Lawp mahmahna leh ngimna hoih tawh nasep akipan uhhi ~ Hau Sawm Dim

Lawp mahmahna leh ngimna hoih tawh nasep akipan uhhi ~ Hau Sawm Dim

1. Nehemiah in Pasian kiangah antang in thungen hi. Thungetna tawh nasep kipan masa pen hi. Pasian’ huhna tawh ma kitun hi, cih phawk khial ngei loin Pasian liansak den hi. (Prayer/Glory to God).

2. Kumpipa kiangah thupianzia teng genin suahtakna ding leh gampuah kikna ding phalna ngenin van leh na kisam teng zong ngen pah hi. Pasian’ maipha ngah ahih manin kumpi maipha zong ngah hi. (Work with authorities).

3. Nasep a kipat taktak matengin a ngimnate gen thang gawp loin gen hun ding gen loh hun ding thei siam hi. Mite ihmut kal sungin khuapi sung khempeuh vel dikdek masa hi. (Survey/Research).

4. Nasep a kipat ding ciangin bang teng kisam en khol masa a, nunun ding leh masak ding khentel diudeu hi. (Plan/strategy).

5. Nasep a kipat ding ciangin Pasian’ mi siampi ahi Ezra tawh sem khawm hi. Pasian’ nasemte tawh pankhop siam hi. (Coordination/find the right people).

6. A geelna bangin sep ngam lah leh nawk ngam loh nei lo a, mipite tungah thu sun siamin lawpsak dan zong siam hi. Mipite in theih ding a kilawmte a theihna dingun hoih tak gen siam hi. (Courage/encourage).

7. Panmun hawm siam hi. Mite’ kivakna zui-in a panmun ding uh hawm siam, seh siam hi. (Management/Administration).

8. Pua lam pan leh sung lam panin langpanna nasia mahmah kawmkal ah a ngimna leh a geelnate hanciamin citak takin sem veve ahih manin lawhcing hi. (Discernment/determination).

9. Pasian, Kumpi, Siampi leh mipite a pan khop manin kuamah in khaktan zo lo a, a veina, a ngimna leh a tupnate taksuahsak zo hi. (Partnership/teamwork).

10. Nehemiah pen laymen khat hi lel hi, kici thei ding hi. Ahi zongin a nasepzia i et ciangin veina, lainatna, tupna, sawm tentanna, hangsanna, Pasian leh kumpi tawh kizop siamna, Pasian’ nasemte leh mipite tawh pankhop siamna nei ahih manin ni 52 sungin kulhpi puahphat nasep zo uh hi. (Vision/mission).

11. Lawp mahmahna leh ngimna hoih tawh na a sep uh ciangin kuaman khaktan zo lo a, ni tawmno sungin na lianpi sem zo uh hi. (Passion/patient).

12. Kulhpi ciang pha bek hi loin Pasian leh mipite kizopna zong puahpha uh a, kha lam khanlawhna lianpi piang hi. Tua in mihingte khat leh khat kizopna lamah zong kipuahphatna (Social justice/reform, transformation & economic reform) tawh kizom hi.

Nehemiah kammal thupi diakte:

1. “Hih thu ka zak ciangin tusukin ka kap niloh a, ni tampi sung an tangin, vantung Pasian kiangah thu ka ngen hi.” ‭‭NEHEMIAH‬ ‭1:4‬ ‭TDB‬‬.

“…Hong pai un, zahkona i ngah nawn loh nadingin Jerusalem kulh ciangpha ni,” ka ci hi. Tua ciangin amaute in, “Tu-in nasep kipan pah ni,” hong ci uh hi. Tua ahih ciangin lawp mahmahna le ngimna hoih tawh nasep a kipan uh hi.” ‭‭NEHEMIAH‬ ‭2:17-18‬ ‭TDB‬‬.

“Tua ciangin amaute dawngin, “Vantung Pasian in ka maa uh hong telhsak ding a, ko ama nasemte in nasep a kipan ta ka hi uh hi…,” ka ci hi.” ‭‭NEHEMIAH‬ ‭2:20‬ ‭TDB‬‬.

“Mite’ launa ka muh ciangin, uliante, mi ukte, le mi khempeuh tungah, “Amaute kihta kei un. Na sanggamte, na tapate, na tanute, na zite uh, le na inn na lote uh a dingin hong dosak, a lian a kihtakhuai Topa phawk un,” ka ci hi.” ‭‭NEHEMIAH‬ ‭4:14‬ ‭TDB‬‬.

“Kulh-a cian’ ding na a nawn mite in a khut langkhat uh tawh a van puak uh lenin a khut langkhat uhah galhiam tawi uh hi.” ‭‭NEHEMIAH‬ ‭4:17‬ ‭TDB‬‬.

“Ahih hangin keimah in, “Mi kei bangte tai ding ahi hiam? Mi kei bangte a suahtak nadingin biakinn sungah bu ding ahi hiam? Ka pai peuhmah kei ding hi,” ka ci hi.” ‭‭NEHEMIAH‬ ‭6:11‬ ‭TDB‬‬.

“…Tu-in ciah un. Anlim tuilim ne-in thadim unla, a nei zo lote zong va kholh un; bang hang hiam cih leh i Topa a dingin tuni pen biakna ni siangtho ni ahi hi; dah kei un, bang hang hiam cih leh Topa’ hong piak lungdamna in note hong thahatsak ding hi,” a ci hi.” ‭‭NEHEMIAH‬ ‭8:10‬ ‭TDB‬‬. Hau Sawm Dim