Malaysia, Kuantan zuanin apai palik mawtawkhat tuahsia in palik mi 2 si

Malaysia, Kuantan zuanin apai palik mawtawkhat tuahsia in palik mi 2 si

Malaysia gamsung aom East – Coast Highway lamzikpitung aom KM183 munah palik mawtaw (Patrol Car) khat tuahsia hi. Tua Patrol Car pen sangnaupang te laivuanna Exam Paper (SPM 2018 Exam Papers) akipuakna mawtaw ii amai ah amakaih “Escort” in Kuantan khuapilam zuanin atai laitak in atuahsia ahihi.

East – Coast Highway lamzikpi tungah Bentong panin Kuantan zuanin ahattai mahmah laitak in tuahsia a, tua Patrol Car sungah atuang palik nih ahi Roslan Maon leh Watson Anak Edin tepen aphual ah sipah uhhi.

Tua palik mi 2 tepen Pahang Police Headquarters ah Duty alut laitak uh hi a, SPM sangnaupang te ii laivuanding athupi mahmah Exam Paper apua mawtawkhat amakaih laitak in tuahsia in asi uh ahihi.

Atuahsiatzia pen lamzikpi panin pialkhiatloh nadingin akidalna Guardrail pen amauzat mawtaw tawh nawkkha hi. Tuaciangin palik khatpa pen mawtaw sungah ki kilhcip in, akhatpa pen apualam ah ki lawnkhia hi. Anih un tuahsiatna aphualzang mahah sisuakpah uhhi.

Tua palik atuahsiat nihte ii aluanghawm pen Maran Fire & Rescue Department te’n hemkhia uh a, anih in Hospital Jengka ah Postmortem bawlding in puaksak uhhi.

More: Traffic Police Officer khatin puteek lamkantheilo khat anungzang ah apuak laitak Video kithehzak

Hih palik te tuahsiatna pen lamzikpi tungah guahzu in lamzik kawt, nellua ahih manin, atuahsia uh hiding kici hi. SPM Examination pen hongtungding November 13 ni ciangin Malaysia gamsung ah akipanding hita hi. Sawltak #zomidaily