Malaysia, Sarawak ah Helicopter khat mangcip

Malaysia, Sarawak ah Helicopter khat mangcip

Malaysia gamsung Sarawak aom Betong khua pan Kuching khualam zuanin aleng Helicopter khat zanni in mangcip cih the Sun Daily News pan kiza hi. Hih vanleng tungah Deputy Minister leh adang VIP hongkhat tuang uh a, avek un ami zong Contact ki ngahnawnlo hi.

Department of Civil Aviation (DCA) panin Director-general Datuk Seri Azharuddin Abdul Rahman in agenkhiatna ah hih Helicopter pen Betong khua panin nitaklam 4:12pm pawlin alengkhia hi a, Kuching khua ah 5pm hunpawl in atungding cihi. Ahi zongin atunnading tunglo ahih manin nitak 7:26pm pawlin Search & Rescue Team te kiko a, kizongpah hi.

Helicopter tungah atuang mithupi te ahihleh Deputy Plantation Industries & Commodities Minister Datuk Noriah Kasnon leh Kuala Kangsar MP Wan Mohammad Khairil Anuar Wan Ahmad cihte hiphadiak hi.

Hih Helicopter mangcip vaitawh kisai in kumpi thunei nasem mi 100 bangin zongpah ngekngek uh a, Prime Minister Najib Razak in tuni a tangkokhiatna ah amangcip Helicopter ii athemneng ahiding in aki ummawh pawlkhat kimuta cihi.

Helicopter tungah atuang te ii pumpi hiding in aki ummawh numei pumpi khatzong tusunlam in ki mukhiata cihzong kiza hi. Atung ah mi atuang pen mi 6 dingin kigen a, aki kancian laitak ahihi. ZD Sawltak #zomidaily