Makai nahih leh tangthu gensiam kisam ~ Hau Za Cin

Makai nahih leh tangthu gensiam kisam ~ Hau Za Cin

Makai siam i cihte in tangthu gen siam na hi hamtang uh hi. Zomi sungah Pu Thual Zen bang a gen uh ciangin a kam gen peuhmah a za mite lungsim ah lut mahmah hih tuak hi. Lusei galkap makai a sem Laldenga bang zong Mizogam pen India pan suakta dingin tua hun ciang ei leh ei vai kihawm dingin i ut bangbanga ei deih bangbanga vai kihawm ding hi cih a gen pen mipi lawplua kisa kap ziahziah uh hih tuak hi.

Mipi mai ah tangthu gen siam khat pen a kim a pama makai sem dangte in zong muangpah, tung etpah uh hi. Mipite muhna a neisak thei tangthu gen siam, mipi mitkha ah a bawl theih ding uh lametna limpha lak siam hih pen makai dinmun ah a kisam khat ahi hi. Tua banga mipite lawpna ding leh mipite mailam ding a lak den thei i cihte pen makai gina khat zong na hipah uh hi.

A Kisam Thute Hilh Mengmeng Ding:

Makai khat i cih pen makaih mite in a theih dinga kilawm thute hilh mengmeng ding ahi hi. Mipi in thu a theihna tungtawn in nasepzia ding thei in sep ding zong lawp pah uh hi. Theihkholh om mello a sawl ciang beka theih pan pen mipi leh makaihte luvaisak hi.

Hih ding, ngaihsut ding a theih kei uh leh mipite in amau ngaihsuttawm thu tampi na kaikhawm manin pawlpi leh kipawlna deihloh lam bang zong na hi thei mawkmawk hi. Tua ahih manin kipawlna tup leh ngim, deihna leh ngimna, mabante limtaka genkhiat zaksak mengmeng ding ahi hi.

Thugen ciangin a hilh banglo dingin tangthu gen a a zaknop theithei a gen dingin mipite in tangthu zak banga za dingin lunglutna leh lawpna tawh ngai hithiat ding hi. Tua hi leh mipite in midang kiangah a genkik uh ciangin zong thupiak banga gen gamgamlo in lungnem taka hilh hiathiat ding uh hi. Hih bang tangthu gen siam pen mi khempeuh adingin abaih hilo a, kisin ding a kisam vive ahi hi. Makai khat a sem peuhmah in kisin hamtang ding ahi hi.

Hunlui Thute Hilh Ding:

Muhkholhna a nei dinga thu gen bek hilo in hunlui ah bangci in na kisem, bangthu teng piang, bangcih leh bangci cihte zong gen ding hi. Hunluite pen mailam ah kidop ding,kalsuan dan ding hong lamlak thei thute ahih manin tua bang thute gen ding kisam hi. Hunlui thu i gen ciangin mipite leh makaihpihte in amau lungsim ah ngaihsutna thak piangsaka tuate a hoihzaw a kalsuanna dingin kizang thei ahih manin manpha hi. Hunlui tuahphatna pan tuahphat semna ngahna ding, tuahsiatna ngeite pan kidop dan ding a lak thei thute siamtakin gen siam ding a phamawh thu ahi hi.

Thu Kigente Lungngaih Hamtang Ding:

Tangthu leh thuhoih tampi kigen thei napi a za a ngai mite in a lungsim vuah a vom takpi uh hiam cih pen theih kik hamtang dingin hoih hi. A theih kei uh leh, a tel kei uh leh bangci theihsak ding, bangci telsak ding, a lungsim vuah bangci vomsak ding cih pen ngaihsut ding a kisam thu ahi hi.

A tel takpi uh ciam cih theihna dingin semsak pah ding, a kigen bangin a sep ding uh nasep guan ding; tua hileh a sep theih uh leh septheihloh uh kilang ding hi. Ahih kei leh midang kiangah gensawn dingin hanthawn dingin en ngai kik ding. Semsuah pah, zangpah leng khuak sunga i kep thute kip pen hi. Bil tawh a za bek hilo dingin khut tawh semkhia pah, midangte hilhsawn thei pah dingin lungngaih hamtang ding ahi hi.

Khialhna Pan Mite Khialsak Nawnlo Ding:

Makai khat in ama khialhnate tungtawn in mite in a khialhlohna dingin a lah theih leh a thupi mahmah ahi hi. Tua ahih manin ‘hih bangin ka hih leh hih bangin piang hi’ cihte pawl zong a kisam tangthu ahi hi. Makaite khialhna pan a kidop ding uh mipi in a muh theih leh a thupi khat ahi hi. Tua bang tangthu in mipi lungsim zong zo in mipi in zong za nuam in bildawh uh hi.

Khatveivei makaite in amau tuahphatlohnate gen khia leh mipi in a muanna uh a kiam ding sa in ki-ip thei uh hi. A taktak in a hihna bangbang a imlo, a lungsim siangtho tak tawh a genkhia a kipuahpha mi khat pen mipi in zong a nungzui nuamsa zaw uh hi. Makaite thanemna muhpih leh mipi in thapia in tawsawn thei zaw a, makaite in a sel sawm, a pelhsawm den uh leh mipi in theisim ‘simtheih’ kha le uh a muanna uh kiamzaw thei hi.

Tangthu leh hunlui thu gen cih manin tuah khempeuh gen ding cihna hilo hi. Mipi in a phattuampih ding leh a kimuhna ding uh ahi thei ding thute bek gen ding ahi hi. Midang minsiatna ding leh midang neubawlna, midang kona, midang sukkhaknopna hanga gen cihte hilo ding hi. Mipi leh a nungzuite in a muhkholh theih lametna leh kingakna taak a neihna dingin gen ding bek ahi hi. Mipi lawpsakna ding bek a gen ding zong hilo in mipi in a phattuampih theih ding ahih hamtang ding ahi hi.

Tua ahih manin nang tangthu sung pan a meet pia thei ding tangthu – na tuah thute gen ding hanciam in. Tua banga tangthu hoih na gen ding ciangin zong nang leh nang nakpi in kisit kik na hih manin na nuntakna a tangpai theih nadingin hong lamlak khat suak kik hi. Mipi inzong metpih, nang zong kietkikna in zang – metpih, ‘meisel khat a lui nih de’ khanglui papite gente ahi hi. Zomi khangnote ading a kilamna ding suangcian dana kong at hi. Lungdam, Hau Za Cin