Lungsim picinna Maturity (Part 1)

Lungsim picinna Maturity (Part 1)

Mihing khat khantohna ah pumpi khantohna le lungsim khantohna ci’n nam nih a om hi. Lungsim khantohna ah a thupi nih in Sialepha khentel theihna (conscience) le lungsim picinna (maturity) te ahi hi. Tu in ahih leh lungsim picinna tawh kisai kong gelh khia hi.

Tuhun ah khangno pawlkhatte a picing ding tawh akibat hangin picinna van pawlkhatte manggilh kha uhi. Tuhun aa khangno te in ahih le nidang sangin thu thei zaw, thu tammu zaw uh ahih sam hangin lungsim ngaihsutna tawh kikop khollo thei hi. Amaute in a mau te neih ding kilawm picinna limlemel te theikha lo uhi.

Tony Campolo (sociologist) in “Eite in khangthak naupang bongsong te tawh a om khawm i hi kei zaw aa, hun tomno sung in thutampi athei thei naupang khangthak te tawh a om khawm ihi zaw in ka um hi.” na ci hi.

A dangkhat in ci leng bel, naupang khangnote in a pincin theihna dingun a kitomtom uh ahi hi. Amaute pen picin theih nading hun akisam tawh kibang hi. Ahang tampi lak ah thu khat in nulepa te in tate a dah ding, na a sak ding lau in kep luatna le ngek bawl luat na zong kihel hi. Hih in ahih le kauphe tangthu tawh kibang hi. Kauphe no khat a tuam (cocoon) panin a suahtak theih nading in naupangno khatin honkhia hi.

Ahih hangin a tuam pan a suakta kauphe in a len theih nading tha kicing neilo hi. Tua hi aa hih kauphe a tuam pan a suahtak nading hohkhiat na in kauphe mailam aading ahoihlo le agenthei sak thu ahih lam a nung ciang kithei pan hi.

Naupang (kum 13-18 kikal) gualte pen a tuahkhak, muhkhak uh thute tungtawn in a khuak uh zong hong kikhel hi. Hi bang thute ah bangmah ngaihsutna kician mel neilo in a ut bangun bawlthei, om thei mawk uhi. Hi bang gual naupangte pen Lungsim kikhel kawikawi (mood swings), genhak (uncooperative), muantheih aa omlo (irresponsible) cih bangin a om theihna uh zong hih khuak kikhel na hang ahi hi. Khat veivei ciangin, a thuakna (feeling) na ngawn uh zong banghang cih genthei lo uhi. Amaute khuak in naupang khuak panin upa khuak ah a kikhel laitak ahi hi.

Deborah Yurgelun-Todd (neuroscientist, Harvard’s Brain Imaging Center) genna ah “Khuak sungah paule aw tawh kisai munte pen kum 13 cin dong nawh khan mahmah in tuakhit ciangin khawl ta hi. Thule la khinkhai theihna, thu khentat theihna tawh akisai ahi khuak mai bawk (frontal lobes of the brain) mun pen kum 20 ma dong picing taktak nailo hi” ci hi. (Zingsol Laisim te aw, Lai tam lua in sim dan nopkei kha leh ci in khennih in ong khen ungh. Zingsol) Lai-at: Nk Khanno Ref: Psychology today.com, (The Mark of maturity by Tim Elmore)