Lengtong Late ka khumcil thu (azom)

Lengtong Late ka khumcil thu (azom)

Tualai hunin Mandalay – Rangon (kici lai) amanlang Meileeng kici a, mihing tuan’na pen Uppper class, First class leh ko’ Zomi lasa siam te’ tuan’na pen Odinary class kici a, a class dangte tuang khalo lel kahih manun Meileeng buppi sungah ko’ ading in anuam pen mun mah hipah lel hi. A hangpen… Miksi thovai lak nangawn siingdang kuamah a e’ng tuanlo te kahih man uh zong ahi hi.

Mannlay pan zan 9pm a dingkhia kahi uh a Zangkong zingsang 11am pawl in ka tung uh hi.Zangkong Buta (Rangon Rail Station) pipen ka muhsa Buta te tawh tehkak in”Nasia lua” himai. Buta pi pan a pusuah na kongvang pi pen thupi salua mahmah si leh amun lah zang deda lai ahih manin Zangkong aki cih pen hisan’ hilian inteh ci in ka lungsim sungah ka ciamteh khiikhee se hi.

Tua hunlian pen 1981 kum beikuan hi a khuavot in Lungdam’bawl gim anam hi.

Tulai hunbang hilo in Zangkong ah a teeng Zomi kitawm mahmah lai a, Zintun’ nading genvet loh vankoih pak nading nangawn a omlo himai hi. Ko nih pen Kamayut Ts,Sanyeikngein veeng (Tuahun a, a omna uh) U Lamh Cin (phamsa Agape lasa leh tulai KB tum siam Mungpi’pa) te’inn ah ka kinga thelthal phot uh hi.

A veeng kawl te’n, “Na mikhual te uh gam palakpan a hong pai ahia?..” na ci uh in, keilah gam palak pan hi takpi kahih cianga…! “Ke’nzong na veengte uh CID (Thauhlanyay) ahia?” cipong………! Hongci thei mah un teh Zangkong pen mundang sang’ i kiim i paam na siangtho zaw ahih manin I ciniin I puanniin te hong kilangh peuh mahin maw, kakhe ka et leh lawingawng nabang…………..!

A zingteh Thiri Yeikmon Pa Kap zintun’ na ah pai in Pa Kap kiangah “tungta ung” cih ka va theisak uh hi. Gan khahcil banglai, pau le haam siam loh tawh thuahlai kahih manun lakhum na Studio dawp ding nangawn ko ading in vai haksapi vive hongsuak hi. Zolai mal gawmthei sam kahih manin ka khuadak kawikawi leh STUDIO cih lianpi a kisuang khat kamu a… “UMang, hua’h Studio mu ing ei” ci in ka kisial deep hi.

Ka vadawp uh leh Mann kizaih na (Photo Studio) acih te nahi..ha! (UMang in hoh hongzui zawlai)

Tua banga lungmang a ka vakvak uh leh lamlianpi gei singphung khat ah, a khuata meel mahmah, a sam nangawn hiat ngeikei leh aki lawm khat na tu thelthal a, agil kial tuak mahmah lailai ahih manin, kozong ei’mi peuh hikha mawk in teh ci in ki muhmawh bawlpian a ka pai uh leh, sum neihtuak hongsa hi ding hiven amah’n hong hopih masa a “Lawmte koi sungpai di nom”hongcih teh kozong va nehphei in kaki hoho uh leh “Sihna ki Ngozo” pa nahi a tuani pan amah’n ka vaiding khempeuh uh hong vanpih theiding ci ahih manin amah an ka taih uh a, kozong a ma gei mah ah ka ne uh hi.

Zangkong a akum akha a avak vak pa’n a veilam khut tawh an hongne a…., kei bangin Zangkong ah veilam khut tawh an aki ne kasa pah zawzen hi A mah’n an zuak kawl nupi nu kiangah “Ko Zomi te veilam khut tawh an a ne minam hi ung” ci sawnsawn a, ko tenih akhial hong suaksak zaw hi. Ahi zongin tua ciang ka gencian kik theih nading un kawlpau ka keng khakei uh hi.

Tuahun lian in Zangkong ah Studio min thang 4. om hi. U Ba Thein (Ko Ye Aye) Studio, Tony Lynn Studio, Yaygaung May Studio leh Oasis Studio te ahi uh hi.

Tua Studio te minthang ahih manin Awng’… cih om ngeilo a khakhat khanih bang magen kholh(booking) kul hi.

Ko pen Lynn Studio ka booking uh a, Kumthak khanih kha kipat lam a khum ding ahi hi. A hang pen kumpi ah zong phalna (Censor) ngen kahih manun tua zong hu ngaih zek akul ahi hi. Phalna nambat ngah theih nading in ka lasak ding khem peuh uh kawllai a letkhiatkul hi.Censor ngetna ah zong a manlang ding ideih leh aphung tuibuah kul hi.

