Mipi mai ah Thugensiamna (Part 5) ~ AS Thangbawk

Mipi mai ah Thugensiamna (Part 5) ~ AS Thangbawk

41. Zahtak bawl in.

Koi bang koi bangin hong hopih zongin zahtakbawl in. A zahtak mahmah dan in om lecin na kamtawh thutampi na gensangin a lungsim na zo baih zaw ding hi.

42. A deihbang hiam cih thei in.

Nang tungah hong gen thute hangin a lungsim sungah bang deihna omhiam cih telcihtak telsawmpah in. A ulehnau hangin a hehhiam?, a zi tungaa khasia hiam?, a tate hangin a lunggim hiam? cihte na telpihpahlek kisam hi. Na hihtheih ding leh ‘hong huhnuam mah sing e’ ci lel in.

43. A innkuanpih te zahtak bawl in.

Kisap a neih na muhleh huhsawm in. A mahbek hilo in a innkuanpih, a zite, a tate, phatsak in. A melhoih hi ci in. A nasep uh thupi hi cihsak in. Thupha a ngah hi uh teh ci in thapia lel in. A innsungah bang nahoih omhiamcih enpah inla tuatetawh phat in. Ahizongin himun kidop ding kisam hi. Lungsimtakpi tawh a phat na hihdingkisam pha mahmah hi. Kilawmsakna in a gen na hihleh na thu hong siazawpah ding hi.

44. A kampaute vallua cihsak kei in.

A hehna leh a lungneuna hong gen mi tungah ‘kawlphot in’ ci kei in. Na lungsim khiam in cipah kei in. Tua te in hehna leh lainatna te behlapzaw thei hi. A lungkim dong na gensak khitciangin a hehhuai taktak mah hi, lainat huai taktak sa mah ingh cihsak lecin a mai na mu zaw pah ding hi.

45. ‘Thei mah ing, telta ingh’ ci pahpah kei in.

Na theihtheihsa thu hong gen a hizongin a theinailo bangdan in om in. Ki hilhhilhsak phot lel in. A lungkim hun hong tunciangin na deihna gen lecin 90% a ngahkhin na hihi.

46. A thugen laitak mawk nuih kei in.

A tawntungin nuih mai seisai sekei lel in. Tua in zahpihna leh uplohna tawh kibang kha thei hi. A hehkhat leh mihaksa khattawh kilemna ding thugenna ah nuihluahluah ding kisamlua lo hi.

47. Thu nial ding peuhmah ngaihsun kei in.

A thu na nialsawm limlim leh a inn ah hawhsawm kei in. Ki lemna a bawl dingin pai kei in. Na deihna a ngen dingin kipan kei in. A tawntung a hikei zongin tawmvei sungbekbek thukimpih sawm photphot in.

48. Hehna pen hehna tawh thukkik kei in.

Hehna tawh na thukkik leh na deihna bangin nate hong piang ngeilo ding hi. Na kilem dong nanglampan lungduai tentan sawm in.

49. Ki mattentan in tu kei in.

A kihalpian in tutna la in. Banghanghiamcihleh ki gamlapian leicin a ma omzia na etteh thei ding hi. A luhekzia, a khutvikzia, a khekoihzia te teltak in na encian thei ding hi.

50. Nang ki niamkhiat masa in.

‘Kei lampan ka kisapna hi. Kei a khialkha hi ingh. Kei kicinlohna hi’ cih kiautheihna in genzawhloh nalianpi leh kilemna hong piangsak ziau thei hi cih mangngilh kei in. (azom Part 6 nasimsuak vemaw) AS Thangbawk