Midangte lakah Zomite ~ Awn Za Pau

Midangte lakah Zomite ~ Awn Za Pau

Ka tan sagih kum (1958-59) Mandalay ah sang ka kah lai in 4th Chin Bn omna Mandalay Hill kici mual bul panin Army Middle School, Nandwin( tuhun ciangin Nanmyo kici) dong, nisimin ciah leh kuan mawtaw tawh sang ka kah uh a, sangkah sung lobuang inn tun ciangin Kawlpau kizang nawn vet lo hi. Ka veng ka pam uh lah Tedim Zomi vive hi a, eimau vive tek pau mahin ka pau tangtang uhhi.

Meiktila Army Children’s High School ah(1961 – ‘62) tan 10 ka kah leuleu ciangin 4th Chin Bn mah pan a kah ka hi a, Mandalay sangkah lai tawh kibang linlian hi. Taunggyi College ka tun leuleu ciangin zong(1962 – ’64) kha nih sung khawng kei leh Tg Khai Do Thang (Suangpi) leh Kawlte khat tawh inn ka saapkhawm uh cih loh, tua zawhteh kum nih sung eimite kiang mahah lawm Khai Do mah tawh a om khawm ka hi uh a, Zo pau vive mah kitam zat leuleu hi. Cih nopna ah tan 12 on dong Kawlpau deih bangtak leh maingal takin ka pau thei naii kei hi.

Yangonah 1964 akipan RIT ka tun ngawngaw tak ciangin, cik a khan ka muh ngei naii loh Magwe pan Kawlte khat tawh ka kikhankhawm uh a, ka gei ka pamah Kawl pau vive a zangte tawh kithuah den ka hih manin RIT tun teh Kawl pau hoihtak leh maingal takin ka pau thei pan hi. Tua hi a, Kawl pau hoihtak a ih pau ih ham theih ciangin azia atong a lungsim puakzia kiciantheih pan hi. Amau lak mahah ciamnuih ih gen ziahziah theih takteh a kitualtel pan ahihi.

Ei mite pen ei leh ei ki-ngai phadiakin midang kuamah tawh kikhawl thei meellote ih hihi. Lai tan sangpipi a on uh hangin a lai hat mahmah napi Kawl dan Kawl zia kisiam lo hi. A zia a tong ih theih leh hi bek a, ei lak ah kizang nuam het lo lai hi. Ciamnuihna peuh bek in kizang hi. Kawlte peuh kisimmawh nuam thei laideep zaw lai hi. Ih biakna lah Kawlte tawh kibang hetlo pah phot ahih manin, ih ki-naiina ding ih kikholhna ding thu om thei lo mawk mah hi.

Tu hun tu laitak in koici ciang kitungta cih ka thei nawn kei a, ko hun lai in Kawlte pau leh tui leh nga bangin amau om dan khawl dan tawh kituak a kikhawl thei khollo tek vive mah ih hi tek tam, a diakdiak in kumpi nasepna sung zongah, ei Zomi ulian uneu a om sunsunte Kawlte lak leh mi nam dangte lakah, akihel zo a maingal zo ding kisangkhaat mahmah hi. Ka muanpipi Kawl pau Kawl dan siam mahmah ka sakpipite zong Kawl lakah ta zo mahmah lo in, Zo gam khawngah ciah kik ding vive ngaihsun uhhi. A om sunsunte lah nasepna ah mizia mitong leh mi omdan zong zui thei tumtum meelmeello ahitam.. a kinawlkhin pian vive tam zaw hi. Kawl lak a kihel zo a ta zo pen kitawm mahmah lai hi.

Tu hun tu laitak mahmah zongin, College leh University sangkah cih hangin nidang 1988 masiah lai bangin, a hostel cih khat lah om nawn ta mawng lo ahih manin, sangkahna pan kitheihpih lawm leh gual neih theihna ding tawm mahmah hi. Tua bang hun hoih lai in university sangkah pen hostel vive ah ki-om in, Kawlgam bup mun tuamtuam khua tuamtuam pan a hong kah a mi tei vive a kinei tengmah kisuktuahna ahihi. Sangkah hun sung bek hi lo in sun tawh zan tawh innkuan khat veeng khat bang aa, a ki-omkhop ngeiingaii ciangin, lai pilna lam bek hi lo in leitung pilna a tuamtuam om dan khawl dan mi zia mi tong a kipan kithei kiphawk khia ahih manin, a diakdiak in khual gamlapi pan aa hong pai Zomite tungah nakpi tak in lai pilna bek hi lo in, picin theihna pilna siamna lungsim namcin hong guan hong theisak hi.

