Mihaksa, migenhak te tawh kizopzia ding (Part 2)

Mihaksa, migenhak te tawh kizopzia ding (Part 2)

11. Hehna pen hehna tawh thukkik kei in. Hehna tawh na thukkik leh na deihna bangin nate hong piang ngeilo ding hi. Na kilem dong nanglampan lungduai tentan sawm in.

12. Ki mattentan in tu kei in. A kihalpian in tutna la in. Banghanghiamcihleh ki gamlapian leicin a ma omzia na etteh thei ding hi. A luhekzia, a khutvikzia, a khekoihzia te teltak in na encian thei ding hi.

13. ‘Kei lampan ka kisapna hi. Kei a khialkha hi ingh. Kei kicinlohna hi’ cih kiau in genzawhloh nalianpi leh kilemna hong piangsak ziau thei hi cih manggilh kei in.

14. Na kiho laitak na dang tawh buai kei in. TV na mai ah a kilak zongin en kei phot in. Na phone tawh buailua kei inla tua mipa mah lunglut bawl in.

15. Na zaknop hetloh thute hong limgen pih leh a theihlohkal in a thukawng heksak in. Ahizongin a kilanglo in na hihtheihkei leh hong sia zaw ding hi. A theihthamloh in a thukawng heksak thei lecin na deihna lam ah na kai zo ding hi.

16. Na haksatna genpih kei in. Na deihna gen pih kei in. Na hamphat nading tam genpih kei in. A ma hamphatna ding leh a ma metna ding tampi genpih zaw in. Tua in nadeihna hong ngahsak ding hi.

17. A hihtheihleh letsong puak zo lecin kamtampi pau ma nangawn in kithukimna ki ngah khin thei hi. A hizongin a maiet lua danin van na puak leh hong kitelkhial zawsop ding hi. Letsong puak pen hoih mahmah aa hong kitelkhial leh hoih hetlo hi. Kidawm in.

18. Na puansilh leh na kizepna a hoihkhomkhat puah in. A et lawm lo lawmlawm in mi inn ah lut kei in. Sianthona thupi ngaihsut in. Tua hikeileh hong kihopih nuamlo bek hilo in hong kiciahsak pah nuam dingaa na deihna na genthei peuhmah kei ding hi.

19. Haksa na sak leh na meltheih mahmah mikhat tonpih in. Tua in a ma lungsono nuamtuam sak hi. Hong ko gawpnopna tampi hong dal ding hi. Nang mahmah zong na kimuang zaw ding hi. Na lawmpa in na kampau ding hong huhtheih laiding ahihmanin a hihtheihleh mi hoih khat tonpih in.

20. Mihaksa te tawh na kimuh dingciangin na deihna banghiam cih telcian mahmah in. Vai thupi lua a om kei leh hawhsedah in. Na ngahkik ding theilo pi in hanciam bawl sekei in. Mihaksate in lungsimnatna hong pia thei hi. Ahizongin maisak zawhna neihsawm den in. Hong lawhcingsak ding hi. Siamsin Library