Kipilsak kici – Nang e?

Kipilsak kici – Nang e?

Kipilsak – cih kammal zatna ah “kipilsak” cihna athuak a ngahkha mi nampi nih in kikhen thei hi.  1) Mite in “pil leh thei” a cih ding utna tawh tello pi, thei taktak lopi upmawh sansat a, a pil leh a thei kineih… 2) Thei takpi, tel takpi a, a theih a tel thu tangtak a a gen apau ciang, a kawi vilvel pawlkhat nawkgawp kha a, nawk’ a thuakkha pawl in a thuaklah vilvel….

“Kipilsak” ong kicih nak leh hih nihte lak ah khat teitei kihi hamtang pian hi. Tua ahihman in i gen thu i theih i tel takpi ahih ding thupi a, ei mimal ading bek hilo, a kisai kha mi tampite’ noptuamna ding, phattuamna ding, hoihzawkna ding.. etc lunggulhna leh ngaihsutna tawh i gen ahih ding thupi ding hi.

Thuman ahi tateu zong in phattuamna a piangsak lo thu pawlkhat genloh hang phamawh khollo lel hi. Thuman hi a, phattuamna a piangsak ding ahih leh ip huailo leh ahi bang a gen ngam ding kisam hi. I gen thu i up takpi leh i nuntakpih takpi, kiptak a i dinpih i tel sitset thu ahih ding kisam hi.

I theih leh i tel sitset thute ahi zong in, i upna leh i ngaihsutna thute ahi zong in, i theih i tel bang a i gen ciang, mi pawlkhat in cihna ding theihloh man leh ong neubawl nop man in “kipilsak” ong ci uh hi.

“A kipilsakna bang hiam?” Cih dotna kidong kik hileh siksan kician dawnkikna cihbang zong om tuanlo zel hi.

Tua ahihman in mi khatpeuh “kipilsak” i cih ma in kipilsak i sakna athu ala, ahang i telcian masak ding zong kisam hi. Tello, cianlo, theilo pipi mi khatpeuh thu vakhen mawkmawk a “kipilsak” cihna pen ” ei a kipilsak zaw hihang” cih zong phawkhuai a, tua dinmun ah tua kipilsak i sak nu/pa sang a zumhuai zaw a kipilsak zaw i hihlam zong theih huai, phawkhuai zel hi.

A taktak in bel mipil taktak leh lungsim hoihte in midangte’ thugen limtak ngai in thukpi ngaihsutsak uh a, midang khat peuh “kipilsak” ci in mawhpaih thukhen ngeilo uh hi. Tuabang mite’ mai ah kineih tawm leh upmawh thugen pen a zumhuai mahmah na hi gige hi.

Midang khat peuh bangci bang in na mu hiam? Bangci bang in na ngaihsun hiam? Bangci mi hi ci in na ciamteh hiam? Tua na muhna leh na ngaihsutna ii alang sang a tamzaw pen ama’ hihna hilo zaw in, nang hihna hizaw hi. Pau Khat Suan