Kindergarten naupangno kepna sanginn ah Bomb puakkham hangin mi 8 si, 65 liam

Kindergarten naupangno kepna sanginn ah Bomb puakkham hangin mi 8 si, 65 liam

China gamsung aom naupangno te akikepna Kindergarten khatah zanni Thursday ni in apuakkham om ahih manin, mi tampi si in, aliamzong tampi omhi. Hih apuakkham pen Kindergarten sanginn gei mohkizuakna khawngpanin Gas bungkhawng apuakkham hiding ci’n aki ummawh himahleh Bomb aki sukham cimawk hi.

Chinese Police te’n apulak khiatna ah tua Bomb asukhamding in aki ummawhpa pen kum 22 aphakhin khat hi a, asi mi 8 te lakah tuapa zong kihel cihi.

China, Jiangsu Province sungah zanni in apuakkham hi a, Police te’n aphual ah hoihtak in sitcianna nei uh a, CCTV khawngpan in hoihtak akankhiat uhciangin hihpen Bomb akisukham ahihlam mukhia uhhi.

Bomb asukhampa pen amin Xu cihciang bekin ki pulakkhia a, Bomb pen aomna Apartment innsung ah abawltawm kici hi.

Hihpa pen Quanshan District, Xuzhou City panin Jiangsu Province ah akituah hi a, hih vengsung mahah nasem in aomcip cihi. A innsaapna inndei sungteng zong Police te’n hoihtak zonkhiatna nei uh a, khuttawh agelhtawm lai pawlkhatzong mukhia cihi.

Zanni Bomb puahkhapna munpen Feng County sung aom Chuangxin Kindergarten kici naupangno te kikepna sanginn khatah ahihi. Nitaklam 4:50pm hunpawl in apuakkham hi a, mi 8 asih banah adangzong mi 65 bang liamgawp uhhi.

Kindergarten naupang sanginn ah akahte pen atamzaw kum 3 leh kum 6 kikal ahihi. Nute Pate in apualam ah kigual diudeu in atate apusuahding ngak dimdiam in aomlaitak puakkhamzai in mitampi asi, aliamgawp himawk a, khasiat huai mahmah hi.

Hih thupiang hangin Ministry of Education in China gamsung aom sanginn khempeuh avekin Security Inspection neihding thupia a, Education Department leh Chinese Police te’n khutkilen in semkhawmding uh cih kiza hi.

Tuaban ah sanginn huangsung Campus Security zong hoihtak in bawlding kisam cih genkhia hi.

More: China ah nupi khat mawtaw buksungah Second 30 zong ziakialo in nausuakzia

Abeisa hunkhatlai in Kindergarten sanginn pawlkhat ah ngongtatna omngei cihi. Pawlkhat alungsim amantaklo, ahih keileh hazatna lungsim anei pawlkhat in naupangno te sangkahna ah bawlsiathei cimawk hi. Sawltak #zomidaily