Galkap kumpi hun sungin tan sawm ong sunsunte in biakna sang vive ah kipai ngeiingaii zaw ta leuleu a, Kawlgam bup a 5% khawng a pha Christiante sung pan a ci tawm penpente Zomite pian vive bek tawh kithuahna kikholhna bek om ahih manin, ih kim ih paam hong toi semsem hi. Koi mun koi mun ih tun hangin, Ih khua muhna leh ih ngaihsutnate tangzai thei tuan mahmah lo in Zomi kiukiau sung bek mahah ih omom veve lai hi.

Tu lai tak a ih mi bup tawh kituak lo liang a khantohna ih ci zaw diam kiam sukna ih ci zaw diam ih nei ih lam lian penpen bang ahi tam cih ka ngaihsut ciangin, biakna nasem siate leh biakna kipawlna biakinn a tuamtuamte banah, kinen suahsuah theihtheihna dingin beh a tuamtuam, khua a tuamtuam kipawlna ih neihte mah ahi kei nam ka ci simsim hi.

Tua ahih ciangin sangkahna leh nasep sil bawlna ah, Kawlte a kipan nam dangte tawh kinaii tak a kikholh theihna om kei peuhmah leh Kawl milim biate lakah ei Christiante upna paizia tawh kikeelki mahmah ahih manin, kikholh theihna ding lam tampi om theilo mawk hi. Tua ahih manin tu dong mahin, Kawlte tawh kikhawl thei ding Kawl dan Kawl lungsim a zia a tong thei ding, ki-om khol kei lai leh kilawm kasa hi. Tua hi a, mailam ah khangnote in Zo pau Zo dan ih theih mah bangin Kawlpau Kawldan zong siamin amau tawh liangko kikim a, lungsim tawng tawh kizop kikholh theih ding leh amau suan amau muan a ih om theih ding thupi kasa hi.

Tu hun ciangin Kawlpau mahmah zong deih bang tak a pau thei kitam mahmah ta lel ding ahih manin, bangmah haksatna om lua tuan nawn lo ding hi. Ei leh ei sungah pilna khantohna ih ngah thuah nading haksa hi. Ciimnuai Zomite a vek in tul za thum ( 3 lakh) zong ih pha zo kei ding hi. Ih khan khiatna munte in khua neu khuata vive ahihi. Ih nu ih pate hun lai in kikhang to naii lo kankan ahih manin, amau tung pan khua muhna tawm zaw lai hi.

Zomite khuasak zia khua muh zia leh pil ih kisak, siam leh hau ih kisakna te in Zomi sung bup (Chin bup) zong huam sak zo meel lo in kamphen kullo Tedim kampau kiukiau bek sung pan a muhna leh kiciaptehna pan bek hi lawmlawm hi. Chin state sung khempeuh ah a mun a mual a khua a tui ah maingal tak a kihel theih kawikawi ding zong kisam pha mahmah lai hi hang. Zomi sungah hau mahmah ih sakte pen midang mihaute ii sawltak khat peuh dinmun na hi lel bek a, mi dangte pilna siamna leh neihna hauhnate tawh van leh lei kikhaih zah a kikhai ahih lam zong ih muh theih ding thupi mahmah hi.

Tua hi a, a tung a gensa mah bangin vahna ciahna ah mi thu mi la theihtheihna dingin, Zomi lungsim leh Zomi ngeina kemcing sa in, Zomi sung kiukiau bek ngaihsutna pan Kawlgam bup leitung bup muh theihna dingin mi dangte kiangah pilna ciimna ih tawktawk ding kisam pha mahmah hi. Tawkna ding mun ahoih penpen in library ah pai in laibu hoihnono sim ding leh midang lawm leh gual kitheihpih zong hau mahmah ding hang a, midangte lak ah sunglut in kihel zo leng hoih mahmah ding cih ahihi. Tua kawm kalah tu hun ciangin IT hun hoih mahmah ahih manin ommuan mun pan thu theihna leh pilna kingah thei kawikawi hi. You tube leh news a tuamtuamte bang ngai gai zo leng zaknop in teina leh pilvangna ding tampi hong guan mahmah hi. Kawlgam laigelh siamte “Literature Talk”te leh DVB Debate a thu kigente bang ngai leng Kawlte tei dan leh Kawlte pilna tampi tak kimu thei pah hi.

