Kim Jong Nam vaitawh akiman North Korea gammipa ki khahkhiata

Kim Jong Nam vaitawh akiman North Korea gammipa ki khahkhiata

North Korea gammi Ri Jong-chol kicipa pen akikepna Remand panin tuni Friday (Mar 03) zingsang 8:50am in ki khahkhiata cih theStar pan kiza hi. Kim Jong Nam ki suamlupna vaitawh Malaysia gamsung ah thongkiat theihnading, thu bawltheih nadingin pansan kician omlo, Evidence kician omlo ahih manin, tuni akikepna Sepang Police Headquarters pan ki khahkhiata hi.

Ki khahkhia cihhang in ama thu in utnana ah paitheita cih hilozaw a, muanmawh Suspect in akikepna Police te khutsung panin aki khahkhia hibek a, tu’n Immigration te khutsung ah ki ap leuleu hi. Putryjaya aom Immigration Department Headquarters ah ki paipihsuak in, zingsang 9:15am hunpawl in ki tunpih hi. Tualai munah Malaysia gampan hawlkhiat nading Deportation vaitawh kisai akisamteng vaihawmna nei uhhi.

Ri Jong-chol pen February 18 ni in Kim Jong Nam ki suamlupna vaitawh akiman ahihi. Attorney-General Tan Sri Mohamed Apandi Ali ii genkhiatna ah Friday ni in akikepna Police Custody panin ki khahkhiading a, agam North Korea ah ki puakkikding acih mahbang in Immigration Department in akisam teng asempah uh ahihi.

Attorney-General pa’n mawhmat theih nadingin pansan kician omlo “He will not be charged here as there is insufficient evidence against him” mah citangtang hi.

Kim Jong Nam ki suamlupna vaitawh mawhmattheih nading aomloh hangin Ri Jong-chol in Malaysia gamsung ah Legal takin omtheih nading Valid Document naneilo sawnsawn ahih manin, amanlang takin gampua ah aki hawlkhiading ahihi.

Kim Jong Nam ki suamlupna ah amakai taktak tepen Malaysia gamsung panin tuani mahin Indonesia lamah lengkhiakhin uh kici hi. Tuate mattheih nading in Malaysian Police te’n leitungbup palik kipawlna Interpol (International Criminal Police Organization) tetawh kipawlkhawm in vaihawmding cih kiza hi.

More: Kim Jong Nam suamlupna ah akihel numei nihte “Murder Case” tawh thu kibawl

Kim Jong Nam ki suamlupna ah ami ngiakin akihel numei nihtebel mithat Murder cihtawh thu kibawlkhin mawk a, akamsiat uhleh anih un sihdan Death Sentence kipia theiding cimawk hi. ZD Sawltak #zomidaily