Asikhin kisa in misibuk ah akikoih, zankhat khitciang hingkik

Asikhin kisa in misibuk ah akikoih, zankhat khitciang hingkik

India gamsung ah mawtaw tuahsia in asi in aki ciamtehsa pasal khat, zankhat khitciangin silo in nakkik cih thuthangkhat MSN te’n tuni in suaksak uhhi. Tuapa pen asikhin kisa in misibuk ah akikoihkhin hi a, azing ciangin agil kheiding, Postmortem bawlding in akithawi ciangin ahinglai ahihlam kimukhia cihi.

Tuapa minpen Himanshu Bharadwaj kici a, asikhin ci’n Doctors te’n agenkhiatsa, a ciaptehsa ahihi. Ahi zongin Pathologist khatin asihna ahang kancianding in agil kheiding, Autopsy bawlding in akithawi ciangin akhutdawh omlai cih mukhia cihi.

Himanshu Bharadwaj pen Car Accident tawh nakliam mahmah hi. Atuahsiat khitciangin Hospital ah kipuak a, zato ah Doctors te’n amasa in Brain Dead ci uh a, tuakhit ciangin Medically Dead ci’n sita hi cih agenkhiat, aciaptehsa ahihi.

Tuabangin Doctors te’n sikhinta acih ciangin tuapa pen misi kepna Mortuary sungah kipuak in, zankhat aki koihcipkhin ahihi. Azingciang Posmortem bawlding akipat ciangin ahinglai akimukhia ahihi.

Chhindwara District Hospital panin Dr. C Gedam in agenkhiatna ah tuapa pen Brain Dead dinmun hilai a, Treatment tampi bawlkul laiding hi ci’n genkhia hi.

Tuapa pen Chhindwara Hospital ah atuncil akipan Brain Dead hikhinta hi. Tuaciangin anak Respiration pen damdam in ahu beisemsem in, akhutdawh zong beisuak cihi. Ahi zongin anakna Respiratory Organ pen azingciang zingsangin nasemkik in nungtakik cimawk hi.

Ahi zongin Chhindwara Hospital ah zatui leh vanzat akicingin omlo ahih manin, tuapa pen Nagpur khua ah zatui bawlding in kipuaksak hi.

More: Asisa khate ading nangbang semthei? ~ Rev. Fr. Damian Dal

Khuasung mipi te’n hihbangin asikhin ci’n zato te ciaptehsak pen zato te gitnatlohna hi ci’n alungkimlo honkhatin zato apualam ah lungphona nei uhhi. Ahi zongin tuapa ii a innkuanpih te’n ahihleh hihpen alamdangpi khat hi, Miracle hi ci’n lungdam mahmah uhhi. Sawltak #zomidaily