Lai Siangtho Kilamzia leh Lamdanzia

Zomi tampi tak in Lai Siangtho ki lamzia leh alamdanzia a thei khin
tampi om mahta leng pawl khat gawm tuahin lamdang kasakzia pawl khat
kong puaknuam hi. Na ngaihsutna khempeuh Pasian thubu Lai Siangtho
lam-ah a ki hong masa dingin thu kong zawn hi.

Lai Siangtho pen khang 60 val (kum 1,600) hun sung, mi 40 val bangin a
gelh laibu ahi hi. Hih laigelh te zong pen apianna kibang lo uh hi.
Pawl khatte kumpi hi-in pawlkhatte pen Galkap, Gabeng, Lagui gelh
siam, gamthu tawh kisai mipil, pilna neite, siampite leh kamsangte cih
bangin minam tuamtuam gelh laibu ahi hi. Amau lunglut man leh a uk man
peuh uh tawh a gelh uh hilo hi.

Hih laigelh te in Asia, Africa leh Europe cih mun tuamtuam panin gelh
in, Hebrew pau, Greek pau leh Aramic pau cih te tawh gelh uh hi. Ahi
zongin amau gelh thu te adeihna ki tukalhlo in, hotkhiatna thutawh
kisai thute a gelh uh hi. Lai Siangtho bu a gelhte minam tuamtuam leh
pau nam tuamtuam hi-in mun tuamtuam panin gelh hi tase leh a deihna, a
ngiimna thu te bangci- in kituak thei diamdiam uhhi.

Leitungbup ah a kikhawng pen laibu in Lai Siangtho ahi hi cih Zomiten
zong i za kha hi. Laibu tampi te pen a tul-a sim, pawlkhatte pen tul
sawm a sim, pawlkhatte pen teng sawm cih bang a sim theih dingin ki
khawng hi.

Ahi zongin Lai Siangtho pen kum khat in awn 150 val bang kikhawng ding
ki lam-en hi. Kum khatin a tawm pen awn tulli val bang ki khen hi.
Pau 2,000 val tawh kilet khia hi. Tuhun ciangin Zomiten Zolai ngiat
tawh zong i gelh ziahziahta uhhi.

Lai Siangtho tawh a kibang laibu omlo hi. Hih laibu sung ah Pasian thu
um leh umlo tawh ki sailo in asim nop ding thu pawlkhat kihel hi.
Pasian thu umlo thuthuk theinuamten zong asim tampi om hi kici hi.

Ahi zongin Lai Siangtho pen tampipi kikhetna hangin Lai Siangtho pen
maan cihna hi pahlo hi. Lai Siangtho pen aki khawng penpen laibu ahih
ban-ah Pasian thubu taktak ahihna a gen nuam ihi zaw hi. Hih laibu
hoihna na thei hiam? Zomite sungah Lai Siangtho sim nailo pi-in Lai
Siangtho “kithei” sak in hoihlo, hi ci-in a gente lakah khatin na
kihelloh ding kong deihsak hi.

Lai Siangtho pen Pasian gelh laibu ahi hi. Biakna dang te Lai Siangtho
bu pen mihing te’ gelh hi-in, amaute in Pasian hong genthute ka gelh
uh hi, ci uh hi.Ih theih dingin Bhagavad Gita pen mihingte’ gelh hi.
Mohammed thu a theite in a gelh uh ahi hi. Mohammed thu a theite in
amah sih khit ciangin Koran gelh uh hi. Mormon laibu zong mihing gelh
mah hi. Zomi sungah Laipian te Lai Siangtho zong mihingte gelh mah hi
ci-in ken ka pom hi. Zomibup in a pom diambel thei keng. A maute in
hih laibu pen Vantung mite in pakan sungah hong pia hi, ci hi; Mary
Baker Eddy in Christian Science, Science and Health with the Key to
the Scriptures, first published by Eddy in 1897 laibu gelh hi.

Lai Siangtho pen adang laibute tawh kibang lo-a, Pasianin mihing te
tunga, a gen thute a kigelh ahi hi. “Pasianin gen hi” ci-in Lai
Siangtho sungah 3,000 val bang kigelh hi. Adang laibute ah hihdanin a
kigelh na mun khat beekah i mu hiam? Lai Siangtho sungah mihingte in
gelh, bawl, zem hi cih omlo hi.

Hih thu ka-et khit ciangin, “Lai Siangtho pen Pasian’ kamal hi, cih
theihna dingin a kilak thei ding hiam?” ci-in kei leh kei dotna ka ki
dong hi. Tangthu, ngeina, pianzia, leh kamsangte ka et ciangin Lai
Siangtho pen Pasian kammal hi, cih theihna ding tampitak ka mu hi.

Tuahangin Lai Siangtho pen Pasian kammal hi, ci-in ka pomthei pah hi.
Pasian kammal hi ci-in i theih a ki panin Lai Siangtho thangngaihsutlo
in a thupi pen a zahtaak baang penin Zomibup in i zat ding ka deih
mahmah hi.

Hih thu Mark Cahill gelhna tung tawn pan leh ka phawk thu pawl khat
tawh gawm khawmin kong gelh khia hi.Lungdam

Thawn Tuang
Zomi Angvan
Dec 14,2014