Kipumkhat nading makai muanhuai kisam ~ Sia Kung Mung

Kipumkhat nading makai muanhuai kisam ~ Sia Kung Mung

Zomite i kipumkhat theihlohna khat pen zuihtaak i sak makai kician a om loh man ahi hi. Ei tek thupi kisa in makai vive ut zelzul ihih manin mipi in a cih nading theilo hi. Zomite Nasepnate ah ei le ei tha i kipiakngam loh pen i muan zawhloh man ahi hi. Muanhuai hileng eile ei banah midangte nangawn in tha hong pia ding hi. A phuan (founder) min peuh kituhin, na khat peuhpeuh phuan ziauziau in i nungzuih nawn kei mawk hi. Hih thu hangin Zomi khatin thu le la khat hong phuan khia leh kibawm ngam pah lo a, “Hong kipan phot un, na dan uh hong en phot ning,” hong kici ta hi.

Makai lutang khatin suplawh ngamin sih dong a thuak ngam ding kisam hi. Muang taka i teel makai khatin haksatna themno khat hangin hong tawp ziau mawk ciangin makai picing ahihloh lam kinung phawk pan hi. Tawp cih thadah a lungkiate tha pia in, zol a, a kip sak ding hizaw lai hi. Makai in thu langmuh lo ding hi. Zum ah thu nei mite zong alangpa bek gen sak leng piang theilo hi. Khat veivei alangnih un hong gen nangawn uh khensat hak lai hi.

Lawmte hazat man peuh,maipha muhnop man peuh tawh makai tungah thu langgen in, makaipa in a kigen khempeuh a up laimawk leh tua kipawlna kisia ding hi. Mi a khia khia thei i cihte zong miginalote na hi zaw hi. Makai in mipi zahtak ding hi. Mipi a om manin makai aomthei ahi hi. Mipi te in bang lunggulh, bang deih lo cihte pulaak khuan om sak ding hi. Kuamah in thu hong kuppih kei leh makaite kingaihsut huai hi.

Mipi a lungkim lua na hi khollo a, i gen zongin, i gen kei zongin kibang lel, a mau khensaksa a omgige hi, a ci na hi zaw thei hi. Hih ciang dinmun hong tun leh mipite pen makaite’ tungah lungkim nawn hetlo uh a, a nasepna uh ah mipite thadah mahmah hi. Hih kipawlna pen cina zawngkhal tawh kibang tahi cih hong lak hi.

Makai khat in gensiatna thuak zawh ding kisam hi. Singkung hong san ciangin huihin mut kha phadiak hi. Zomite diakdaik pen ciltui kailiangin mi a gensia nuamdeuh pawl ihi hi citciat hi. Gen sia cih ciangin i hihna sangin asia zaw, a ginalo zaw a genna ahi hi. Hih gensiatna hangin thanem hetlo a, i sepna ah maan takin sep ding hi lel hi. Makaipa in deidan neilo ding hi. A pil a siamte in mun a ngah takpi ding kisam hi. Makai dinmun nangawn ah ei sangin a siamzaw, mipi’ deih zawk aomleh i mipite khualna tawh tutphah awn ngamding hi hang.

Gamh luah bangin midang i ot noploh teh buaina piang hi. Panmun khatah sawt omlua leng hong kicimtak hamtang hi. Makai hi zel, mipi hi zel leng mipi’ deihna kitel siamphadiak hi. Makai khat pen lungtang khauh kisam hi. Gilo ding cihna hi lo hi. Khak tanna, langpanna te ah lungkia hetlo in tupna mun atun dong lungsim hangsan takin ding ngam ding hi. A langkhat ah mipi tawh kizoipna ah migi in nunnem mahmah ding hi. Pasian’ hong piak talen kibang lo hi. Mi pawlkhatte makai, ukna za pia hi. Pawlkhat leuleu nungzui hoih, makaipa’ koppih ding dinmun pia hi.

Thu khat peuh ikhensattheih leh makai talen hi a, hong kisemsak nasep khat hoih takin i sep theih leh nungzui talen ahi hi. Hausa ut manin khua sat ziauziau kei ni. Founder & President ut manin pawlpi phuan ziauziau kei ni. Min deih manin kipawlna phuanziauziau kei ni. Koi ci zuun ding cih geel masa phot ni. Makai leh sia vive ut khin le hang a kua teng nungzui mipi hi nawn ding ahi hiam? A zenzen in tu laitak Tedim kampau Zomibuppi makaipi ding (amah leh amah kipia a hilo) mipi in a teel hi leng zuihtaak muantaak na sak makai ding om na sa hiam? Sia Kung Za Mung (Ciimnuai Pilna Sawm)