mung

26th August 2018 ni, Dr. Do Suan Mung in Grace Baptist Church, Yangon ah “Missionary leh Hunbit nasem” cih thulu tawh a sermon hong hawmsawn kik ing.

Thupatna: Topa Jesu pen Vangtung tokhom nusia in mihingte ii mawhna pan hong tankhia ding in leitung ah a nuntakna hong pia hi.

Piangthaksa khat ading in lungdamna thu (Gospel) tangko ding mawhpuak ki nei ciat na pi’n ‘Missionary leh hunbit a Pasian nasem’ nuam tatak khat ading in Pasian kiang pan in sapna (Divine Calling) kisam masa hi.

Gentehna:

Abraham (Old Testament), William Carey (1761-1834), Adoniram Judson (1788-1850), David Livingston (1813-1873) leh Hudson Taylor (1832-1905) te bang Pasian kiang pan sapna (Divine calling) tatak ngah in amau nopsakna mun (comfort zone) nusia in a theih ngeilohna gam ah bang piang ding theilo in atawpna ah a nuntakna na ngawn uh a piakhia a ‘Missionary’ ding a kipiakhia te hi.

Thalawp vat man leh leitung phattuamna ding lam-etna bek tawh hunbit Pasian’ nasep pen haksakna ii tuak ciang ki lungkia thei in, Pasian gam zong zai zaw tuanlo hi.

Samuel Morrison in Africa gam ah kum 25 bang hamsatna tampi thuak in Pasian leh agam ading in a sepzawh, America hong ciah kik lam in American President, Roosevelt tawh Tembaw khat ah tuang khawm in, New York hong tun uh ciang Mr. Roosevelt pen mipi in nasiatak in muak na pi’n Morrison pen kua man thusim khalo hi.

Morrison in Pasian kiang ah, ‘Topa aw… ken Africa gam ah na gam ading in haksatna tampi tuak in kum 25 bang na sem ing. Ahizong in, Africa gam a gamsate a kaplum lel a pai Mr. Roosevelt pen America atun ciang mipi in nasiatak in muak na pi’n kei kua mah in hong thusimlo hi’ ci in Pasian tung ah khasia hi.

Pasian in Morrison kiang ah ‘Ka tapa aw… Roosevelt pen a gam a ciah ahihman a mipi in a dawn hi, nang pen na gam tatak ahi ‘Vantunggam’ hong tung nailo hi zaw teh. Vantung nong tung ciang na thaman ding ki gen zolo hi’… ci in thapia kik hi.

Thukhupna:

Hunbit a Pasian’ nasep tatak pen leitung nopsakna leh hamphatna te lamen sa a sepding hizawlo in, Pasian kiang pan sapna (Divine Calling) ii ngah khit ciang tua leitung nopsakna leh hamphtana te nusia a tunglam hamphatna thaman te en kawmsa a sepding hi zaw hi.

Tua ahihman in, Ih thaman tatak ahih leh Vantunggam Pasian kiang ii tun ciang Pasian in hong pia ding hi. Apuahkik, Suan Tawng (London)