Korea Gam le Mi te: Zomi khat ii muhna pan (8) ~ Cope Suan Pau

Korea Gam le Mi te: Zomi khat ii muhna pan (8) ~ Cope Suan Pau

Chuseok 추석 Anlak Pawi le Zomi te’ Khuado Pawi
Tutung Korea Khamtung mi te’ tuktun’ anlak pawi thu nung in ih gen khin zo hi. Tu in Zomi Khamtung mi te’ Khuado in hong zom leu leu hi. Zogam Khamtung bek hi nawn lo-in, leitung mun tuam tuam ah khuado ding ih ki sak keei lai tak ahi hi. Korea te’ anlak pawi le Zomi te’ khuado pawi [pawi cih pen Kawlkam pen Zomi te in zong ih zangh hi. Ei Zomi te zong Tibeto-Burmese mi mah ki hi a, Kawl pau tawh kibang, kinai kammal tampi ih nei hi] pen kibang in ka ngaihsun hi. Bang hang hiam cih le Korea te’ Chuseok pen Korea ngeina animism sung a Shamanism ngeina pan kipan a, Zomi te’ Khuado zongh animism Zo ngeina sung mah pan hong kipan khia ahi hi. A nih mah un dawi thoihna ahih kei le dawi biakna tawh kisai hi.

Tu hun ciang in dawi thoih nawn lo uh a, Christian biakna sungah Pasian phatna in kizangh ta hi. Korea te in nidang in a pu te uh kha bia in thupha dawh uh a Ancestor worship ki ci hi. Tu in Protestant sungah tua ngeina pen zat ding kham uh a, Catholic sung ah kham lo uh hi. Chuseok le Kumthak hun sungin mi khempeuh a khua uh ciah a, pu pa te’ han ah pai in an nek pawi nei uh hi. Korea te in Catholic te pen Christian in sim khol lo lel uh a, Catholic te in zongh Christian ka hi uh ci ngam pha lo mawk uh hi.

Zomi te in ahih le ancestor worship tatak bel nei lo dan ahi hi. Dawi siampi te in dawi thoih niloh ahi hi. Anlak hun ciang in khua do ci in khua sung a dawi le kau pan kipan ahoih lo khem peuh do uh ahihman un Khuado ci uh hi. Zomi te Christianity ah a convert tak uh ciang in a sangmang to te’n Khuado pan kipan ngeina sung a zu neak sa neak le lamna lasakna ngeina hoih khempeuh pen gal aih sa aih te tawh kibang in phiat [Kawlkam] sak gawp khin mawk uh a, Zomi Christian te in a ngeina uh bang mah thei nawn tatak lo uh hi. Ngeina sung ah Christianity khang lo zaw a, ABM te American ngeina dan le RCM te French le Italian te dan pian khat in a ngeina culture uh kilaih uh hi.

Korea mi te ahih uh le a lifestyle uh pen Westernized mah mah ahi ta zongh in Christianity sungah a mau’ culture le tradition tampi keem cing uh hi. Confucius lifestyle pen Sen te sang in lim zuih zaw uh a, tu hun in neo- Confucianism pen tu hun Christianity sung ah 100% phial zangh cih ding ahi hi. Gentehna in, Pawlpi sungah pastor pen kumpi hi lian a, a ma thu thu hi pah hi. Elder te’n pastor nasep deihtak panpih uh a, deacon le deconness te pen panmun len sawl tangzang ahi hi.

Pastor pa/nu ngaihsutna le vaihawmna bang bang nial lo in thalawpna tawh seppih in ma pang uh hi. American te’ “ladies first” ngeina khawng zui vet lo lel uh hi. Family based mah mah uh a, innkuan pen thupi sak mah mah uh hi. Biakinn sung khawng ah a innkuan, a innkuan in tu khawm uh a, biakinn sun an nek ciang zong a mau innkuan teng mah tu in ne khawm lel uh hi.

Zomi te’n tu hun ciang, Khuado pen Zo ngeina sung pawi khat in zat kipan kik uh a, Christian suak kum 100 le Laipian kum 100 [Laipian biakna ahi lo] cing ta ahi hi. Laipian Zolai le Laipian biakna zongh kum 100 mah cing khin hi. Tu ni in Zomi sungah Laipian biakna mi mal bang zah a om lai mah tam maw? Zomi te’n Zolai pian kum 100 cin’ pawi Tulza khua ah bawl khin zo a, Tedim ah zongh bawl lai ding ci le’ng; Zolai Ni ih nei hiam? Khuado ni e, ih nei hiam? Korea mi te in Anlak khuado ni pen lunar kha 8 kha lik ni zan in pawi bawl uh a, Korea lai ni Hangul Nal pen Solar kha 10 ni 9 ni ta in bawl uh hi. Ni pi kal sung mun khempeuh ah lan [gam dial] khai zihziah uh a, minam laimal pianna muak na in nei uh hi.

Korea te’ Lai ni Hangul Nal pen 1446 kum a Sejong the Great kumpi pa bawl Korean lai mal le mal gawm pian ni ahi hi. Korea lunar kha 9 kha sung hi a, Solar Gregory calendar ah October ni 9 ni in ciangtan uh hi. North lam te in bel, January 15 ni in ciangtan uh hi. Zomi te’n ih Laipian Ni bang ni ih ciang tan diam?

Korean lai ni thu a detailed zaw in zom lai ni… Zolai ni le Khuado ni muakna in, [aban zom lai ding…] Cope Suan Pau