Kua tawh kiho nawn ding? ~ Pau Khat Suan

Kua tawh kiho nawn ding? ~ Pau Khat Suan

Feb 1 a Misokte’n ukna buluh ding a hanciam nung in mipi thukim lo, sang siam hetlo in nakpitak langpan hi. Mi tampi si le nai luang in, nuntakna a tul a sim beilawh khin a, Zogam milip zah nih valbang galtai, kihem, omna kician neilo, genthei tak in nungta hi.

Tuabang hun sia, misokte’ suksiat, kawmkal ah COVID 19 hual 3na thahat tak ong kipei ong kizial sawnsawn a, kidopna tawm, kikepna kicing lo cihte hang in mi tampitak na in, tampi tak sikhin hi.

Hihbang in ki-ukna hunsia leh pulnatna hualpi khit ciang, kialpi in ong zui lai ding cihpen muhkholhsa ahi hi.

Hihbang dinmun pan nuntakna a ngei a ngeikik ding cih pen manglam nangawn a a piang theilo ding bang zah in i mailam mial in, i ma bing mahmah hi. Misokte’ bawl a kha 5 kha 6 sung a a kisia khempeuh dinkik ding cihpen a pualam pan huhna, panpihna, kep le khoi, thapiakna cihbang a om kei leh ei’ tha tawh haksa leh gamla mahmah ding dinmun ahi hi.

Tua ahihman in gamdang gamlian tampi tak leh gamvengte in gamsung ki-ukna a hoihkik theihna ding in kigalbawl leh kidemna paisan in “kiho kikum” ding cihpen nakpitak ngaihsutna pia in, alang alang tha pia uh hi. Mipi’ teel tangmite leh mipi mahmah in kiho ding cih san’ hak a sak kawmkal ah tu in Misokte in tua a kihopih ding uh mipi’ teel tangmi MPte’ MP hihna phiat in, 2020 kitelna result phiatbei uh hi.

Kiho pih ding a mipi in a deihloh kawmkal ah, a hoih zaw ding ahih leh mitsi teeitaai a kiho theihna ding lampi neu ciuciau (or) khauzang neu ciuciau (or) khuavak neu ciuciau khat a om sunsun nangawn amau Misokte mah in tuabang a om theilo ding in khaktan, sutat, khakbit uh cihtheih ahi hi.

Kiho ding hiphial mah leh amau kua tawh kiho nawn ding? Mipi’ sik le tang a a ding thei, a kihopih theih ding uh a omthei sunsun a hawlkhia uh ahi hi.

Mipi’ teel mipi’ tangmi MPte’ tung pan official a thukimna (or) nialna bangmah om nailo, Misokte’n khukdin in thuum phial mah le uh zong a hopih noploh leh kikuppih noploh ding kawmkal ah amau hoh phiat zawsop sawnsawn uh hi.

Tua ahihman in a kihopih ding uh a om nawnlo hi a, kiho kikum kilem a daihna leh bitna lamkik ding cih bel a piang nawn vetvet lo hita hi.

Khatpan bel khutkuak khat dim lel ( 1% sang a tawmzaw) misokte leh a kaih-zatamte cimawh mahmah ta uh cihna in kingaihsun thei hi.

More: Aung San Suu Kyi apumpi zaw “Paralyze” ci’n zuauthuthang ki khahkhia

A omlai lampi bel nakpitak kigalgikna, kidona tawh ki-thallot a kikhelna piangsak ding cih bek a omlai ong suak hi. Kiho, kikup, kileptuah tawh piang nawnlo ding a, amau a kihopih dingte nial masa mawk uh hiven.. Kua tawh kiho nawn mawk ding? Pau Khat Suan