Mi nih pilna kidem ~ Job Cinpi

Mi nih pilna kidem ~ Job Cinpi

Siavuan khat le Sitni khat pilna kidem uh hi. Hun khat lai-in siavuan khat in aituam zato neu khat nei hi. Tua zato mai ah,

“A dam dong kong bawl dinga sum sawmnih bek bei ding hi, a dam kei leh 100 tawh kong liau kik ding,” ci-in lai suang hi.

Tua lai kisuang pen sitni khat in a muh ciangin, hih lai ah sum sakhat mawk ngah theih nading om hi lo hiam, ci-in zato inn sungah siavuanpa kiangah a pai hi. Siavuan pa tawh a kimuh ciangin siavuan pa kiangah,….

“Siavuan pa aw, ka lei in a limna bang mah ciam thei nawn kei, bang bang ka ne zongin bang mah phawk lo hi. a lim a al zong thei lo hi,” ci hi.

Siavuan pa in, a nasemte khat kiangah, “Zatui koihna singkuang nambat sawm 22 sunga zatui thumte la inla cina pa (Sitni pa) pia in,” ci hi.

Sitni pa in tua zatui a dawn ma in tawm khat ciam masa hi. Tua zatui pen zatui na hi loin namgimtui na hi mawk hi. Tua manin sitni pa in, hih pen zatui hi lo hi, namgimtui hi, ci-in siavuan pa gen hi.

Siavuan pa in, aw hi mawk maw, lungdam huai si e, na lei in a ciam thei ta ahi ve leh, a dam ta hi mawk cei, nong kilah man sawmnih, ci-in zato kilah man sawmnih ngen hi.

Zakhat ngah nadinga ngian zong hi napi sawmnih suplawh ahih manin sitni pa a lungkim zo lo hi. Tua manin ni tawm khat khit ciangin tua zato ah khat vei hong pai kik leuleu hi.

Siavuan pa kiangah, “Ka khuak in bang mah ciamteh theih nawn kei, a dam dong hong bawl in, ci hi. Bawl thei kei leh zakhat ngah ding ahih manin bang mah ciamteh thei keng ci-in siavuan pa va khem hi.

Siavuan pa in a nasemte kiangah, zatui kouihna nambat sawm 22 sunga zatui nam thumte na pia in,ci-in sawl kikl hi.Tua zatuite a piak ciangin sitni pa in, hihtr zatui hi lo hi, namgimtui hi, nung in zong khat vei nong pia khin uh hi, ci hi. Siavuan pa in, aw hi maw, nung a kong piak ciamteh lai, phaek lai na hih leh a dam hi ta cei, nong kilah manh sawmnih hong pia in, ci hi.

Sitni pa zong a heh hong siak semsem ta hi. Zakhat ngah nadinga a gel hi napi sawmnih nih vei sum ta ahih manin a heh hong suak mahmah hi. Tua manin natna dang khat tawh khat vei tua zato ah hong pai kim leu hi.

Siavuan pa aw, ka mit in bang mah mu thei nawn lo hi, a dam dong hong bawlsak zo dingin kong um hi, ci hi. Siavuan pa in, na mit a dam nading zatui ka nei kei hi. Hong damsak zo lo suak la hih manin, sum zakhat kong pia ding hi, ci hi.

Siavuan pa sum piak sitni pa in a et leh sawmnih lai ahih manin, “Nong sum piak zakhat hi lo hi, sawmnih bek hi, ci-in siavuan pa kiangah gen hi. Siavuan pa in, aw hi maw, na mit a hoih ta ahi ve leh, lungdam huai ei, zato kilah manh sawm nih bei ei, ci hi. Hih sitni pa pen deuhhopna tawh zakhat ngah sawm napi sawmguk a mawk suk hong suak hi. Lungdam, Job Cinpi (Zomi Laisim nuamte)