Mindat Paina ~ Pu Thangboi

Mindat Paina ~ Pu Thangboi

1975 kum kiim pan in Tedim gam ah kha khanlawhna kipan hi. 1977 kum in nakpi tak in Tedim leh Tonzang gam ah kha khanlawhna piang hi. Tua khanlawhna huhau in Tonzang ah 1977 kum April ni 3 ni in Pu P. Gin Khan Do te’ inn pan in AG pawlpi kiphuan khia hi. Khanlawhna sung ah akibual khate in apaipaina vuah gupkhiatna thu genlo in omthei lo uh hi. Tua khanlawhna i nawkkhak kumpi nasemte zong atuntunna vuah missionary suak pahpah uh hi. Nungzuipite’ hun lai tawh ki valak mahmah hi.

Tua khanlawhna sung ah akibual kha lak ah tulaitak a MP Pi Cing Ngaih Mang i pa Pu Cin Suan Dal zong kihel kha hi. Amah pen tua hunlai in kumpi nasem hi. Tonzang pan Mindat ah kumpi nasepna vai tawh alal ding ahi Pu Cin Suan Dal in Tonzang AG (Gospel AG) pawlpite’ phalna tawh pawlpi signboard pua ngiat hi. Tua lai in Mindat tawh akinai mahmah ahi Kyauk Htuh khua ah vanleng tulai ahih man in Kyauk Htuh khua dong tua signboard vanleng tawh pua ngiat hi.

Tua signboard tung a “Tonzang” akicihna mun pen “Mindat” cih min tawh laih in 1983 kum in Mindat ah AG pawlpi phuankhia hi. Tua pawlpi i kum 25 cin silver jubilee 2008 kum in thupi tak in bawl uh a Pu Cin Suan Dal leh a innkuanpihte zong va kihel thei uh hi.

Tua pawlpi ahi Blessing AG te’ sapna tawh 2018 kum March kha 16 – 18 sung ni 3 sung vilvel Pu Cin Suan Dal’ tapa ahi Sia Thang Sian Lian @ Sia Sianpi tawh lungdamna thu kava tangko thei uh hi. Mindat ka om sung uh ka muh khak leh ka theihkhak pawl khat hong hawmsawn nuam ing.

Mindat Khua

Tuipi pan in pi 4860 asanna mun ah om ahih man in vot hi. Sun le zan tatsatlo in khuaphelep mei ngah uh ahih man un ice-cream nangawn kizuak hi. Khuaphelep mei angahna huhau un asingkung alopate nangawn un nuamsa uh hi. Sing tawh an kihuan nawnlo ahih man in singkungte suakta in gol thei mahmah uh a khuahunte niim in azu ava in zong nuamsa uh hi.

Sum tawh kizuak Mindat a kibawl tuithawl nam 2 bang ka mu hi. Zong lim mahmah hi. Tedim leh Tonzang sang in zong tuizat nuam zawtham hi. Zong atui uh hoih mahmah a neel dikdek hi. Lampite zong hoih in lamtun zong nuam ahih man in gamdang mite akop akop in khuasung ah avak hialhial khawng kop tampi kimu hi.

Inn phazah leh Mi phazah

Veng 4 in kikhen a, 2014 kum census lai in Mindat khuapi sung ah inn 2343 pha a, mi 11505 (pasal 5267 leh numei 6238) pha hi. Khuapi-uk bup ah mi 42600 (pasal 19727 leh numei 22873) om hi.

Minam

Atamzaw bel amau leh amau Cho/K’cho ci’n kilo uh a pawl khat in bel Pyu kici nuam zaw uh hi. Kawlte zong tampi om hi. Mindat khuapi ah Tedim kampau kumpi nasem mi 30 val tulaitak in om hi.

Kampau

Mindat khuapi lian ah kawl pau kizangh zaw mawk hi. Tangtawng a kipan kawlte tawh kizom kha uh ahih man in kawl zia leh kawl pau nopzat mahmah uh hi. Minam veii te’n tuapen tulaitak na sa mahmah uh hi. Pawlpi pawlkhat in amau’ pau zat ding a hanciam laitak uh hi.

Pasian’ thuhat khangnote’n bel Thang Tawng pakta mahmah uh a, Thang Tawng’ late akawl la aizong a Zola aizong sathei mang uh hi. Tedim ah LST sang akahngeite bel a Tedim phual a te zah mah in Tedim pau siam uh hi.

Khalam Level

Pasian’ thuzui teng in kipawl khopna aneih uh hang in ki thutuak taktak zolo in om zeelzuul uh hi. AG sung bel tulaitak lawp mahmah uh a khanlawhna om hi. Phatna leh biakna lam zong nuam mahmah hi.

Kawlte zong tam mahmah zeel ahih man in khuasung ah bel kawlgam dan mah in zingsang teh lutolte an dong in kigual ngeetngaat uh hi. Lutol te nungta mahmah zo uh hi. Bek thamlo in amau zong mission naksep mahmah uh hi. Lutol lubawk minthang Dr. Ah Shin Nyan Neih Thara bang in na naksep mahmah hi.

Nuntak Khuasakna

Kumpi lam pan development project adiil ahaa in om ahih man in nasep tam mahmah hi. Tua ban ah telhawng zong Japan te’n nak lei mahmah uh ahih man in nuntakna baih hi. Tu’n strawberry aciing zong omta hi. Atamzaw in bel telhawng nak ciin mahmah uh hi.

Mailam Nasep Ding Gelna

2018 kum beima peuhmah in Cialpi khat neihzawhna ding. Ahih theih leh December kal masa sung Christmas paulap in bawlung tualpi ah kawlgam a Pasian’ mizat mahmah khat thugen sak ding. Kawlgam a lasiam minthang leh music siam minthangte paipih ding. Nitak 3 sung deihtak in lasakna leh gupna thu tangkona nei ding. Tua a ding in atawm pen Kyats 20 million zon kul ding.

Tua teng hiphot ei guai. Lai nong simsak lungdam ei.

Nong-it

(Mung Laan Thang)
Zangkong