Kipawlkhop Hun Hilo, Kipawltheih Hun Hizaw

Kipawlkhop Hun Hilo, Kipawltheih Hun Hizaw

Kipawlkhop ih sawm hangin tanglai pek panin tuni dong mahin Pawlkhat ih hi khawm thei nai kei hi. Tua kipawlkhop lohna pen kipawl theihloh nading na hilo gige hi. Kipawlkhop lohna pan kipawl theihna a kisam ih hi a, kipawl theihlohna pan kipawlkhopna kisam ngei lo hi. Kipawl theihlohna pan kipawlkhopna kisam hi, a ci mite in hih bangin thu hilh uh hi, “Ih kibat nateng la ding, ih kibatloh nateng hemkhia ding, kibatloh nate gengen hun hi nawn lo, mi tawh kipawlkhop hun hi ta” cih thu hilh belin nei uh hi.

Gentehna, “Jesuh Khrih bek cih thu khawng zong gengen hun hi nawn lo” ci uh hi. Lai Siangtho sung ah bel Jesuh in “Keimah in Lampi ka hi a, Thumaan le Nuntakna zong ka hi hi. Kei hong suang loin Pa’ kiangah kuamah tung theilo ding hi,” ci hi. John 14: 6. Lungdamna thu ii a tumdanna thu (the uniqueness of the Gospel) ih gen masiah Kawlgam ah Pasian in nalian ong sem lo ding hi. Lungdamna thupuak ii a laigilpi in biakna dangte tawh a kibatlohna tua Jesuh Khrih le a Singlamteh (Christ and Him crucified) thu gen belin neih ding na hi gige zaw hi. For I decided to know nothing among you except Jesus Christ and him crucified. 1Cor. 2: 2. A tumdan banah Jesuh’ sungbek ah a kiciangtan tua Hehpihna hanga Upna thu pen kideidanna om lo a ih tangko ding ahi hi. We preach the exclusive Gospel inclusively.

Christian Pawlpi te pen leitung thu tawh a kipawl khawm ding ih hi kei hi. Leitung tawh kipawlkhop ding ih sawm loh sa in zong leitung mi mahmahte ih hi khin zo hi. Christian khempeuh zong biakinn khat ii khutnuai bekah kipawlkhop ding hi lo hi. Biakna le Pawlpi kibang lo hi. Biakna in biabia a, Pawlpi in thu zui hi. Pawlpi pen thu ummi, thu zuimite’ kikhopna ahi hi. Pawl tuamtuam ah ih omna pen kipawl theihlohna ci-in ih ngaihsun kha thei hi. Eimau’ pawlpi’ upna le kalsuan zia ciat tawh cidam taka om tek a, gam thu le minam thu ah ih kipawl theih diamdiam ding a kisam hi bek hi. Na kipawl sawm hangin na kipawl thei tuan kei veleh. Falam te Falam, Tedimte Tedim, Hakate Haka, Kawlte Kawl hi lel hen. Kawl va suah kul kei. Tedim Falam Haka va suah kul kei. Va kipawlkhop zong kul kei. Ih hihna bang ciat tawh a kipawl theite ih hih ding thupi zaw.

Tua ahih manin AG/RC/Tuiphum pawlpi sung bekah kipawlkhop kul se lo a, eimau’ pawlpi doctrine ciat tawh citak taka om a, a kipawl theite ih hih ding hi lel hi. Pawlpi phuan cih le Pawlpi phut cih zong kibang lo hi. Pawl phuat ding hi lo a, pawlpi phuh ding ahi hi. Pawlpi a kiphuh beh ciangin lungdam ding hi a, tua a kiphut thak pawlpi hangin kipawl theih loh nading thu om lo hi. Pawlpi phut cih pen Christiante adingin nasep thupi penpen vaiphuak khat ahi hi. Church planting is very important in our Societies. Sawtvei a kimang ding nasep khat in singno suan ding ci hi. Sawtvei a kimang zaw nasep in pilna taw ding ci hi. Sawtvei a kimang pen ding na ut leh Pawlpi phut in ci-in, Mangkangte in paunak nei hi. Pawlpite khat le khat ih kibat nateng kaikhawma ih kipawl neunau se sangin ih kibatlohna ciat tek kemcing kawmin a kipawl theite ih hih lel ding thupi zaw hi. A diakin biakna diangte peuh mah tawh a kipawlkhawmte ih hih loh ding kidop huai mahmah hi. Tua bangin Upna thu le zuihna thu ah ih kipawlkhop loh hangin ih leitung ci le sa kiukna le khantoh nadingah a kipawltheite ih hih ding pen Christiante’ vaipuak na hi leuleu hi.

Rom. 12: 2=> Do not be conformed but be transformed (Leitung tawh kipawlkhawm lo ding, Pasian’ kammal LST tawh kipawl khawm ding): Kipawlkhawm cih teh kipawlkhop lohpih ding om cihna hi pah hi. Kha Siangtho tawh na kipawlkhop leh khamtheih guihtheihte tawh na kipawlkhop loh kul pah hi. Tuiphum pawl na hih leh Tuiphum doctrine na pawlpih kul a, AG pawl na hih leh Tuiphum suangdaldoctrine na zuih pih kei hi. Hih leitung ah Christiante zong mawhna le a gu in hong khoihkhoih lai ahih manin tua kikhoihkhoihna kikhemkhemna pen ih daal phat mahmah ding kisam hi. Tua pen eimau’ Pawlpi ciat ii doctrine thei sitset a, tua doctrine pen a kibatloh pihte tawh va kipawlkhop sak ding, va gawmkhop ding va hanciam kul lo zaw a, kepcing natawh leitung mawhna, ze-etna le thuhamsa thute ih nan zawh ding ahi hi.

Doctrine om lo a cite in midangte’ doctrine thupi loteng peuh a zuih pihpih doctrine neite suak veve uh hi. Doctrine nei lo a, amau ut bangin a gamtate tawh kipawl khawm kei in. Tua banga a gamtate Pasian in khahkhong vet thei hi. Tua pen phalna hi loin khahkhongna hi a, a lauhuai dinmun hi ta hi. Khahkhongte peuh ih hi kha hiam cih kisittel huai veve ta ka sa hi. Mite in a maan ahi Pasian’ thu ngaihsutin nei nuam lo uh ahih manin amaute’ ngaihsut hoihlo bangin a gamtat theih nadingun Pasian in a khahkhia hi. Romans 1: 28. Christian thu ummite pen ih leitung lungtang a kilaih piangthak mite ih hih manin ih nuntakna mahmah zong a kipawlkhawm nawn lo a siangtho nuntakna neite ih hih ding kisam zaw hi. Tua zia tawh Lungdamna thu na hilh lecin kipawl theihna hong piang zaw ding hi. Kipawlkhop sawm kei inla, kipawltheih sawm zaw in.

Evan. Suang Dal