Langzang khua ah ZBCM Board of Management Meeting

Langzang khua ah ZBCM Board of Management Meeting

A 17 veina ZBCM Board of Management Meeting (BM) Langzang ah nuamtak kizo siang hi. Thukikupte pawlkhat le photo pawlkhat a nuaia bang in kong khah khia hi.

Motto: Pasian Thumang

1. Maikum 2019 BM pen Tamu Baptist Church (Tamu TVBA) hiding.

2. ZBCM gambup neih Lai Siangtho sang ZTS in tukum 2018 June kha pan kipan M.Div ciang kikhanto tading hi. M.Div pen English Medium tawh hiding in Degree pen USA ah kipia ding hi. Tuition Fee Kumkhat Ks. 500,000/-, leh Mess Fee khakhat Ks. 30,000/- hiding hi. (Note: Scholarship ki siau thei ding hi.)

3. 2018-2019 sung Gambup Mission nasep na ah Kawl khuate ah nasem ding Missionary mi 70 kuan khia ding hi.

4. 2018-2019 sung Gamsung Mission Nasep na ah Zomite omna khuate ah nasem ding in Missionary mi 12 kuan khia ding hi.

5. ZBCA hanciamna tawh ZTS Lai Siangtho sang huang ding Kalaymyo huamsung ah Leitang Acre 3.03 kilei a huang min dingin Zomi Education Center kici ding hi.

6. ZBCM pianzawh Kum 25 Cin (Silver Jubilee) pen 2020 kum teh ZBCM Huangpi Kalaymyo ah nasia takin bawlding kigel khia hi. Hih hun sungah Chief Guest dingin BWA pan GS pa le APBF pan Secretary pipa kisam ding hi. Sial – 25, Bawng – 25, Vok – 25 le Ak nikhat – 25 nek sawm Ak – 250 tawh mipi a tulsawm asim kivak ding hi. Hih ading piakkhiatna zong BM Delegate tung kidong pah a Ks. Tein 1000/- kingah khia zo pah hi. Zam 25 pen 25 vei aki tuakin tum ding in zong kigel hi.

7. 2018-2019 ZACC mintawh Laigelh kidemna le Zomi Idol 2019 nei ding kigel hi. Laigelh kidemna ah Thulu ding “Ciampello itna” hiding hi.

8. ZBCM in kum 23 khit zawh ah Kawlgam kumpi ciapteh Convention hihna official in kingah nathu kilungkim mahmah a gambup zum Tengah suantek ding kigel hi.

9. ZYA makaihna tawh Zomi Tuiphum Kikhente akang kipawlna a om theihding ci in Zomi Baptist Leaders Summit (ZBLS) pan a kipan ZICC i kip toh sak Zomi Tuiphumte kipawlkhop ding vai pen ZBCM BM bupin kitheihpih in makaite gelgel na bangin gambup in kithukim hi.

10. Chin State pan Vuangyi Pu Paulun zong ZBCM BM ah hong kihel thei in Langzang-Pangsak kikal lampi neu lua mahmah ahih manin kumpi tung Budget ngenin hanciampih nopna thu pulakna zong hong nei kawm thei hi.

11. 2018-2019 Budget gelna ah

• Ngahna ding Ks. 580,615,231/-
• Zatna ding Ks. 571,956,719/-
• Sumcian ding Ks. 8,658,512/-

Kam Suan Mung
From, Langzang, Zogam.