Malaysia gambup ah July 21 ni ciangciang gamdangmi akiman mi 4104 phakhinta

Malaysia gambup ah July 21 ni ciangciang gamdangmi akiman mi 4104 phakhinta

Malaysia gambup ah gamdangmi naseptheih nadingin Work Permit kician aneiloh akiman pen akigawm in mi 4104 phata cih NST pan kiza hi. Hih pen E-card kici Enforcement Card bawltheihhun Deadline abeizawh akipan Malaysia gambup muntuamtuam ah Immigration Department te makaihna tawh Operasi lut kawikawi in akiman teng ahihi.

July 01 ni akipan zanni 21 July zingsang 6am ciangciang gamdangmi illegal foreign workers akigawm in mi 4104 amatkhiat uh hi a, tuabek thamlo nasepnei Employer (Boss) zong akigawm in 89 kiman cihi.

Malaysia Immigration Department panin alianpenpa ahi Director-general Datuk Seri Mustafar Ali in agenkhiatna ah naseptheih nadingin Work Permit phalna kician aneilo te amanlang in hongki ap un. Nongki apkei uhleh hongki bengkhia veveding a, no adingin lauhuaizaw khading hi ci’n genkhia hi. “risk being hunted down”

Nong ki apding uhpen no adingin hoihzaw hi, banghanghiam cihleh hongki aplo tezong kizong veveding hi. Bangbang hamsatna aomphial zongin hongki matkhiatdong hongki zongteitei dinghi.

Malaysia gambup munkhempeuh ah “Nationwide crackdown” abanban in akibawl ngekngek hi a, suaktaktheih nading lampi omloding hi ci’n Butterworth khuasung Immigration Department Hari Raya open house ah Director-general Datuk Seri Mustafar Ali in genkhiamawk hi.

Tuabek thamlo Company pawlkhat te’n E-card kibawl hunlai in Agents (puaisa) tuamtuam zangsese uhhi. Tua athumanlo Agents pawlkhat hangin buaina tampi piangsakzaw ahih manin, tua Agent tezong abanban in matkhiattheih nadingin ki hanciamding hi ci’n genbeh hi.

Operasi thuthang ihgelh ciangin ih mipih te lauthawnggawp uhhen, pataugawp uhhen cih ngimna hoihlo “ill-intentioned” kihello, kineilo hi. Koimun koiveng ah Operasi lut ahih manin, tuazah kiman, eizong kidop huai cih theihsaknopna ahihi. Thupiangsa bek kigelhzaw in, apiang nailopipi, upmawhthu tawh koimun koiveng ah Operasi lutding ci’n mipite lauthawnggawp nading thukicianlo kigelhlo hi.

Related: Mitphial lakding kineih in nungak te nawi aban meksaksak khat kiman

Prophet kihilo a, koimun ah banghun in Operasi lutding cih 100% akician in kitheilo ahih manin, aki gelhngamlo ahihi. Ki mawhsaknopna tawh Comment ginalo honggelhgelh tezong ami kithei veve a, alungsim puakzia uhzong alaigelh tungtawn in kitheipah, kitelpahlel ahih manin lungdamhang. Zomi Daily panin ka thuthang gelhgelh tungtawn un lauthawngna anei khatpeuh aomkhak zenzenleh Sorry mahmah, lungkham sinkham nading Operasi thuthang sangin ciamnuih leh lungnop nuihzakna thuthang lamsang hahbawlzaw tani maw 🙂 Topa’n bitna thupha Zomi te tungah hong buaksuk tahen! Sawltak #zomidaily