Malaysia Datuk khat ii azi in nasemnu thahsawm ahih manin kiman

Malaysia Datuk khat ii azi in nasemnu thahsawm ahih manin kiman

Malaysia gamsung ah Datuk khat ii azi in amau inn ah nasemin aom innnasem Maid nupen athahsawmna hangin Friday (Dec 30) ni in kiman cih Straits Times pan kiza hi. Tua innnasem numei pen Indonesia gampan hi a, aminpen Suyanti Sutrinso ahihi.

Athahsawm innteeknu minpen Rozita Mohamad Ali kici a, a innnasemnu pen anbuksung aom temta, puankhaina Hanger, Kawllukhu kung Umbrella leh Steel Mop tawn cihte tawh satgawp in, thahsawm cimawk hi. Malaysia Mutiara Damansara vengsung ah thupiang hi a, December 21 ni in innteeknu in nai 5 sungbangding nasemnu bawlsiagawp cih the Star Online inzong suaksak uhhi.

Innteeknu Rozita Mohamad pen kum 43 aphakhinkhat hi a, nasep neilo in Asthma nakna zong aneikhat ahihi. Hihbang in innnasemnu abawlgawpna hangin kisikna zong neilo, mawhzong kisalo ahih manin thukhenzum ah kamawhkei ci’n genkhia cilai sawnsawn hi.

Ahi zongin hih innteeknu amawhna kiciantak in aki lahkhiat theihleh khantawn thongkiathei ding a, khantawn ahihkei phiallehzong atawmpenpen kum 20 kiatheiding cihi.

Tulaitak in ahihleh innteeknu pen RM20,000 apiakkhit ciangin Bail tawh kikhahkik phot a, ahi zongin a Passport pen thunei te’n kepsak uhhi. Khasim in anaipenpen aom Police Station ah aki Report detding in thu kipia a, tuaban ah abawlsiatnu Ms Suyanti tawh hih zumvai asianmateng kimutheiloding cih thukham kipia hi. February 07 ni ciangin thukhenzum ah thusitna kineikik panding cihi.

Athu pianzia akikanciang in innnasemnu pen hihte kiangah innnasem in aomzawh kal 2 bekbek hipan a, asepcil akipan bawlsiat bekbek thuak ngekngek cihi. Nisim in bawlsiat thuakdenleng sipetmahding kahihciang ci’n December 21 ni in aomna innpan daikan in taisimding cih daitungah akahleh kia in hawkguam sungah khuaphawklo in om hihtuak hi.

Tuaban in avengte inn ah Security nasem in aom Security Guard khatin mukhia hi in, tuapan in hih nasemnu hong suaktathei hikik bilbel hi.

Nasemnu pen kisilkhuan zong pialo in, nikhat in an khatvei bekbek nesak cimawk hi. A innteeknu’ lungsim pen hunkhatciang hongkikhel lelsam inteh ci’n azia ngakngak hangin, phatuamlo ahih manin, anunung ah ataisimsawm ahihi.

Malaysia te zahtak Datuk khat ii azi ahi innteeknu zong hihthu Online Social Media tuamtuam ah aki thehthang khitciangin amahleh amah Police Station ah vaki ap cideep hi.

Nasemnu ahihleh zato ah kipuak a, zato pan atuahciang inzong Kuala Lumpur aom Indonesia Embassy ah kikem cihi.

Nungkum October khasung inzong Penang ah Cambodian Maid khat kha 7 sung gilkial dangtak in akoih nupa kopkhat sihdan kipia hi. Tua Cambodian Maid pen kum 24 bekbek hipan a, kha 7 sungtak gilvahlo in akoihban ah bawlsiagawp uhhi. Innteng nasepna panin asuahtak ciangin agikna 26kg bekbek pha cimawk hi. Tuahang mahtawh asawtlo in sipahmawk hi.

More: Hollywood Actress minthang Angelina Jolie leh Brad Pitt kikhending

Indonesia kumpi inzong 2009 kum akipan buaina thunawngkai tamlua ahih manin Malaysia ah innteeng nasemding puaknawnlo uhhi. Ahi zongin abeisa kum 2 hunlai akipan gamnih kumpi thunei te’n thukimna thak bawl uh a, innteeng nasemding Malaysia ah apuakkikpan uh ahihi.

Phawkkik khazel hang e, Singapore a ih sanggamnu Piang Ngaih Don hong thahlupsak te innkuan bangciciang ahi tamahdiam? ZD Sawltak #zomidaily