Mangpha Nu Niang Ngaih Vung (Vungno)

Dear it leh ngaih Tulsa khuapi sung leh a kimnai a om Zomi teng

Oklahoma state, Tulsa khuapi a teng Nu Niang Ngaih Vung ( Vungno ) kum 42 in i lametloh laitak February 15,2015 ni-in damlohna hang tawh St. Francis zatopi panin a leitung nuntakna ong nusia vat a hihmanin a ma ong nusiatna hanga a dah a kap a it mahmah a pasal Pa Ramthanga Ralte, a pianna a nu Pi Dah Cing, a u sia Paul Zam Thang, leh a nau Nu Lunno, Pa Suan Mang ( Maryland ) te innkuan, Tg. Tuangpi ( Tulsa ) leh Pa Paupu ( India ) te innkuan a kipan khuapih tuipih, tanau meltheih, pawlpi mi teng tawh a kibangin Zomi Innkuan Oklahoma kipawlna sunga ka mapanpih board member tengin zong kongdahpih, kong lunglenpih mahmah uh hi.

Nu Vungno pen mithukhual mahmah, midangdeihsak mahmah a ettehhuai Zomi numei khat a hihi. US a tunma New Delhi a omsungin Pasian piaksak talent khutsiamna a hi settawh khauphan siam mahmah a hihmanin UN ngaka om Zomi nungak, nupila teng a siamna sinsak in tuni dongin tua a sinsak te in nisim nekzonna dongin neihlawhzo uh hi. a ma nuntakzia i etciangin a ettehhuai mahmah numei a hihna muntampi ah kimuthei hi. tua te lakah adiakin India a omlai a kipan USA a tunkhit a nuntakna a beikuandong mahin a pianna a nu Pi Dah Cing kep cihtakin naukepin a kem pianna nu tunga thupha tampi a bawl Zomi numei hoih mahmah khat a hihi. a it mahmah a pasal Pa Ramthanga Ralte tawh zong US leitang ah kum khat valdeuh khawngbek kithuahman, omkhawm manbek a hibanga ong nusiat vat pen lamdangsa leh ki lainatpih mahmah tek hi.

Bangbang a hizongin ei leitung mihing te nuntakna pen ei khutsungah om hetlo a hihlam a thak in nu Vungno ong nusiatna hangin i phawkthak semsem hi. nu Vungno ong nusiatna hangin dahpihna, thuakpihna lahna in Zomi Innkuan Oklahoma kipawlna in a ngeina bangin paakkual khat tawh khakna kinei ding hi. nu Vungno ong nusiatna hanga a dah kap khempeuh i biak vanglian Pasian in a makiangpana ongpai a khasiangtho hehnepna ongguankimtek tahen cihthu kongngetsak uh hi.

Nu Vungno ong nusiatna tawh kisai hehnep hunbawlna a nuai a mun ah ki nei ding hi.

Sia Paul Zam Thang
11525 S. Juniper St
Jenks, OK 74037
Nu Vungno tawh a nunungpen hunzatkhopna ding hungelna
Visitation/ luanghawm vehna :
Ani: Feb 19, 2015 ( Thursday )
Ahun: 9:00 ~ 12:00
A mun : mun: 91/Harvard Fitgerald Funeral Home
Sihvuina Service kipat hun : 12:00 PM ~ 2:00 PM
Siampi : Rev. Dr. Kham Khan Khai ( Senior Pastor, MCC )
Kivuinading mun: Calvary Cemetary

Kongit kong zahtak zomi khempeuh aw i minampih, i sisanpih khatin ong nusia ta a hihmanin Vaphual lungtang a nei Zomi a kua mapeuh a diakin Tulsa khuapi leh a kimnai a om a mipih sapih khempeuh in i sanggamnu hun nunungah lainatpihna, dahpihna lahna in i pai kimtek nadingin a kua mapeuh a ki hanthawn hini ei. navekpi un mangpha!

Dahpihna lianpi tawh
ZIOK Board of Directors teng taang’in
Pa Tual Sawm Lian
Chairman
Zomi Innkuan Oklahoma
Tulsa,OK
February 17, 2015