Leitung ah Doctorate nam 4 om

Leitung ah Doctorate nam 4 om hi.

1. Earn-Doctorate

• Sum leh paai, thagui thatang bei lawh liang in in sin ciang a kingah thei ahi hi.
• Kum tampi mah sin kul in, a sin khempeuh zong zo khin lo thei hi.

2. Honorary Doctorate

Sinna hang hi lo, sep leh bawlna ah lawhcinna a ngah man in a kingah, hanciamna leh Pasian’ mizatn hihnate tung tawn i a gah ahi hi.

Sin pilna ahih loh hang in hanciamna leh cihtakna i gah ahih man in a pahtak huai doctrate khat ahi hi. Bang hang hiam cih leh sin pilna (earn-doctrate) i neih hang in Honorary Doctrate ding in a qualify lo zong tampi mah om thei veve hi.

3. Bought Doctorate

Hih pen sang zong kah kul selo. Lai zong sim kul lo. Sum nei leng thesis/ dissertation sum pia in ki lei thei. Hih pen a diakdiak Philippines khong bang ah sum tawh thesis bawl sak in kha 3 sung in a zawh leh tua zah cih dan in a thulu ki pia ziau in, sum tawh laibu lei a lei hi mai. A sang (school) ding in a min neilo leh sang dangte’ ciapteh pih loh min vawh ding in sang min khat koih pong thei uh hi.

Midang khat i lai bawl leh lai gelh pen ama gelh dan in a genna (plagiarism). A sang en leng lah a om tuanlo. Doctorate level kah kei teh, kah ngei kei teh cih dotna khat om zenzen leh bel a lah theih ding Dissertation om bilbel ahih amn in (sum tawh a leisa) bang mah lo sang hoih zaw veve.

4. Fake Doctorate

• Hih pen sum tampi zong lah bei kul lo hi.
• Sang zong kah kullo.
• Classmate cih zong om lo. Na classmate kua ci leng ong gen theih ding uh omlo.
• Online lah hilo.
• Computer based learning lah hi tuanlo.
• A doctrate kahna sang min gen ding omlo.
• Address om leh zong tua tak ah va pai leng bang mah om lo.

Hih a No. 4 na pen a tung a No. 1 ahih kei leh 2 na ah a qualify lo, a No. 3 na dan in sum tampi lah bei ngamlo te a ahi hi. Ei leh ei Dr. kici leng zong ong ki zahtak tuam cihna leh, a theilote in a tatak ong sa kha thei ding cih leh, tua Dr. min tawh an kuang 1, kuang 2 neh zon lawhna in kizang thei veve ahih man in bangmahlo sang lah hoih zaw veve hi.

Hih pen mite khemna ahih ban ah ei leh ei leh Pasian’ khemna ahih man in a sawt sawt ciang zuau in a khap tawn acih mah bang in amah leh amah zong ki um kik thei hi. Amah leh a mah Dr. ngah mah takpi mah a kisak theih na ding ciang lungsim (mental disorder) paikhialhna ah tun pih thei hi. Hih in thu man leh thu manlo khentel theihna ngaihsutna neih nawnloh na ciang dong hong tun thei a, Fake Doctrate i gah (fruit) ahi hi.

Note: Gamdang ah kum tam om mun khollo leh pilna siamna tam sin lo kahih man in ka tam theih kei a, ahi zong in Philippines ah kum 6 khong laisin in ka om pakna sung ah ka theih bat khat a tung a No. 4 Doctrate a ngah mi 2 a om lam ka theih pih hi. Nidang in a om ngeilo thu ahih man in Zomi-te khantohna nam khat ki behlap zong kici thei hi.