Tua mah bangin nasepna munte ah Kawldan Kawl pau Kawl zia leh tong hoih ih sak tata zuih theih pah ding thupi ding hi. Bangbang ahi zongin ih kumpite ahih banah Kawl mi pen Kawl gambup ah a milip in a tam pen banah, ei sangin kiu a tuamtuam ah na pil na siam zaw veve tham uh ahihi. Amaute mahmah in zong a pil masa mikangte kampau luhek dan teng mah a na lala na hi zaw uhhi.

Ei Zomite pen minam tawmte ih hih banah leitungah zong a pil a siam pen ahau pen kihi ngei peuhmah beek lo in kuamah hong en ding hong zahtak ding zong ih hi ngei beek zenzen kei lai hi. Ih khang lui ngeinate na kan phapha le uh teh, tuhun pai dan tawh zuih kik ding om lo in nusiat huai vive hong hi ta hi. Kua mah en loh kawmkal ah ki Zomi sak in ih ki-ultun sak lua liang bungleh luat leh ih valval zaw thei lel ding a pawl leh gual zong ih nei zo kei ding hi. Pawl leh gual nei kawikawi thei hi le hang, ih minamte zong mun a tuamtuam ah ih huh thei zaw ding a ih nahlawh a peek zaw meek ding hi.

Kawlte Ih Phak Lahna

Eimite pawl khatte in Kawlte pen simmawh bawl in neu et mahmah thei lai mawk uhhi. A taktak Zogam khawng a, gamtat hoih lo gamtat sia a hong tungte bek a gengen ih hihi. Tua gamtat siate etteh ding hi lo hi. Kawlte pen Kawlgam Tangthu sungah ih sim khak mah bangin, leitung gamdangte tawh khan kituak a, kumpi a sem Kawlgam sung a uk minamte ahih mah bangin, a na khempeuh leh a bang khempeuh ah ei Zomite tawh teh ding bang hi deksuai lo leuleu hi.

Kawlte ih cih pen mitam mahmahte hi a, a diakdiak in ei mite bangin khen thei siam lo in Kawlpau in pau peuh leh Kawlte a ci ziauziaute ih hihi. Ami tam zah mah in a mi ih et ciangin a hoih lohna leh a gitnat lohna zong tampi a om mah bangin a hoih mahmahna zong tampitak om hi. Ei sang a akhuamuhna uh leh a lungsim picinna uh pen a tawm pen kum 100 a sim tampi mah kikhai in ka um hi.

Ka cih nopna ah ei Zomite pen 1900 khitteh a mit keuh dia kithawi pan ih hi a, amau pen tuma kum zatampi lai pekpek in kumpi za tawh leitung gam tuamtuamte tawh kizom khin ahi uhhi. Leitung pilna sinnate ah khat leh nih sunsun in Kawlte a ban kawmkawm zong ih om tei hangin, tua bek tawh kiteh theih hi deksuai lo hi. A milip a a pu apa khang pek akipan aneu tung a akipattahna zia, a khan khiatpih uh a lungsim puakte, ei Zomi milipte lungsim puak leh ngaihsutna lungsim, zaidan leh apicin dan uh ei sangin tangzai zaw thampek a, kikhai mahmah lai cih ding ahihi.

Tu ciang dong mah sang lai sim laibute lo buang, Zomite a pua lam laibu a sim kitam nai het lo mawk hi. Kawlte in a neu limtak in lai bu a tuamtuam na sim aa, thu leh la tangzai takin na thei khin uhhi. Cihnopnapi pen ah Zomi leh Kawlmi ih khua muh leh khua theih dan akikhai mahmah ahihi.

Kumpi nasem ka sep sungin Kawlte akipan adang mi namdang a tuamtuamte tawh ka kithuah khawm tawntung kha den a, atam zaw Kawlte mah in innteek lungsim vomin innteek nasep uhhi. A tha uh zong hoih meel lo in gawng giilgeel zeen khilkhel tase leh eite sangin thuakzawhna nei zaw uhhi. Sun khuavak zan khuavakin na sem zo zaw uhhi. Khua-ul khua-dam zong thuakzo zaw uhhi. Thumthum tautau zong nei se lo uhhi.