Tuhun khang te’n bel akisai khollo pi te nangawn “Limited in the Church” naci zaanzaan thei lel uh hi.

Lengtong Music Band pen 1980 kum a U Sua Mang (phamsa Pau Suan Mang; tuhun khang ading in phuah/ tum/ sak tawh a thuah Thein Khai’pa) kacih cih ii makaih na tawh aki phuankhia hi a, amah a BASS.., a ma nuai a anau Pau Thawn pen DRUMER.., Pau Thawn nuai a Go Hau pen LEAD GUITORIST hi in a mau Unau teng hipah hi.

Keyboard kinei zo nailo hi. Lasa peuhpeuh pen Hollow Guitar khat tawh kol kibulh pahlian a, Rhythm saipah lian ahih manin ka lawmte bel theikeng in kei bangin Guitar kuahlo a la aki sa theilo ding kasa phial hi. Mic bek tawi a lasa te ka enneu pian se a… Guitar nangawn sai theilo in la sanuam lai… kaci nongse hi.

Tualai hun in Ks.250 nei leeng Zangkong ki tungzo lua hi napi…, a Ks. 250 nangawn aki neizo hetlo ki himawk tazen hi. A Ks. 250 lianbek nei in pai leenglah I tun’ ni leh anngawl kipat ni ki tuaklian ding a.. maw..!!!

U Go Lian pen hongpai theilo cih itheihsa hi. PauThawn leh GoHau pen sangkah lai uh hi a, laivuan tawh kituak toto ding ahih teh ci in hong pailo uh hi. Tua ahih manin Music tum ding U Sua Mang bek om hiphot hi. T.S.Khai lah niangtui khawng duhin (or) a gilkhawng kial leh na Lead ziauziau thei napi’n.., Guitar tum leh Lead thei hetlo sese… vaisah ei’.

TS Khai mahin Lead tumding Cia Khai leh Drum sat ding Tiny akici (Cin Suan Mung) vacial.., U Sua Mang in ka kingak na ka innteek tangval no teng ahi, Lianpu, Gia Suan leh Khuptawng (KB Mungpi’ pano te) te kiangah huhna ngen.., Studio sunga hong makaih ding kawlte khanghaam Musician Ko Zaw Zaw.., Keyboard hong tumsak ding sanggam Deek te Ko Soe Moe (BBS) cih teng tawh kong kipat uh ahi hi.

La lep/taih ka kipat taktak uh teh…, Zangkong Judson College a laisin…, Tedim Lawibual veenga Khadawmi U Cia Pau’ innsap na Tadaphyu ah la lem in ata zahzah giak pahpah himai. A mah sun sungteng sangkah ahih manin ko adingin lalep na hong lem bilbel hi.

“TUN SUNGKHAT PAN PIANG HI NGEINGEI HANG E” la zong U Cia Pau’ innsap na sungmah pan a hong piang khia hi a Tg. Vum Nang leh a pawl te’n hongsa uh ahi hi.

Tuahun lai in CCR te’ lateng leh Beatles te’ la “LET IT BE” hailawh dekliang a asa sa U Am Pau acih khat zong Satpiang (Soap) bawlna Factory khat pan lawm te’n vatawm uh hi. Satpiang bawlna mun a naseem ding buangin apuan niin peuhmah hi.

Lasa ding numei pen ka zintun’ na te uh U Lamh Cin nau nungak te Lia Ppi’ (phamsa) leh Lia Lam Vung te unau in hong huh uh a.., hibang teng biaibuai kawmkal pan Lengtong Vol.1. hong piangkhia thei lemlem ahi hi.

Mihing icih pen neek le dawn mah aki samh hiding hiven, ka TSKhai uh pen singphung a TS Khai hong hi nawndek kei hi. Amah pen Zangkong khuasung a rickshaw hawl te’n zong thu adot uh nahi a, khuasung tel mahmah ahih manin vai khempeuh ama vaihawm hong hita mawk .., Pa Kap tawh direct a hong ki zom ta mawk ahih manin duhkhat deih khat nei lehang amah maibiak zawzek hong kul vialmawk hi. Ani ani in zong hong zol hanhan takpi hi.

Hibang a LENGTONG. VOL.1.,2.,3., bawl lai hunin Pa Kap te TAMU khua ah teeng lai uh hi. ZAMNU bang pen lampai thei pauthei cih hun hipan hi.

Lakhum ding teng a bupi zokhin ta in 1982 February 20, Zomi nam ni zong hongtung ding hita hi. Kum 34th cin’na Zomi nam ni zong, ka zin veeng mah uh ahi Judson huang sungah.., Chin Literature & Cultural Sub committee te’ makaih na tawh hong kibawl ding ahi hi.

