KL – London vanleng tungah zukham kopkhat hangin kibuaigawp

KL – London vanleng tungah zukham kopkhat hangin kibuaigawp

Kuala Lumpur khuapi panin London khuapi zuanin aleng Malaysia Airlines tungah zukham kopkhat in buaina piangsakgawp cih the Sun UK pan kiza hi. Tutna mai ah akikoih TV Screen akitam panin buaina akipan hi a, tua Passenger kopkhat te’n vanleng nasem te kogawp uh cihi.

Vanlenghawl Pilot inzong Kuala Lumpur ah kilehkiksawm in, ahi zongin London khuapi zuansuakthei uh a, London atun ciangin tua zukham tegel kimanpha uhhi. Tua zukham tepen apasal Anthony Grant kici a, Musician khat hi in, kum 27 aphakhin khat ahihi. Anumei pen Carola Conti kici a, National Health Service Worker khat hi in, kum 26 aphakhin khat ahihi.

Amaupen nupa akiteengkhin cih hilo a, ahi zongin lawmkingai nupa bangin aomkhin uh hihtuakzaw hi. Kuala Lumpur panin London pen vanleng tawh nai 13 sungbang akileng hi a, tua vanleng sungah zukham in tutna khawng benggawp, azudawn khawnguh theihthanggawp in kitomgawp uh cihi.

British Newspaper te genkhiatna ah hihte lawmta in March 07 ni in Malaysia Airlines sungah Cabin Crew te kogawp, otsangawp uh ahih manin London, Heathrow Airport atunphetin kimanpah uh cihi.

Malaysia Airlines vanleng ahawl Pilot pa ii genkhiatna ah vanleng kahawlzawh kum 37 phakhin a, tua hunsung ah hihbangdan vanlengsung nawngkaisakna ka tuakngeikei cihi. Vanleng ii Safety lunghimawh ahih manin, Emergency Diversion bawlin Kuala Lumpur Airport ah kilehkikding ka ngaihsunman cihi.

Vanleng sungah atuankhoppih Passengers te genna ah hihte lawmta in zu dawndawn uh a, gamlum mahmah uh ahih manin vanlengsung ah atuang adang Passengers tezong nawngkaisak mahmah uh cihi. Vanleng nasem Cabin Crew te’n agamdaihding uh agen hangin lehko zawsop uh cihi.

Hih Malaysia Airlines pen Passenger mi 494 bang atuangthei hi a, tua vanleng sungah zukhamsa in azuihhang, midang te lauthawngsak “Threatening”, vanleng sungah nasem Cabin Staff te tungah akilawmlo in gamta cihte tawh thu akibawlkhin, aki mankhin ahihi.

More: Mexico vanleng tung khatah gul ahinglai kimu

May 09 ni ciangin Isleworth Crown Court ah thusitna kineikikding a, kum 2 tuakbang thong kiatheiding cih kiza hi. ZD Sawltak #zomidaily