Tua teng kawmkal ah ei a dang minam dangte in nasep ih sep ciangin, nisim a hun maan tak a sep dingte pawl ah ih nasep hat dan leh ih sepzia zong kibang tei napi in, vaii thupi mahmah omin nasep ding gitneihloh a, hun tomkal khat sunga, nasep ding vaai thupi bung leh beng a sep ding hong om vatteh, mitphiat kikal cih bang phial in a vaihawm dan ding uh thei pahin kilek pah zialzial uhhi.

Nasepna khat ah haksatna khat om leh koi cih ding cih ngaihsutna pen gamdang mi a siam (expert) acihte zong sangin a khuak manlang zaw lai uhhi. A semte zong nasep manlangin kiallap uhhi. Awlmawhna lungsim nei mahmah uh a, patau meikang khat om leh kuama hanthot kul lo in a sem ahuh dingin pai pah vingveng uhhi.

“Kawlmang vaihawmna aakpi’n phiatnelh” acih linlian leh zuau thu gen ding ol ngaihsut lua liangin, a thu uh khelkhel kei leh a khuak uh hoih thei mahmah uhhi. Ih tup ih sawmna muikung tun dong lam pial pahpah lo in tangtakin ih masuan ah paipai thei hi le hang, manlang tak a akikhangto hanhan ding gam ahihi.

Thu Khupna

A tung a thute ih gen ciangin lungkiatna ding a, a gen ih hi peuhmah kei hi. Zomite neuseek in Kawl akici peuh upat bawl ding zahtak ding kihta ding cihna zong ahi peuhmah zenzen kei hi. Ih lungsim sungah kha 10 a suak tektek mihing a kibang gai khin hi hang cih lungsim vom cinten gige ding hi zaw hi. Mi khat peuhpeuh mawk simmawh ding ahih loh mah bangin mawk pi-et ding hi lo hi. Ama gamtat luheek leh lungsim puak tungah a kinga hi zaw hi.

Tua hi a, mi dangte hoihna khat peuh ih gen ciangin etkak kik theihna ding a, a beisa hun a thu piangte ih genna ahihi. Ei leh ei dinmun ih kitel theihna ding a, muhna kiu khat pan ih genna bek ahihi. Ei din mun kithei ding ih cih ciangin lungsim zawngkhalna ding thu a gen nuam ih hi kei a, khat leh khat ki-el kilangpan hun ding hi nawn lo in mailam ah kilungtuak tak a ih sep ih bawl khop liailiai ding masuan tampi ih neih lam muh theih ding a, a gen nuam ih hi zaw hi.

Tu hun ciangin, pilna zong nuamte a’dingin zon theihna ding khuano khuatate sung pan na ngawn in akizon theih hun ding sawt lo in hong tungtaktak ta ding hi. Ih Zo gam Chin State sung khua lian khuata tampi takah BEHS sang ciang nadongin sang tampi hong honsak khin zo uhhi. Hilh sia kician (Qualified Teacher) leh akisam zah akicingin kumpi in hong guan zo hi leh pilna zonna ding hun hoih mahmah hun hong tung ta hi.

Pilna siamna mah thupi sakin hanciam toto le hang, IT hoih mahmah hun ahih manin, khuapi sung zong phak tektek kul nawnlo hi. Zomi u leh nau a kuamah peuhte aw, ih tu ih tate a hi thei bang a tawsawn a, hanciam tak a pilna a zon tekna ding kong phawksak nuam phapha hi. Pilna leh siamna kivakhna kici khat peuh nei peuh lecin vahna ciahna ah tualtang thei in na maingal pahpah pah lel ding hi. Pilna zonna cih ciangin lai pilna bek hi lo in khut siamna a tuamtuam a kipan kimawlna dong a kivakhna nei khempeuhte a’ding amau tawh kituak kilawmna munah pilna sin tek ding a gennuam ih hihi. Pilna ih zonna ah Mangpau Manglai , Kawllai Kawlpau, Kawl zia leh tongte zong ih kan ih theih mahmah a kul ding hun hi ta hi. Nidangin ‘Zo gamah galkap piang hi’ akicih ngei zawzenna panin Zogam ah mipil misiam vive a pian theihna dingin mapang ciat ni. Pu Awn Za Pau