Lawhcin nading kong lianpi kihong ~ Rev. Zam Khat Kham

Lawhcin nading kong lianpi kihong ~ Rev. Zam Khat Kham

Banghang hiam cih leh kei adingin lawhcin nading kong lianpi khat hong kihon zo hi. Ahi zongin kei hong langpan tampi a om hi. I Corinthians 16:9 I nuntakna ah lawhcinna leh Pasian ading i kizat theih nadingin kong a kihon hun om mahmah hi. Mi tampite in tua banga kong kihongte mu thei lo-in haksatna vive-in ngaihsun thei uh hi. Tua bangin kong banga kihong hun hoih leh lampite i muh theih ding thupi mahmah hi.

Ahi zongin kong a kihon sim-in langpanna zong om thei den mahmah hi, cih i mangngilh khak loh ding thupi hi. Hun hoih hun pha khat i ngah simin haksatna tawh kizui khawm thei den-a, haksatna i cihte khempeuh ah lawhcin theih nading kong kihong zong om thei den gige hi. I muh theih loh manin thupha tampi kitaan lawh a, Topa’ hong laptoh ding i khahsuah hun zong om tham hi. Pasian’ zat theih ding mi tampite tua banga kizang kha lo tam mahmah ding hi.

Pasian’ sapna zong za uh, a kisapna zong mu-in, pai zong pai nuam takpi uh a, kong kihong zong mu takpi uh hi; ahi zongin lungkiat nading thu tuamtuam, langpanna tuamtuam hong om ciangin lawhcin nading leh Pasian’ zat theih nading a kong kihongte sangin haksatna leh langpannate bulphuh zaw kha uh ahih manin a kipiakkhiat nopna uh hong bei-a nasem taktak mi suak nawn lo uh hi.

Kum thak tawh kizom-in i lungngaih ding “kong kihong” tampi om hi. A beisa kum pen a nuam-a a nuam kei zongin a bei hi ta a, i mai ah kum thak in hong ngak gige hi. A beisa hun peuhmah kila kik thei het lo ahih manin a beisa thute hangin khuisasa nawn lo-in a beisate a beisa banga i nusiat theih ding zong thupi mahmah ding hi (Phil. 3:13). I mai a om “Kum Thak” pen i lawhcin nadinga hong kihon thak “kong” banga i ngaihsut ding kong hanthawn nuam hi.

Bang “kongte” hong kihon ahi hiam? Hong kihon kongte’ lakah, Pasian tawh kikholhna ah nopsak zawkna “kong” zong kihel hi, ci-in ngaihsun ni. Thu um lo mi khat adingin thupi khol lo kha ding hi; ahi zongin thu um mi khat adingin Pasian tawh kikholhna sanga thupi zaw om lo hi. Ni sim-in Laisiangtho sim-in thungen-a i nuntak ding kisam hi. Pasian tawh a tawntunga i kiho ding, i kikholh ding thupi lua mahmah hi. Kong hong kihon ahih manin lut pah ni. Khahsuah kei ni. A beisa kumte sangin Pasian tawh kinai zaw-a i nuntak ding kisin ni.

Tua ban-ah, Pasian’ ading kizat theihna kong zong hong kihon hi, cih i phawk ding thupi mahmah hi. I leitung nite a bei kuan ciangin i nuntakna en kik-in Pasian ading a kizang thei ding pipi i kizat khak loh khawng peuh i kisik khak ding dahhuai mahmah ding hi.

I Topa kianga i tut theih ding mi tampite’ tung ah hotkhiatna thu gen het lo a leitung nate buaipih-in leitung thu leh nopsakna zongin i thapaih khak ding dahhuai ka sa mahmah hi. Tu laitaka thupi i sak mahmah nate Pasian’ gam i tun hun ciangin thupi het lo ding ahih manin tua hun cianga i muhzia ding bangin tu laitak mahmah-a i muh theih ding kisin ni.

Na khempeuh a sia lam vive-a mu mite in lawhcin theih nading hun hoih khempeuh ah haksatna vive mu uh a, a hoihlam vive-a mu mite in haksatna kawm kal ah lawhcin nading hun hoih mu thei uh hi cih thu kigenna “A pessimist is one who sees a difficulty in every opportunit; whereas an optimist sees an opportunity in every difficulty” cih kammal hoih khat na za ngei kha ding hi.

Tu kum­­ – 2013 kum – peuhmah haksatna veive i muh kum hi lo-in hun hoih hun pha (opportunity) vive i muh kum hi sak ni, ci-in kong hanthawn hi. Pasian in thupha hong pia-in hong zang tek hen! (Tedim EBC pawlpi khangnote’ khasim laihawm EBY Newsletter, January, 2013 adinga ka gelh hi. ZKK) Rev. Zam Khat Kham