Lungnopna gamla omlo hi

Lungnopna gamla omlo hi

Lungnopna a kizonna hih leitungah mi pawlkhat pen maitai lo uh a, lawpna zong nei lo in, amel uh en lehang leitunga om haksatna leh lungkhamna teng khempeuh a buppuak hileh kilawm liang zahdong in maigum in lunggim tuak uh hi. Anuih siusiau loh zawh uh akum bangin kivei khin leh kilawm liang a,beidon mel pua mahmah uh hi. Pasian in eite pen tuabang dingin hong piansak hi lo hi. A lungnuam ding leh a maitai dinga hong bawl ahihna ih mangngilh khak ciangin ih Pasian pen vantung tokhom nusia in ei mihingte lungnopna a bucingsak dingin hong kumsuk hizaw liang hi. A maigumden pa khat pen bang hangin hehtuak den mawk nahiam ciin dong lehang ” Ka maitai loh hangin a lunggim cihna hikeng, ka sungtawng muthei hi lecin ka lungnopna nong telpih ding hi” aci peuh om thei uh hi. Lungnopna pen selcip dinga Pasian hong piak hi lo a, a kizelsak ding leh mi tampite a lawh ding ih hih zawkna cikmah in mangngilh kei ni.

Tua leh lungnopna icih koiah om himawk ding hiam? Ei bat khak loh dingin a sanna munah Pasian in koih lo hi. LST in a genna ah ” This is the day the Lord has made, let us be glad and rejoice in it” na ci hi. Friday nipen nasemte adingin ni manpha hideuh se hi. Bang hang hiam cileh Saturday leh Sunday pen nasep kikhol hi. Monday ni leuleu ciangin lawp tak leh maitai taka zingtho kitam lo mawk hi. LST in ” Friday is the day the Lord has made …” bek na tuam cih lo a, ” This is the day the Lord has made..” na cizaw hi. Tua ahihman in TUNI pen ei ading in lungnopni ahihi. TUNI sungah lungnopna om a, a lo dingin dindel sese zong akul na hi peuhmah lo hi. Hong lungnuamsak dingte na kim na pamah om hi cih ciamteh in. Mite bangin hau in, pil in, hoih in, siam hileng bek ka lamet lungnopna ka ngahzo pan ding hi ci kha peuhmah ken. Mihingte deihna in ciangtan nei lo, mong nei lo ahihman in leitunga mihaupen na hiphial zongin na nuntak sungin na deih khempeuh na neikim zo ngei kei ding hi. Lungnopna icihpen na neihsate tungah lungkim theihna hilel hi.

Pasal khatin “Ka zi hawmthawh ingh” ciin zidang nei kha thei hi. Tua a zithak tawh a lungkim suak zo takpi diam? Ka lawmnu ka lawmpa in hong lungkhamsak den lua, midang apil zaw a siamzaw deih ingh na cileh asawt lo in na khelhna na tel pah ding hi. Tulai taka na nasep tawh na lungkim kei leh nasep naneih lohni ciangin na naseplui a manphatzia na tel thei pan ding hi. Na khat peuhpeuh ih neih laitakin a manphatna kithei lo a, tua ih neihsa khat ih mansuahni ciangin a thupitzia kitel pan hi. Ih lung hong kham pah hi. Tuamah bangin mihingte ih nuntakna ki enkik lehang a nungta laite sangin asi khinte kiphawk kingaizaw a, asi leh hong nusia khinte phawkna in la dawng tampi kiphuak hi. Hih in mihingten Lungnopna pen a omlohna munah zong kha hihang cih hong kilangsak hi. Lungnopna pen nang kiangah naitak in omden hi cih mangngilh kha kei in.

Tua hi a, tuni a kipan na neihsa na ngahsa tetawh ki lungnuamsak inla mi neihsa engin ki lungkhamsak nawn kei in. Nuntakna icih tomno sung bek ahihman in lungkim taka ih nuntak theih ding sanga amanpha zaw leh a thupizaw bangmah om lo hi. Na geia om lungnopna taisan in midang nadangte tungah, mun dangah lungnopna zon sawm nawn ken. Anu anga lum naupang khat pen lungnuam mahmah lel a, apa liangko tunga tu liklek naupangno in launa leh patauhna peuhmah nei lo hi. Bang hang hiam cileh anu leh apa muang mahmah cihna hi. Eizong Emanuel Pasian eitawh hong omkhawmden ahihman in lungnuam ni. Lungnopna pen ihkim ihpam ah om a, ei tawh omkhawm denin eisungah hong om hi cih ciamtehden ni. Lungnopna pen gamla om ngei lo takpi hi.

….Zomi Quavadis….
Francis Lamthang