Mi Tawh Kikholh Ciang
Mi tawh kikholh ciang hong it in hong ngai mahmah le uh i lungnuam mahmah se hi. Tua banga mite hong it, hong paktatna dingin kikholhsiamna (social skills) kisam hi. Sum tawh a kilei theilo mite itna leh ngaihna na ngahna dingin hihte phawk tawntung in:
1. A maitang en in: Mi tawh kiho ciang khuadang khawng hong et sansan leh nuam kisa lo hi. A mittang mah en gega leng hoihpen hi. I mittang mah hong en gegate tawh thutang takin kiho nuam diak hi. Mittang ki etna ah cihtakna leh hanciamna kilang hi. Kimuang ngam taka maitang ki en cih pen pasal vai bek hilo in lungtang pha, lungtang gina cihna ahi hi. Tua bang mite kipampaih theilo hi.
2. Phone koih khia phot in: Mi tawh kikholh ciangin phone khawng a mekmek uh leh lunglut hetlo cih kilang hi. Ka kihopih pa, nu tawh ka lungsim khempeuh pia ing cih na lahnop leh na phone leh na van dangte khoihlo in lakhia kei phot zaw in. A ging, a kisam valval ahih leh ‘hong theisiam pak in’ ciin genzaw in. Na kihopihte tawh na kiho khit dongin a dang nasep peuhmah koih phot in.
3. A min tawh sam in: Mi i hopih ciang a min mahmah tawh sam teekteek leng ciik sitset hi. Zahtakhuai hi. Minneu a kisap sangin minpi tawh kisam masa in tua khit ciang min neu tawh kihopih leng nuamzaw hi. Mi khempeuh in min kiciamteh theilo a, a ciamteh thei deuh om hi. A mangngilh pahpah om theih a, tua bangte in dot kik mai, ahih kei leh a ma a dot kholh ding hoihzaw hi. Upmawh gen sangin siangtaka dot a, tua min tawh sap hoihzaw lai hi.
4. Maitai in: Maitaina in guhngek dongin zeel thei ahih manin nuihmai a maitaina lim zat mahmah ding ahi hi. Ciamnuih siangtho leh thutak gen hun thei inla, ciamnuih kihhuai leh mite nopmawhsak ding thute gen khak loh ding hoihpen hi. Mite in na gamtat dan, na kampau dan, na om dan pan na lungsim hong en giugiau ahih manin na kampau ahoih pen dingin kidawm in, kammal siangtho leh kilawm zang den in.
5. Khut kilet ciang khut khauhsak in: Mi tawh kimucil khut kilet ciangin khut zaw niangnuang sak kei in. Na khut khauh takin omsak inla, khauhlua in mekcip gawp cih bang bel hisak tuan kei in. Khut zaw ningniang tawh kilet khak pen thadah huai ngaungau mai hi. Na khut a khauh, kip bangin na pumpi zong tangtak in omsak inla, na din ciangin zong tangtak in dingin.
6. Na bil dawh in: Mite in hong hopih ciangin a gen uh na tel na dingin limtak in na bil dawh in. Mi thugen ngai kawm, nadang sem kawm cih bang ahih ciangin thadah huai a, kikinloh vai hi. Mite in amau kikin hi, kilunglut hi cih a theihna dingin a thugen uh limtak ngaihsak ding ahi hi. Bil nih nei a kam khat i neih pen mi tawh kikholh ciangin mangngilh khak loh ding ahi hi.
7. Bil dawh bek hilo, holimpih in: Mite kampau a ngai, bil a dawh bek hilo in a gen uh na theihte tawmtawm kuppih toto, genpih toto, dawng zel,dong zel cih bangin om in. Tua hileh na gente aman za nuam dinga, ama gente nang na zak lam a thei ding hi. Kuppih kiklo in ama gen
bek ‘aw, aw…’ cici den mawk lecin na kikholhpihte thugen limtak ngaihsak lo, zak bel za in tello hiteh cih thei ding uh a, a tha uh dah lel ding hi. Tua manin a kilawm hun khop in kuppih ding, holimpih ding ahi hi. A gen na telloh te dong kik, na tel takpi hiam cih theihna dingin a gente nang kammal tawh genkik in ‘a dik hiam, na cihnop tua hiam’ ciin dong kik ding.
Tu hun ciang nasep ding tam kinei a, hihnop kihau in, vaknopna kihau hi. Hun kinawh a, hun kihaulo thei hi. Tua ahih manin a tom a sau i kikholh ciangin a manpha thei bang pena hun i zat theih nading deihna tawh kong at ahi hi.
Zomi Khangnote aw, hampha uteh.
Hau Za Cin
Phuitong Liim
www.hauzacin.blogspot.com
Comment piaknop aomleh...