Len In! ~ Tdkhen

Len In! ~ Tdkhen

Nidang lai-in England kumpipa’ tapa Prince of Wales pen Afarica gamah a zin hi. South Afarica gama khua khat Mafeking panin paikhia a, tai 600 bang a gamla, Bulawayo khua zuanin a pai hi. Tua banga meileng tawh a zinna uh lamkalah meileng set sungah tui thun dingin a khawl uh hi.

Tua banga a tawlngakh sungun kumpipa’ tapa in, “Kei ka khe tawh na paipai ning in nong phakna peuhpeuh vuah hong tuang ning” ci-in a pai hi.

Meileng in hong pha paklo-a, nisa mahmah ahihmanin a dang keu mahmah hi. Tua bangin a paipaileh lamnawl-ah sikkang tawh a ki um’ innkhat a tuak hi. A tualah tutphahsau tungah mikang piteek khat a tu hi.

Kumpipa’ tapa in va nai’ a, “Pi aw, ka dang keu mahmah, tui hong pia in” ci-in tui a ngen hi. Piteeknu in, “Tui duh na hihleh innsungah va lut inla va dawn in. Kumpipa’ tapa Prince of Wales ka muh mateng ka tutna pan ka paikhia thei kei hi” ci-in meileng a pang den hi.

Kumpipa’ tapa inn sungah tui dawn dingin va tum a, piteeknu ahihleh a tutna mahah meileng a gal’etet hi. A tuidawn khit ciangin piteeknu’ kiangah tu in, piteeknu in a hopihpih hi.

England gama teng ahihnate, pasal a neih thute leh kumpite innkuan man (photo) a neih thute, tua man a kilak laitakin kumpipa’ tapa (a kihopihpa) a ngeklai thute leh tua hun-a naungek khat pen tu-a khual hong zin thei a muhnop mahmah thute, a tutna pan mun dangah paikhialeh tua kal-a meileng in a khen khak ding thute a gen samsam hi.

Tua banga a kiho laitakun meileng mual hong suakta a, “Neukha vei hong khawlin padenpauh beekah hong dakkhialeh ut sing’ ee” a ci zungzung hi.

A kongtualah meileng hong ding takpi a, kumpipa’ tapa muthei taktak dingin a kilamen hi.

Tua banga piteeknu a buai keei laitakin kumpipa’ tapa in, “Pi aw kilen ni” ci-in a khut khak a, piteeknu’ khut napsak lai-in, “Pi aw, na tup bangin kumpipa’ tapa tawh kimu ta ciai” ci-in meileng tungah kahto a, piteeknu in mual a khup dongin a en niloh hi.

[Pasian’ Tapa Jesu tawh kimu nuam na hihleh na gei-ah dingin a khut hong khak hi. Len in; na khut hong napsak lai ding hi]. Tdkhen