Malaysia ah thumanlo gamtatna hangtawh Doctors mi 7 kiman

Malaysia ah thumanlo gamtatna hangtawh Doctors mi 7 kiman

Malaysia gamsung ah Public Services Vehicle (PSV) Licences ngahtheih nadingin Bus Driver leh Taxi Driver pawlkhat cidammah uhhi ci’n thumanlopi in ciaptehna apia siavuan 7 te kumpi thunei te’n man uhhi ci’n theStar te’n genkhia uhhi.

Malaysia gamsung golhguknekte a siahsuahding kipawlna ahi “Malaysian Anti-Corruption Commission (MACC)” te makaihna tawh Penang State sung aom Gelugor, Batu Ferringhi, Bukit Mertajam, Prai cih khuate ah Tuesday ni nitaklam 3pm hunpawl in sitcianna nei uhhi. Hihmunteng aom Clinic 7 te asitcian uhciangin thumanlopi in Bus leh Taxi Driver te cidamna lam ciaptehna akipiaklam mukhia uh ahih manin, Doctors mi 7 akimat banah adang Clinic Assistant khatleh adang Clinic nasem pasal 2 zong kimankhia hi.

Hih akimankhia akigawm in mi 10 tepen akum uh 32 pan 74 kikal hi uh a, Malaysian Anti-Corruption Commission thukhun tawh kizui in thusitna neiding uhhi.

MACC kipawlna panin Director Datuk Abdul Aziz Aban ii genkhiatna ah hih Clinics tepen nungkum December kha pekpan in aki encik gige ahihi ci’n genkhia hi. Bus leh Taxi Drivers tampitak in Medical Test omlopi in, Medical Fitness Certificate ngahziauziau uh cih akitheih ciangin hih Clinics tepen kumpi thunei te’n a etcik gige uh ahihi.

Hih Clinics 7 tepen minthang mahmah hi. Banghanghiam cihleh Bus leh Taxi Drivers pawlkhat acidamlo te nangawn in hih Clinics 7 te lakah munkhat zawkzawk ah kilakziau in PSV Licences ngahtheih nadingin Medical Fitness Certificate ngahziauziau uhhi ci’n Director pa in genbeh hi. Sumzong tampi piasaklo uh a, Medical Fitness Certificate khat ngahtheih nadingin RM5 panin RM30 khawngbek laziau uh a, Medical Test pen bawltaktak nawnlo uh cihi.

Tuabangin acidamlo pipi Bus leh Taxi Drivers te hangin khuasungvak Passengers te adingin lauhuai mahmah hi ci’n Penang MACC ah akibawl Press Conference ah zanni in Director pa in agenkhiat ahihi.

Siavuan 7 tak akimat banah Certificate tuamtuam, Form tuamtuam, Receipt Book tuamtuam, Rubber Stamp tuamtuamzong tampi mankhia uhhi. Abeisa kum 4 panin kum 10 kikalsung avanzat tengkhempeuh uh aki matkhiatsak kici hi.

Doctors nabbed for falsification of medical fitness certificates

Hih Siavuan 7 tepen thusitna aki neihciankhit ciangin amawhna uh kiciantak in aki muhkhiatleh kum 20 ciangbang thong kiatheiding cih kiza hi. Siavuan pipi, Doctors pipi, pilna sangpi asinkhinsa pipi thumanlo in agamta natam veve mawk hi 🙁 ZD Sawltak #zomidaily