Kipumkhat nadingin nungzuihoih kisam ~ Sia Kung Za Mung

Kipumkhat nadingin nungzuihoih kisam ~ Sia Kung Za Mung

Makai hoih i neih khit ciangin nungzui hoih kisam leuleu hi. Mi khempeuh makai ngeingai cihbang om theilo a, makai om loin mi khempeuh nungzui vive cih zong om theilo hi. Makai om in nungzui zong a om kul hi.Nungzui in makaipa’ tutna tuh kul lo hi. David in Sawl kumpipa that zo ding hi napi, kumpipa’ tungah khutkhial nuam peuhmah lo hi. A hun a tun ciangin ama thah sese kul loin kumpi Sawl hong si a, David in kumpi tokhom luah hi.

Moses a hawmthawh, a langpante zong amau dinmun kitel lo te ahi uhi. Nungzui ding kimlai makai ut uh ahih manin leitang in valh tum hi. Lucifer tangthu zong i theih ciat ahi hi. Nungzui peuhmah in makai dinmun buluah sawm kei ni. Makaite a ginat keileh Pasian in a hun a tun ciangin hemkhia lel ding hi. Makai khatin a thudot mite tawh a hoih pen dingin a khensat sa thu pen nungzui pa in zuih zawh ding kisam hi.

Zomi sungah thu kigen khat sangin a hoih zaw ding, a thei i om den mahmah haksa lua hi. Na khat peuhpeuh a hoihna leh a siatna a kithuah khawm den hi a, makaipa’ thugen a siatna lam zongin i nial denkeei pen i khialhna hi zaw hi. Nungzui i hih lai teng i ngaihsutna hong kidong ahih kei nak leh bangmah kamtam se dah ni. Hong kisawl ahih leh thumang ni. Mi tamzaw thukimna tawh thu kikhensat sa pen eima ngaihsuttawm thu tawh a kituak khol kei zongin ‘man’ zawh ding thupi hi.

Nungzuipa in makaipa’ thannemnate selpho loin panpih kul hi. Makaipa i cih zong mihing mah hi a, gen baang hamtang ding hi. Hoih mahmah phial lehzong makai ahih manin ki encik phadiat dinga, a mawhna kizong zong ding hi. Tua bang hun ciangin nungzuite in makaipa a thanem loh nadingin panpih kul hi.

Nungzui lak panin makai kiteel ahi hi. Mi khat peuhpeuh abul a bal in i tel luatte kithupi muh theilo dih mawk hi. Topa Zeisu nangawn a khuapihte in thupi sim lo uhi. I lawm khat makai hong suah ciangin, nidang lai a, a ginatlohnate peuh gengen a, simmawh ding hilo hi. Nidangin bang bang ahi zong, tu in i makaipa hi ta hi. A neu lai a kahnehna, nap a tolhna, a zawnna, khuata pan ahihna … cihte koko kullo hi. Amah pen ei sangin picing zaw ahih manin Pasian in makai dinmun ah koih to ahi lam phawk gige ni. Ei zong makai i ut leh makaite ko in, i dodo sangin picinna lam manawh zaw ni.

Makai a haksat mah bangin nungzui sep zong baihlo hi. Zomite sungah min le za deihna hangin biakna leh leitung thu ah i phuatkhiat pawl leh kipawlna tuamtuam tam simsim om ta hi. Mai lamah zong kiphuanphuan lai ding hi. Makai suah ding a tumte in nungzui hoih suah sawm photphot ni. Nungzui i hih lai-in i makaite peuh i suksuk leh ei makai i suah ciangin, nungzuite langdona mah i thuak kik zel ding hi.

Tua ahih manin Makaite’ lamlahna nuaiah Zomi khempeuh in “Takkheh” ci-in khut khat tawi, khe khat khai a bang lianlian thei dingin i biak Topa Pasian in thupha hong pia ta hen! Sia Kung Za Mung (Ciimnuai Pilna Sawm)