USA gam, Oklahoma State, Tulsa khuapi a teng Pa Pau Khaw Lian leh Nu Ciin Nun Nuam te tanu Lia Ciin Sian Huai in a beisa April 26, 2016 ni Nitaklam nai 6:00 pm hun-in damlohna hangtawh a leitung nuntakna ong beisanta cihthu izakmanin Zomi Innkuan USA kipawlna in nakpitakin kidahpih hi.
Lia Ciin Sian Huai pen a beisa April kha 15, 2016 ni-in a nu gilsungpan asuak hi a, a suahkhitciangin zato siavuanten deihbangin cidam salo uh ahihmanin zato ah ong kepsak, ong khoisak phot uh himahleh leitung mipil misiamte in honkhiazo nawnlo-in tawntung Pakiang ong ciahsanta ahihi.
Lia Ciin Sian Huai nulehpate pen Zogam Tedim uksung, Anlangh khuami, Sakollam veng, Tedim khuapi a teng uh hi-in a beisa 2008 kumin nuntakkhuasakna a nuamzawding lunggulhna tawh USA gam ongtung uh ahihi. Lia Ciin Sian Huai ong nusiatna tawh kisaiin Zomi mipih, sanggam laizomkhat hihna tawh dahpihna lahna in Zomi Innkuan USA kipawlna in Pakkual khattawh mangpha khakna kineiding hi.
Lia Ciin Sian Huai tawh a nunungpen hunzatkhopna pen ong tungding April 29, 2016 (Friday) ni Sun 11:00 am hunin Floral Haven Crematory Funeral Home, Cemetery, 6500 S 129th E Ave, Broken Arrow, OK 74012 ah SDA pawlpi ngeina tawh sihvuina kinei ding hi.
Lia Ciin Sian Huai ong nusiatna hanga adah akap a nulehpa, a innkuanpih, tanau meltheih, sanggam ulehnau, behlehphung khuapihtuipih, pawlpimi khempeuhtawh a kibangin Zomi Innkuan USA kipawlna in kidahpih mahmah hi. I nauno ong nusiatna hanga adahakap a kuamapeuh ibiak vaanglian Pasian in a makiangpana ongpai a khasiangtho hehnepna ongguankim tektahen cihthu kongngetpih uh hi.
Dahpihna lianpitawh
Zomi Innkuan USA
Executive Committee
April 27, 2016
Comment piaknop aomleh...