Malaysia Genting Highland paina Cable Car kialo hi

Malaysia Genting Highland paina Cable Car kialo hi

Malaysia gamsung aom Tourist Attraction te lakah aminthang mahmahkhat ahi Genting Highlands paiciang akituangthei Cable Car pen kisia hi ci’n tulaitak Online Social Media tuamtuam ah ki minthangsak mahmah hi.

Hihvai tawh kisai Malaysia Civil Defense te’n thuman hilo hi ci’n genkhia uhhi. Pahang Civil Defence Force (APM) te’n Saturday ni in Genting Cable Car kia cihpen thuman hilo hi. Genting Highlands Resort panin thunei Management tetawhzong dotcianna kineikhin a, bangmah nawngkaina omlo in, Cable Car te kizangzang hi ci’n genkhia hi.

Civil Defense pan Director khatin hihbangdan thumanlo pen mipi te’n a umding leh alunghimawhpih dingin kongdeihkei a, thumanlo zong nahawmsawn kei un ci’n genkhia cih Bernama pan kiza hi.

Thuthang khatpeuh ihzakciang in koipan kigen, koipan ihzak cihpen hoihtak kancianding thupi mahmahzel hi. Civil Defense Director pa genmah bangin ih theihciankei lehzong theicianlopi in, midangte lunghimawh nadingin thukicianlo, thubul lakna kicianlo “Source” omlo te midangte theihding in ih hopsawnlohding thupi khading hi.

Zomi Daily website tungahzong “ZD Sawltak” mintawh akigelh tepen Source koipan cih alaisung ah kihel tangtang hi. Hih Genting Highlands Cable Car kialo cihzong kotektek aphual ah vapai in, kamit uhtawh akiatlohlam amu cihbang hisamlo a, ahi zongin Malaysia kumpi thunei ahi Civil Defense te pulakna leh Bernama News te pulakna tungtawn in kongzaksak uh ahih manin, amau ka Source uh hipah hi. Atungahzong amau minte kihelpah hi.

More: Heilei Hausa Pa Mang in Mawtaw accident na-pan hong nusia

Behlapna:
Zomi sungahzong UN vaikhawng zuau thuthang omtheizel hi. Thuthang khatpeuh aom ciangin na upphat keileh hong luankhiatna kancian masaphot in. Zuau khemngeisa te’n thumanlo gending hamsa sanawnlo uh ahih manin, hongkhemkik zelzelding uhhi. Na muanpenpen tektek te mahin hongkhem dinghi. Ki dawm in. UN vai akician in natheih ciannop taktakleh UNHCR zumpi sungah asem Zomi kamphen tampi omhi, tuate dongzaw in. ZD Sawltak #zomidaily