Lau kei in! ~ Tdkhen

Lau kei in! ~ Tdkhen

DIANE pen nungak hoihtak leh a melhoih khat hi a, Khristian University sangah a kah hi. Sang khak sung a khua ah a ciah hi. Nitak khat a lawmluite kiangah a hawh hi. Holimin ciah hak sim ahihmanin khua a mial ta hi. Ahizongin a inn uh gamla lua-lo ahihmanin a mah bek singnuai ah thu ngen kawmkawmin a pai hi.

Lam kim a tun ciangin mikhat amah a ngak hileh kilawmin lam gei ah na ding hi. Diane in zong a lung nuamlo pah a, a hizongin nawk’suak’ kul ahihmanin thu ngen samsamin a paipai hi. A thunget sungin khamuanna nei-in, a ompih om hileh kilawm a sa hi. Tua bangin lam gei-a dingpa a paisan thei ta hi.

A zingsang ciangin tadensa kihawmte’ sungah, a zanitak-a a pai na lampi ah numei khat kibuan cih thu a sim kha hi. Tua tadensa a muh ciangin a zanitak-a a mimuhpa phawkkha ahihmanin Pasian’ tungah khitui luang ziahziahin lungdam’ a ko hi.

Tua ciangin numei kibuannu hehpihhuai sa lua ahihmanin ka huhtheih khakleh ci-in, palik(police) station ah pai-in a zanitaka a tuah thu a va gen hi. Palik(Police)te in tua pa a theihtheih nadingin mihoihlo a ciaptehnate uh a en sak kawikawi hi.

Diane in zong a zanitaka a muhpa tua ciaptehna sungah na om takpi a mu hi. Tua tungtawnin migilopa a kiman thei ta hi. Palikbu-pa in zong Diane kiangah gennop na nei hiam, ci-in a dotleh Diane in, “Hih pa thu tawmkhat dong nuam mah ing” a ci hi. Migilopa’ lamah kihei phei a, “Zanitakin bangcia kei hong su lo na hiam” a cihleh, migilopa in, “Pasal nih tawh hong ton hilo na hiam” ci-in a dawng hi.

Tua thu a zak ciangin Diane lungsim ah, “Topa, ka lau ciangbekin hong sam hiveng maw, hong maisak in; ka hunhoih ciangin zong hong ngai den ta ning ei Topa” ci-in a khitui a kham zo kei hi. Tdkhen