Min kibang ~ Kap Cin

Min kibang ~ Kap Cin

Tg Penglam (gambel) min, ni tak khat KL khuasung ah lungmuang tak in a vak lai tak in phone no 012-2096397 tawk Mang pau in na kiho pih hi. “Helo, is it Mr Peng ? Can tell me your UN no” ki ci vat a, tg. Penglam in zong 791-###### hi ci in na dong kik pah hi. “ I am calling from United Nations, come tomorrow Gambel office at 8;00 am” ci in phone khia zau hi.

Phone a ki ho pih khit ciang lamdang salua in, zum phone lah hi lo, a hi hang khua pih mel thei ten lah Mikang pau in hong ho pih lo ding ci-in lungkham tak in a om lai tak, a lawm te khat akipil sak mah mah tawh na kimu in, a phone no leh a thu a gen tak ciang, ‘nang a, min kibang hi ding na hi ve maw’, ci in ‘zingciang zum ah na pai in la na card ngah dan sianggen lel in’ ci in na han thawn hi.

Zomi te khat ni dang lai in, Yangon ah University sangkah in a om lai tak, Zato ah kilak naum in, a Zo min pen Kawl te sap hamsa sathei ci a hi man in, Kawl min Maung Hla ci in phuak tawm in, Zato ki lak na ah token la in ngak hi. Zato kilak ding te a banban ki kisam in, a ma hun tung thei mah mah lo hi.

Mi abei tak ciang a Siamah nu khaing ah kei hong kisam thei kei ve aw, ci in a dot leh na min bang hiam ci in,a dong hi. Maung Hla a ci bek om lai hi, ci hi. Kei Maung Hla hing a kici leh “Nang den pek a hong kisam hi in, a za lo hi teh” ci in tai gawp hi. Tua a eimi pan a zalo hi lo in, Kawl min a kawm pak pen a min zong kiseh lo lua kha in, a mangngilh kha na hi zaw hi.

Zomi lak a mi masa pawl Sanggam siyin te bang Yagon ah University sangkah in a om lai, Mikang min nei tek dan uh hi. Mikang min a phuak sak te zong galkap bu cih khawng a, a zalian pawl hi in, sangnau pang a tung masa sa Mikang min pai hi. Unnau te khat a U pa min pen Lawrence a cih hi in, a nau pa zong tua ei mi galgak bu pa khaing ah kei zong ka U pa bang in ‘L’ tawh kipan min ka deih ci hi.

Galkap bu pa in zong tua ahi leh Lucifer cih min pia hi. Nitak Mang hun kikhop na ah Mai tang thak muak na kinei in, Siapa in, “tuni tak mai tangthak teng hong ding vo” a cih leh Lucifer zong hong ding to in, “My name is Lucifer” a cih leh mipi a nui tawh a lau pianpian tawh ging ziah zaih uh hicih lawm te ciam nuih ka za ngei hi.

Min pen kibang thei mah hi,ei min kibat pih te bang kithei naum in kingai zaw deuh se hi. A hi hang tulai tak ei min kibat dan pen, Min kibang bek hi lo, Suah ni suah kha kibang, Nu le Pa te min kibang, ten na Khua lua ki bang hi.(a kibang lo pen Parcel ih sapnop a lawm ngiah sim te min ).

Gambel zumpi te zat Computer system pen nang khang to lua hi. Kei bang ka melthei te gambel min ka gen leh a min leh a photo hong sauk pah in officer pa in hong lak hi. Gen teh na in, “Pau” a kici min a computer ah type le, Pau min a nei khempeuh hong suak ziah zaih mawk hi. Tua a hi man in, den a, a tunga phone no tawh hong kisap le bel nial thei om lo dan hi.

Min kibang na a hang tak pi tak om hi. Gen khin zo kei ni hang. Tau sang in mai lah ah a kisam penpen khat in Zomi te hong van ding Lawyer kh at ( Thula le a thei ) kisam hi. Ei tangthu hoih lo, dik lo a ih awk zenzen leh thukhun zui in hong panpih ding mipil khat kisam hi hang. Gambel ngah cil ding in, ei tangthu case tek kibawl hi.

Eimi atam zaw pen Malay tunglim Gambel kisau hi in, koici apply ding? Koi ci dan in tangthu case bawl ding cih kithei lo hi. Ei sangin a tungmasa khat peuh a thei pen ding ki sa, in tangthu ki bawl to to hi. Genteh na in,kei thei tangthu pawl khat bang genni ci leng, “ nang bang hang in, galkap ten hong man hiam”? Kei kumpi phal lo na ka zuak na pan a hi zong in, kei mawtaw ki hawl in driving license nei lo ka hi man in hong ki man hi cih kawng.

Koi mun koi mun ah Gam nei te thukhun, Rule and regulation om den hi. Tua te ih pasat leh hong ki man limlim ding hi. Ka cih nop na ah ei Zomi te thukhun pia zia ki thei lo in, ei mawh na lo pi a mawh tawh ih ki bang hi. Tua te lak pan hong hon khia ding in , mi pil mi siam tam pi tak ki sam hi hang. Min kabang vai ah ei Zomi te a mawh lua ki om lo hi. Ei thuthei lo na hi zaw pen hi.

Gam 3 na a tungsa khangno te Lawyer tam pi tak hong pai kik un la, thukhun tawh kitauk in kavai uh hong van pih un. Mai lam ah USA Zomi, Austrialia Zomi, Norway Zomi tampi tak pil na sang nei in, Gambel zum pi a hi zong, Embassy zumpi te a hi zong in, Topa Pasian in Zomi a deih sak officers tampi, tampi tak Zomi te sung pan hong piang sak ta hen!