Leitung ah ahoih pen “na”

Khatvei lai inah limsuaih siam mahmah khat in leitung ah ahoih pen lim khat hong suai hi. Tua a limsuaih pen manbawng tawh hong tak tuamin gam khatlekhat kawmin khual hong zin kawikawi hi. A ngimna in leitung ah a hoihpen na khat muh ding cih ahi hi.

Nikhat a khualzinna lampi ah galkap hangsan khat tawh hong kituak hi. Limsuaih siampa in “Leitung ah a hoih penpen bang ahia?” ci in a dot leh galkap hangsan pa in “daihna (peace)” hi ci’n hong dawngkik hi. Galkap pa zong a dawnkik khit ciangin lampi dang ah hong pial san hi. Hih galkap pa dawnna hangin limsuaih siampa in hi thei salo in lungkim lo hi. Bang hang cileh a man tua “daihna” cih lim in a suaih theihloh man ahi hi.

Tua khit zawh ciangin nungak khat tawh hong kituak leuleu hi. Limsuaih siampa in zong tua nungak nu hong dong leuleu hi. Nungak nu in “itna ngaihna (love)” hi ci in a dawnkik na hangin limsuaihsiampa zong lupei in a lung hong kia pianta hi. Bang hang cileng a man tua “itna” lim in a suaih theihloh hang ahi hi.

Tua khit zawh ciangin thuhilhsia (pastor) khat tawh hong kituak leuleu hi. Tua thuhilhsiapa a dot leuleu ciangin “Cihtakna (faithfulness)” hi ci’n hong dawngkik leuleu hi. Hih dawnna in zong limsuai siampa hong lungkham sak mahmah leuleu hi. Tua “cihtakna” cih pen aman suai theilo mawk hi ven.

A tawpna ah cih na ding theilo in inn lam ciahkik ding hong khensat hi. A inn kong ah a tun ciang in “Papa..” ci’n a tano in kipak takin hong dawn hi. A tano maimit te panin luankhi te tak khelhkhelh kawmsa in “Papa.. papa ci’n a pa ang ah hong diang in, a pa hong pom hi. A tano nung ah a zi in hong delh pahin a maitang aa khua ul nelte nul sak kawmin a van hong dawn in, a biang hong nam hi. Inn ciah letsong hi ve maw.

Thakhat thuin limsuai siampa in a zonzon leitung ah ahoihpen nakhat thu hong tel lak hi. A tano kiang panin a pa tung ah a koih “Cihtakna” hong mukhia hi. A ngaihno i bawlna te tungtawn panin “Itna ngaihna” cihte hong mukhia hi. Tua itna ngaihnate sung ah “Khalum na” ‘Innkuan nopna leh daihna” te hong mukhia hi. Hi bangin limsuai siampa in leitung ah a hoihpen na hong bawl khia hi. Tua in a inn lo ngal a dang ah omlo hi.

Leitung ah thu hoihpen, na hoihpen te a gamla pi ah zon ding kisam lua lo hi. Tua te in nangma i lungtang sung ah a om khinkhian ahi hi.

Na daihna mun

Nop na sakna mun

Na itna mun

Na khalum na leh Na lawpna mun in Leitung ah nang aa ding a hoih pen “na” ahi hi.

Source: Zingsol