Tualai hun pek in Chin Student te in, Chin state a teng leh kawl te’n Chin hongcih teng khempeuh in, Asho Chin te’ zat ahi, pasal ahih leh min mai ah Salai.., numei ahih leh Mai zangding cih thu khentat na ahilo, thu khensat na khat nei uh a, ahi zongin.., e’n ipu ipa neihsa gamh le gou… lia le taang nei khin ihih manin ki thukim zolo hi. Ei te in a mau (Chin) te banga zingmeh lim nitak meh lim peuh Min a phuakte I hihloh manin akizat pih zolo ahi hi.

Ahih hangin a “CHIN PHUNPI NI” taktak ciangin a Hun geelna ka et uh leh…. ko teng’ min zong…, lasa ding Salai Thang Sian Khai, Salai Pauno leh Salai Am Pau cih bangin min naki khum ahih manin ei lam sang naupang pawlkhat tawh kikum in… la asa masa pen ding TSKhai tawh nasia tak in Thu kaki vaikha uh hi.

Music Band pen E. Machine band te aki cial ahi hi. A nouncer pen Sihna ki Gozo sunga TS Khai lasak pihnu Lia Uappi hi deepsam napi, tua nitak in a thankik min pen Mai Magaret nahi nong zaw zen se hi.

Hun kipat zawh nai lang khawngding ciangin lasa dingin a nouncer Mai Magaret in a zawlpa Salai Thang Sian Khai lasa dingin hongsam ngawngaw ta hi. A thu kimuam sa mah bangin Taang TSKhai in zong lungduai takin a la hong sa hiathiat hi. A sak la pen Lengtong Vol. 1. sunga Tunnu Zogam hi a U Dai Mung (Munlai) phuah ahi hi. Hi hunlai Tunnu Zogam la thulu pen hi la lobuang adang om nailo in ka thei hi.

A lasak manciang in thu tawm honggen a.. “Kei kamin pen Salai Thang Sian Khai hilo hi. Taang Thang Sian Khai hi. Anouncer lam panin Salai Thang Sian Khai hong kicih pen khasia in naa ka sa hi” acih khit ciangin stage pan hong tuaksuk a.., I khua khangveeng lam te in stage nungmial lampan a laamtem te na ngatpah uh hi. A hici dingmah um a ki gingkhol sa a ki om ahih manin thakhat thu mahin ki ummpah phangphang a, PHUNPI NI taktak hongpiang hi.

(Tulian a Champhai a ateeng, Leisan Zo a sangsia aseem) vangteh Mungpu bangin TS Khai temta a ngat Mindat pa pen a khut langkhat bek zangh in, agawl meekkawm in na khaito man zen hi. (Mungpu pen atha gol, atun’ sang, asam bangpen anung lampan Negro te’ lu aki saphial hi. Kungfu kawnggak vom angah laitak hilai hi. A thatang hatngiat ahih manin Judson huang uumna sikkung aki zom nih pen akhut khattuak tawh asik kung lenin mihing thawl nading cia in kaak lian a zankim lam teh sang nau pang khempeuh in tawn ahih manin Mungpu lampi kici zawzen hi).

Tawlno khat sung kibuai ahih manin Anouncer nu zong lau in taimang hi. Ko zong la sa nawnlo in kaciah lel uh hi.

Hihthu teng ki veiilua ta ahih manin lia le taang cih pen a man’than’loh nadingin kepcing nopna lungsim bekbek ki ngaih sun ta a, Cassette (Khui) Cover tung ah LENGTONG kacih sawmziau uh pen lungkim zolo kahih manun…, lia le taang te’ neihsa Lengtong hi, Lengtong pen lia le taang te’ neihsa hi kacih nopluat man un… nidang a ka Cover te na enkik leucin “Lia le taang te’ LENGTONG” na kici teek teek ding hi.

Behlap na:

Chin akici mi (adiak in Khalkha te) peuh mah aneu alian ii lungtang ah Zomi aki ci limlim….hong hua, hong el, hong haza hong dem uh a,honggawt, hongnenniam hong nuaisiah zawh nading bekbek mah a mikim lungsim vuah a omlam tel mah mah ing.

Tua hi in Lengtong khui masa hunlai a ka phuutkhak uh pen tu laitak a CHIN le ZOMI banglian mahin SALAI-MAI leh LIA LE TAANG thu hi a.., akhang akhang a hongdo, hong langpan toto ding hita mawk uh hi.Vantung gam nangawn ah hong langpan laiding uh ahih teh thungen mi/hat deuh te’n tubang mah in Pasian tungah Complain kholleeng ci nuamphial ing

Lengtong Late ka khumcil thu hizah ci phot ni e, a patna hipan ai’h teh.

Mun Khai’pa