Lamzikpi kannadingmun tawnkhalo ahih manin papi khat mawtaw in taihlum

Lamzikpi kannadingmun tawnkhalo ahih manin papi khat mawtaw in taihlum

Malaysia, Kota Kinabalu sungah tuzingsang in papi khatin lampi akan laitak mawtaw in taihlum cih NST pan kiza hi. Saturday (Mar 04) zingsanglam 6:14am hunin Jalan Tuaran kici lampi tungah thupiang hi a, aphukha mawtaw pen SUV (Sport Utility Vehicle) namte ahihi.

Asi papi pen kum 62 aphakhin Lee Thien Yu akicikhat ahihi. Azi tawh lamkankhawm uh hi a, azipen amai ah paimasa ahih manin mawtaw in taihkhalo bilbel hi.

Ageipan atheician te genna ah hihte nupa pen lamzikpi alanglam aom Bus Stop zuanin lampi akan uh cihi. Tua geipan in 100m agamlakna munkhat ah lamkan nadingin lei “Overhead Bridge” kidawh himahleh tua lei tungah tawnlo uh a, lamzikpi kantan sawmziau uh cihi.

Bus Stop omnalam azuak laitak in Toyota Tortuner SUV mawtaw khat hattak in ataikhat in papipa nawkkha in sipah hi. Limnawkkhak mahmah a, alu zancip in apumpi tawh ki khenkhia cihi.

Kota Kinabalu Police te’n aluanghawm pen Queen Elizabeth Hospital ah Postmortem bawlding in puaksak uhhi.

Ataihkha mawtaw hawlpa pen kum 37 aphakhin khat hi a, palik te’n manin thudotna nei uhhi. “Section 41(1) of the Road Transport Act 1987” thukhun tawh kizui in thu kibawlding cih kiza hi.

Police Chief khatpa in khuasung mipi te’n lamzikpi kanding ciangin mitotnading in akibawl Overhead Bridge te aom nakleh tuate panin lamzikpi kantangtangding, tuaban ah Zebra Crossing akikoihna te panin lamkanding cih mipi vaikhakna nei hi.

Mawtaw hawlte zong pilvang in, Speed Limit khenkhak hetlohding vaikhakna neihi. Adiakdiak in sanginn omna vengsung te ah mawtaw pen Speed khiap hamtangding genkhia hi.

Lampi kanciang kidop huai mahmah hi cih athakin aki phawkphasak hini. Overhead Bridge leh Zebra Crossing te zuih kisinni… ZD Sawltak #zomidaily