Mipi’ lak-ah omzia

Mipi’ lak-ah omzia

Adiak-in AU-ah ateeng sanggamte: Mipi phual, Zato, Saanginn-a kipan kimeeltheihpih ahi khollo mipi-tawh kituah theihna munte-ah: Cilsia loding, Zateep loding, Neektheih ne loding

Hih thute Kawlgammi diakdiakte-in theilo uhhi. Thei-a zuuilo-zong hithei saam incin. Signboard-tawh suang lenlan keitah ci ahidiam kizuui khollo-hi.

Cil-pen kamsung pan-in gilsung lam-ah luutsukleh cidamna ahih-tawh kilehbulh-in kampua lam-ah paikhia-leh minute 3 sung-in bacteria piang-a, natna lungno piang-hi.

Zateép lehang khu ahihman-in kiimlehpaam huih niinsak-hi. Tuap thahaatlo khat-in gimpih thei-hi. Saanginn genloh saanghuang limlim-ah zateép akikhaam ahihi. Australian Thukhaam (Law)-in phallo-hi.

Neektheih-pen zato te diakdiak-ah numei naupang kituahna mun ahihman-in neektheih kiphallo-hi. Na’ tate khawng-in khomun-khawng ne laulau-a Receptionist te’n hongtaái kholloh-pen mawltuak hong salua hilel-hi.

Neektheih-pen AU buang-ah ta-nei nulehpa khempeuh-in khomun tawmcilik man-bek leizo kimciat dinghi. Mipi’ lak-ah neekding akiphallohna ahang-pen naupang khat-in neek aneih ciang-in adang naupangte-in duhgawh thei-hi. Duhgawh ahihteh ci-a hopding-pen Cidamna lampan kiphallo-hi, banghanghiam cihleh kihuatpih neektheih tamlua-hi.

Lahpakding: Peanut (Mawngphali)-tawh kihel neektheih neleh husam-in abuai naupang tampi om-a, naupangte-pen akihuatpih tata duh mahmah sese thei-hi. Tua bang-a akihua naupang khat’ muhna-ah naupang dang khat-in mawngphali ne-in na-kihawm khale-uh naakpi-in lauhuai-a, athu-zong lian mahmah-hi.

Tua ahihman-in na’ tate agil akialleh mawtaw tung-ah nesak inla, mi’ lak-ah neektheih nesak laulau kei in. Mi-in hai hongsa-in hong niammuh mahmah uhhi. Naupang-nei mi’ kiang-ah na-hawh ciang-inzong hawhna tunma-in na’ tate-in lampi pan-in aneek-uh gaisiang sak in. Hawmcing keileh buaihuai peuhmah-hi.

Zomite-pen tate-khawng mi’ lak-ah aduh bangbang pia cihdaan-a midangte-in apaakta ding-a lamen-hiam theihloh, akidem bang-in tawi laulau, ne-phauphau sakse hihang. Hailua kei ni. Inn-ah vaaklah bang-a hongkici zawsop thei-hi. Neek kidemna mun-ah ava-dem hilo cih phawk theihding mi ngeina batna hiphiing laai-hi.

Nulehpate-aw, Tate mi’ lak-ah neektheih ne-laulau sak nawnkei ni! Gilkial-uh ahihleh inn-ah or mawtaw tung-ah nesak ni! Mi’ tate-zong naupang/mihing-mah ahihteh khual ni!

Nungak, Tangvaal te-aw, Naupangte’ muhna khawng-ah neektheih tuamtaum nene sedah ni. Hong duhgawhleh khat leh nih na-hawm zong-in hawmcinglo ahihman-in adangte hehpihhuai-hi. Naupangte-zong cilphuulthei veve mihing ahi-uhhi. Na’ gilkial ahihleh mi’ tate muhlohna-ah ne in. Hih-pen Zomi Tuan Pupate’ Ngeina Hoih Mahmah Khat ahihi. Zokhai