Malaysia gamsung ahzong Zika Virus ki patau mahmah

Malaysia gamsung ahzong Zika Virus ki patau mahmah

Singapore gamsung ah Zika Virus anei omkhin cihpen ihzaksa ahihi. Malaysia, Johor Baru panin Singapore gamsung ah nisim in aki lehsuk, aki lehto omden ahih manin Zika Virus zong Malaysia gamsung ah honglut pheiding ki patau mahmah cih theSun Daily pan kiza hi.

Malaysia Health Minister Datuk Seri S. Subramaniam inzong Malaysia gamsung panin nisim in Singapore gamsung ah nasem in aki nileh tampi omden ahih manin, hih Zika Virus pen kilawhding baihmahmahding hi cihi.

Tuabang in Malaysia gamsung Johor Baru ah teengin Singapore ah nasem in aki nilehden pen mi 150,000 leh 200,000 kikalbang phading ci hi.

Health Ministry in hih natna pen aki lawhloh nading in hanciamtheihzah in ahanciam hangin kilawh vetloding cihpen hamsa mahmahding cihi.

Tulaitak Singapore gamsung ah Zika Virus a ngahding in aki ummawh 41 bang omkhin cih Singapore Ministry of Health in Monday ni in tangko khia uhhi. Malaysia leh Singapore gamnih kikal nisim akilehte pen Bus, Car, Train cihte banah mi tampitak in Motorcycle zang uh ahih manin hihteng avek in nisim sitkhit detdingzong baihloding cih Malaysia Health Minister in tuni Press Conference ah genkhia hi.

Malaysia gamsungzong thokang Mosquito tammahmah ahih manin, hih Zika Virus honglutphei in, thokang te’n hongpuak kawikawi mawkleh thakhatthu in mi tampitak kilawh ziahziahding ahih manin patauhhuai mahmah hi. ZD Sawltak #zomidaily