Lenggah zu thak thun nading savun um thak ~ Pau Sian Lian

Lenggah zu thak thun nading savun um thak ~ Pau Sian Lian

USA president dinmun tuhding Democratic party sungah a dem laitak ahi Buttigieg (kum 37) in a kidem pih Biden (kum 76) tawh kisai a genna khat-ah, “Tuma kum 32 lai-in California Democratic Convention ah Joe Biden (tua laitak senator) in khangthak te “meivak khaksawn ni” (pass the torch) ci ngeihi. Tudong tua ding mahhi.” a cih pen hong ngaihsut huai simhi.

A sawtlo hun lai-in ZCD party in khawmpi hong nei uh-a, by-law le Constitution kipsak ding cih kiza hi. Thupi mahmah hi. Na khat peuhpeuh ah a siam sa in suak omlo, a siam theilo leh a khial theilo mi zong ki-om tuanlo hi. Tua ahih manin party thukhun le by-law tungtawn in panmun hawmna te-ah party sung-a khangthak momno (numei, pasal) te pantah, munpiak siam ding thupi dinghi.

Hun tawh kituak in kikhelna kisam pelmawh a, thu dang khat-ah thu neihna (power/ position) cihzong zu, zatui zongsat (addict) bangin ki zongsang thei lua ahihi. Naungek te` diaper khek zeel huaina tawh a tehkak bang omhi. Zomi te` galpi pen Kawl-te, galkap te hi masa lohi. Thu pumneih nopna lungsim (dictatorship mindset) hi. Tua lungsim pen mi khempeuh in a vom thei lua hi.

Ahi zongin milui teng lawn khia gawp ding, cihna hilo-in hun tawh kituak in panmun lak, hawmsiam ding cihnopna hi. Tua hi keileh policy a hoih mahmah phial zongin, ki lamdanna omtuan khollo in a tawpna-ah minam bup supna naleng suak theihi. Zogam, Zomi tawh ki nahlawh party peuhpeuh hong taksuah semsem nak leh lah Zomi te hamphatna hi pahpah hi. Lenggah zu thak thun nading savun um thak kisam hi.

“New wine in old bottles” ?

Tuteng kipawlna-te khat le khat kizop dan le kipawlna sung-a mimal kizopna te ka-et teh itna le kideihsakna zong omsam naven tua sang khat le khat hamphat khopnop man-a ki pum panpihna (mutual benefit) zong omkhop kasa zekhi.

Tua pen win-win hi-in sia pah samlo napi, tangpi vai-te ah thuman thuthak (justice and morality) lian sang aituam hamphat khopna hong ultung zaw ahih man-in aituam kihuaina (exclusive) hong khauhzaw pahhi. A tawpna-ah nuhthial mipawl (elite class) cihkhat a kilam lam hong suakhi. Tua nuhthial te` thu neihna network hong zai semsem nakleh bel thumanna, liangko kikimna omnawn loin, mipi` supna tamzaw pahhi.

Topa Jesu ka zahtak mahmah na hang lak-ah thu khatin, amah pen (elite class) ahi Pharisees, Sadducee le a ki huai luailuai phadiak mihau thunei tengtawh kido velvel, kinial tangtang khat na himawk hi. Leikang tawh kizut hankhuk hi-uh teh ci-in ko giap-a tu hun bang hileh Topa Jesu pen anti-establishment taktak khat suakhi. Tua nuhthial te` neu-et mahmah numei, naupang, mihai le mimawh (grassroots people) tengtawh lah Topa Jesu pen na ki uitui mahmah sehi.

Miteng, kipawlna teng ban ko in langpan ding cihna zong hi tuan samlo, mutual benefit vai sang thuman thutak mah kan tangtang a tua mah dinpih ding cihnopna hi. Dinpih thugil (principle) omlo politic pen leitung ah lauhuai penpawl hi. Pau Sian Lian